Read Rongmei Naga THAUREYMEI 7 Bible Online

THAUREYMEI 7 - Rongmei Naga bible

THAUREYMEI 7

¹RINGHPOUC rui Nouha khou sa the, “Nang kai kaikhunc kapwm ta nduanghna hidai khou tei gut tho; kandih nam ruc khou mi kin khou nchumhna tat bammei ta ariwmei kiu nang na di the.

²Nthanmei khouringc rui kazaat kathuic tuang kakui kaduic chanei chanei, khatni nthan makmei khouringh kazaat kathuic tuang kakui kaduic akhat akhat laaguang tho.

³Nruay thauruay ni kazaat kathuic tuang kakui kaduic chanei chanei laaguang tho. Khouringh khounah, nruay thauruay kakik kata nai dat khang mi hei taanc tho.

⁴Ai rui damcloumei kalung parik katana ta swmaan khang aseic khou rui thauna zaeng chanei tangv zingbangc 40 kalaanv 40 ting tiriu puni the.”

⁵RINGHPOUC rui samei kaguayna Nouha rui taanc the.

⁶Kandih dui thummei tei Nouha katingkwm 600mei kwm the.

⁷Duidai khou tei rui duak khang Nouha tei kanow kanac nunc khatni kanac nunc now nunc ta nduanghna hidai khou tei gut the.

⁸Nthanmei, nthanmakmei khouringh nunc nruay thauruay kakui kaduic khatni kandih khou kabung rui tuihmei khouringh zaat kathuic,

⁹Nouha lev twna hidai lungc khou tei Ravguangc rui latdanv tiiloumei theilayna gut the.

¹⁰Zaeng chanei tangv duidai kiu guang the.

¹¹Nouha tingkwm 600 tuang kaneimei bw tuang zaeng 17mei nungc kandih bangc thangc naimei duidai duipuakkai guay puak phak the, tingpuk tuang duidai kaimun guay laancpat the,

¹²kandih khou kalaanv 40 zingbangc 40 ting riu the.

¹³Mi nungc kahak tei Nouha kanow, kanac gaanv thumh Shem, Ham, Japhet khatni kaniw now nunc lev twna hidai khou tei gut the.

¹⁴Kaniw tei lev khouringh zaat guay, kai kiruai khatni nwm khouringc, nthyammei daihmei, nruay thauruay zaat katana gut the.

¹⁵Nouha lev twna kalung parik kazaat katana kakui kaduic kanei kanei hidai khou tei

¹⁶Ravguangc rui latdanv tiiloumei theilayna kazaat kaguayna gut the. Nouha tei gut kan pwkhou RINGHPOUC rui kaikhamv tei mbangh kan the.

¹⁷Dui tei zaeng 40 daic the, kumna hidai tei kandih nam ruc khou rui kauhsihna phuangc the.

¹⁸Dui tei thum thau the, hidai tei dui ruc khou phuangc thau the.

¹⁹Dui tei heidikamv chungc kauh thau the, kumna kauh liangmei chyngbut guay nganv thumliam thau the.

²⁰Dui tei daic khith khit thauna chyng twan khou rui chowbuk 15 daic twan ku the.

²¹Kandih khou naimei ringhmei katana nruay thauruay, khouringh khounah, khatni maansei katana theic the.

²²Kandih khou naimei kathiu laa mei khouringh katana theic the.

²³Kandih nam ruc khou naimei ringhmei katana maansei, khouringh khounah, nruay thauruay katana swmaan the. Nsaekcloumei twmei kiu Nouha lev twna hidai khou gutmei nunc na tei di the.

²⁴Zaeng 150 dui tei kandih ta thumlou the.