Read Rongmei Naga THAUREYMEI 8 Bible Online

THAUREYMEI 8 - Rongmei Naga bible

THAUREYMEI 8

¹Nouha khatni kamei lev hidai lungc khou bammei khouringh khounah katana ta tei Ravguangc amuc mak ge, kamei rui mpwan ti-aliulou tina dui tei thip key kahouh dat the.

²Kandih bangc tuang duipuakkai guay khatni tingpuk tuang kaimun guay thingc kan the, kumna ting key nthaekc kan the.

³Kumna khith khitna dui tei zaeng 150 lungc khou thip key dat the.

⁴Bw chaneimei tuang zaeng 17mei nungc hidai tei Ararat chyng dai khou nthaekc key the.

⁵Dui tei khith khit keyna, bw ruhmei tuang reymei tingmik nungc chyng twan guay how pat dat the.

⁶Zaeng 49 tangv Nouha rui kailat akhat laancpatna

⁷agaekc akhat mpat pat the. Hei tei guang dat makna dui tei thip key kan mak saanv samckey samcngangh bam kan the.

⁸Dui tei thip the ny twmei zauh khang Nouha rui aphyna akhat mpat pat the,

⁹tiki dui rui kandih kapwm tei chungc padik bam tina, aphyna tei tow keyloumei bamv maekna hidai khou tei hanc guang dat the, kumna Nouha rui kabaanc haamvpatna laalou dat the.

¹⁰Kamei zaeng chanei nkhwan dat lana aphina tei mpat pat dat the.

¹¹Aphyna tei laengkicchy ringcrih rimei kamwang khou mbamhna tingzyn guang dat the. Dui tei thip key dat tina the twmei Nouha thay the.

¹²Mi tangv tei zaeng chanei bam datna aphyna tei mpat pat dat re; kumna hei tei hanc guang dat mak khe.

¹³Nouha katingkwm 601 kwm reymei bw tuang reymei tingmik nungc dui tei thip key dat the. Nouha rui hidai gwm tei laanc patna zauc kari pwki, kandih tei kangc dat bammei ta how the.

¹⁴Kaneimei bw tuang 27mei nungc kandih tei phui thiu dat the.

¹⁵Ravguangc rui Nouha khou sa the,

¹⁶“Nang now, nang nac nunc khatni kaniw now nunc ta nduanghna hidai khou rui pat dat tho.

¹⁷Nruay thauruay khatni khouringh khounah kabung rui tuihmei khouringc kaguayna kingckiuc patna kandih pwm zinlik pat khang mi guay tei kaw pat dat tho.”

¹⁸Kumna Nouha tei kanow, kanac nunc khatni kaniw now nunc ta nduanghna hidai khou tei rui pat dat the.

¹⁹Khouringh khounah khatni nruay thauruay guay tei kazaat kazaat swna lwan pat dat the.

²⁰Nouha rui RINGHPOUC khang ravchabamv akhat kasiamh thauna nthanmei khouringc khatni nruay thauruay kazaat kathuic khou rui akhat khat laana kapumc pwm rawna RINGHPOUC khang khaengna kat the.

²¹Rawna khaengmei rym tei rui RINGHPOUC ta tikimlou pwkhou, kamei rui kumna ning the, “Maansei lung hei alauc khou rui thauna si bam sini maansei zaeng rui ai kandih ta siang dat lak khe. Ntaw ai rui sw kanmei kumcna ai kalung parik kaguayna ta swmaan dat lak khe.

²²Kandih nai bam saanv lingckeypui ganv khatni taypui ganv nai puni. Lumhmei nchumei, tingsei tinglwm, zingbangc kalaanv nai bam puni.”