Read Rongmei Naga THAUREYMEI 9 Bible Online

THAUREYMEI 9 - Rongmei Naga bible

THAUREYMEI 9

¹Ravguangc rui Nouha khatni kanac nunc ta kumna suaihiamlou the, “Nang kikta rui kandih lungc padik khang nangtu nangna puan kingc kiucna lungc tho.

²Khouringh khounah, nruay thauruay, khav ga rui nang ta pingna lungc puni the. Mi guay tei nang bangc khou lou the.

³Nang rui mi guay tei khatni thingnuy paannu guay tu nuh the; mi guay tei nang taektw khang tiilou the.

⁴Nang rui tu lak nimei akhat kiu thu zei naimei zanc tei tu lak nina e. Mi hei tu nuh mak ge kalam thu ringhmei hei zei khou tei nai e.

⁵Thowkumhmei rui maansei panty swmaan e thei, kata dandi tii puni. Maansei ta swluaimei khouringc ta tei theihmei dandi tii puni.

⁶Maansei ti hei Ravguangc ta luicna damclou the, kumhpui zaeng rui maansei akhat ta swluaipui mei ta tei maansei rui swluai dat puni e.

⁷“Nang kikta rui kandih kapwm lungc padik khang nang kikta kingc kiucna lungc pat tho.”

⁸Ravguangc rui Nouha lev kanac nunc khou sa e,

⁹“Ntaw thu ai rui nang khatni nang kikta khou latdyng ding the,

¹⁰mi hei kalung parik kaguayna nruay thauruay guay khatni khouringh khounah guay hidai khou rui pat datmei katana khang tei e.

¹¹Heikumna ai rui nangniw khou latdyng ding the: duidai rui kalung parik kaguayna ta swmaan dat lak khe; duidai rui kandih ta swmut dat lak khe.

¹²Ai rui nang khatni kalung parik katana khou swloumei tingsaeng latdyng tuang madanhmei swna,

¹³ai rui muangh khou alatdyng tiilou the. Mi hei ai rui kandih khou swloumei alatdyng tuang madanhmei swna bam puni the.

¹⁴Ai rui tingpuk hei muangh rui gumbinlouna muangsingc pat pwkhou

¹⁵kalung parik kaguayna ta duidai rui swmaan dat lak khe twna dingloumei alatdyng tei ai ningtow puni e.

¹⁶Muangh khou muangsingc patmei kathuic ai hei tei zaucna ai lev kandih khou naimei kalung parik kak khou swlou kanmei tingsaengzaeng tuang latdyng tei ningtow bam puni e.

¹⁷Ravguangc rui Nouha khou sa the, hei tei ai rui kalung parik kaguayna khou swlou kanmei latdyng tuang madanhmei sw puni the.”

¹⁸Nouha nac mpouh nunc hidai khou tei rui pat datmei tei Shem, Hem, khatni Japhet hei nunc hei the. (Hem hei Kanaan pu e).

¹⁹Kandih khou lungc bammei maansei zaatc katana hei mi Nouha nac gaanv thumh khou rui lungcpatmei tuang the.

²⁰Lautaanhmeipu Nouha tei drakhalau taanc rey liangmeipu e.

²¹Kamei drakha zouc zangv mba the kumna kaphey kabaan piu makna pheykai lungc khou pumtang aliau bam khwan e.

²²Kanaan pu, Hem rui kapu paliuc bammei tei how lana, kamei patna hei tei kachaic nei khou raclou the.

²³Khoutei Shem lev Japhet rui phey laana kaney bou khou goulouna, namthei tangsynna pheykai khou tei gutna kapu khou phey tei hwamlou the kumna kaney zaw tei namthei karihna kapu paliuc bammei tei kaney how kan mak ge.

²⁴Kamei mphaengv pat dat khou kanac alaucmeipu rui sw bammei tei thay lana

²⁵kamei rui kumna sa the, “Kanaan hei syang phungc kandi tho! kamei hei kachana nunc bangc sw puni the.

²⁶Kamei rui kumna ni sa e, Shem tuang Racguangc RINGHPOUC ta thuanc o! kumna Kanaan hei kabangc sw kandiu.

²⁷Ravguangc rui Japhet ta tikingckiuclou diu! Kakikta guay tei Shemmei nunc lev lungc bam kan diu! Kanaan hei Japhet bangc sw puni.”

²⁸Duidai tangv Nouha tingkwm 350 lungclou datna

²⁹katingkwm 950 khou kamei theic kan the.