Read Rongmei Naga THAUREYMEI 6 Bible Online

THAUREYMEI 6 - Rongmei Naga bible

THAUREYMEI 6

¹Maansei kandih nam ruc khou zinlik patna aluh nunc lungc pat geic pwkhou,

²Ravnac nunc rui mi aluh nunc lwnchav gaymei tei how lana, kaniw rui kahaw hawmei ta kaw laa the.

³Khoutei RINGHPOUC rui sa the, “Ai rui tiiloumei bumaengc hei maansei khou tingsaengna tibam lak khe; maansei hei theic kan nimei tuang di the. Ntaw khou rui thauna kaniw tingkwm 120 ringc twan lak khe.”

⁴Mi douc tei khatni katangv thangc nganvna maansei lev ravnac nunc kariumei nac liangtuangh nunc kandih khou chapat geic khwan e. Kaniw tei reynungc lungcloumei liangtuangh daihmei nunc khatni kazanc dinhmei nunc tei the.

⁵Kandih khou lungc bammei maansei katana hei adihkamv si cho khatni adih simei lungning kakhanhna bam tu cho twmei RINGHPOUC rui how pwkhou,

⁶kamei rui kaniw ta damclouna kandih khou tilungcloumei khang hei kalung kabiu the. Kamei kalung bakna

⁷kumna sa the, “Ai rui damcloumei maansei ti hei khouringh khounah, nruay thauruay guay ta kazauhna ai rui swmaan dat puni the, kalam thu ai rui kaniw ta damcloumei khang hei ai neihla mak khe.”

⁸Tiki Nouha ta thu RINGHPOUC rui kalung kwnlou e.

⁹Mi hei Nouha tuang pary e, Nouha hei ravchap tatmeipu khatni kakin khou kakhuay maekmei kiu karana khwan e. Kamei Ravguangc lev tat nchamcna lungc khwan e.

¹⁰Nouha hei nah mpouh gaanv thumh Shem, Ham khatni Japhet nai khwan e.

¹¹Tiki Ravguangc mikzaw khou meic baihmei guay thu si ngam khwan the, kumna kabamv kathuic khou meicngam meicliammei taanv rui padik bam khwan e.

¹²Ravguangc rui kandih ta zauc pwkhou mphuam ngam the kalam thu meic nunc tei simei panty khou lungc bam khwan e.

¹³Ravguangc rui Nouha khou sa the, “Maansei kaguayna ta swmaan ni the twna alung ding the. Kalam thu kandih hei kaniw tuang meicngam meicliammei taanv rui padik the, kaniw zaeng rui mi kandic ta lev kaniw kaguayna ta swmutsutlou puni the.

¹⁴Nang khang saipres thing rui hidai akhat kasiamh tho. Mi khou tei kailangv kailangv daengclangclou o kumna hei tei kalungc kapaengc khi rui kowliam kaluaklou o

¹⁵Hei tei kasaeng kadai rui chowbuk 300 saenghmei, chowbuk 50 daihmei khatni chowbuk 30 kauhmei nina e.

¹⁶Hei tei kagaeng ku nganvmei khou rui chowbuk akhat ku datna khup nina e. Hidai tei kathaek kathumh sw o. Kumna kanaek khou kaikhamv lou o.

¹⁷Kalung parik kaguayna ta swmaan khang ai rui duidai kandih khou tiguang puni the. Kandih khou naimei ramh katana theic puni the,

¹⁸tiki ai rui nang lev latdyng laa puni e. Nang thu nang now nang nac khatni kaniw now guay lev hidai khou gut ro.

¹⁹Hih lungc khou tei khouringh khounah kazaat kathuic tuang kanei kanei laa gutlou o, hei tei rui kaniw theih makna nangniw daeng khou bam khang e. Kaniw tei kakui khatni kaduic nina e.

²⁰Nruay thauruay pwni kazaat theilayna khouringh khounah pwni kazaat theilayna, nrui pwni kazaat theilayna kanei kanei laa gutlou o kaniw zaat maan mak khang e.

²¹Kum lana tu nuhmei taektw guay kazaat ntanghna laa gutna peiclou o, hei tei nangniw khang ni khouringh khounah guay khang ni e.”

²²Ravguangc rui samei kaguayna tei Nouha rui taanc the.