Read Rongmei Naga 2 SAMUEL 11 Bible Online

2 SAMUEL 11 - Rongmei Naga bible

2 SAMUEL 11

¹Guang datmei lailwm ganv khou, guangh rui rih adow tat raph rap bammei ganv khou, David rui Joab ta katuang meicdaihmei nunc lev twna Isaraelmei ricmei kang ta thouc pat the. Kaniw rui Ammonmei ta ngam lana Rabba kaidai ta dingbin the. Tiki David thu Jerusalem khou bam duc the.

²Zaeng neih khat, David tei zip phup tu tangv lana thau datna tingzyn zaengc katuang kainam khou ruan pat the. Kamei mi kainam khou tei tat pat tat gutna bam khou ntumei gaanv khat duilow bammei ta how the. Mipui tei kalwn mpeyna gay khwan e.

³Mipui tei thow cho twmei zauc o twna meic thouclou the. Mipui tei kazanc Bathsheba twna kaw e, Eliam rui puanhmei e, kumna Hittimei Uria now e twmei thay the.

⁴Mipui ta tei kaw guang khang David rui meic thouc the. Kaniw rui kata nduangh guang pwkhou kata nzianlou the. (Mipui tei bw chaeng tat tangna bam rap khwan the.) Mi tangv tei mipui tei kakai tat dat kan the.

⁵Kumna mipui tei kamei kapumc nrit the twmei thay pwkhou David khou tei mi chamv tei dinc guang the.

⁶Khoutei David rui “Hittimei Uria ta adaeng khou thouc guang o” twna Joab khou sa khang meic thouc the. Kumna Joab rui Uria ta David khou thouc guang the.

⁷Uria tei guang pwkhou Joab khatni rihmei guay tei gayna bam diny khatni rih adoumei tei akumhna tat key bam cho twna Uria khou thanv the.

⁸Khoutei kamei rui Uria khou sa the, “Nang kai tatna zaeng nthaekc tho.” Uria tei tat kan the, khoutei David rui Uria kai khou kaipat tiguang the.

⁹Uria tei kakai tat makna guangh tuang rigaanvmei nunc daeng khou zip the.

¹⁰Uria tei kakai tat mak ge twmei David rui chu lana kamei rui kakhou sa the, “Nang kai guang dat mak saengc nganv lana guangna tabui swna kai tat makna cho?”

¹¹Uria rui daw the, “Isarael khatni Judamei nggaanvmei guay rihbamv khou bam e, kumna Latdyng Khuk tei kaniw pang khou lou bam e; atuang ricpy Joab khatni katuang meicdaihmei nunc ramvpuk khou zypui swna bam e. Akumhna ai akai tatna tuna zangvna anow daeng khou zip bam nina cho? Nthanmei puat tei saancna samei tuang e, ai kumna sw ngam mak ge!”

¹²Khoutei David rui sa the, “Kum e thei aseic thu mi khou hei bam tho. Nthuanh rui nang ta thouclou dat puni the.” Kumna Uria tei mi nungc tei khatni nthuanh thauna bamlou the.

¹³David rui katuang zingbangc nap tu khou kawna zouh tizangv mbalou the. Tiki mi nungc tei ni Uria kakai tat mak khe, kamei zouh mbana guanghkai rigaanv nunc bamv khou zip the.

¹⁴Nthuanh thauna David rui tatdyn akhat Joab khang hyna hei tei Uria khou tiilou the.

¹⁵Kamei rui kumna hylou the: “Rih adow ranvmei bamv khou Uria ta huliang khou lou o, kumna nangniw thei tangsyn dat ro, kumna Uria ta swluai kan diu.”

¹⁶Kumna Joab rui mi kaidai tei dingbin bam khou, zauczihmei tanhmei bamv khou Uria ta lou the.

¹⁷Zauczihmei nunc tei kaidai khou tei rui patna Joab tuang ricmei nunc ta tei adow the; kumna David tuang rihpy gaanvsaekc ta swluai the, kumna Uria ta ni swluai the.

¹⁸Khoutei Joab rui David khou mi chamv tei tii guang the,

¹⁹kumna chamv phunghmei khou tei kumna nchamlou the, “Nang rui mi chamv hei dinclou pwkhou

²⁰guangh tei kalungpuamcna ‘Tabui swna nangniw kaidai daeng tei guang tuancna adow bam tu cho? Raengh khou rui sauhpai kaap pat puni twmei nangniw thay makna cho?

²¹Gideon nac mpouh Abimelek ta swluai kanmei tei ningtow makna cho? Thebez khou tei ntumei rui napriaktauc raengh khou rui phaic keyna kata swluai kanmei tuang e. Tabui swna nangniw raengh daeng guang tuanh tu cho?’ twna nang khou sa pw e thei, ‘Nang tuang meicdaihmei Uria ta ni swluai the’ twna sa tio.”

²²Kumna latdiumeipu tei David daeng thangc tatna Joab rui sa o twna samei tei salou the.

²³Kamei rui sa the, “Aniw suangc zauczihmei rui tanc the kumna kaniw kaidai khou rui patna kapaengc khou adow the, tiki aniw rui kaniw ta nthau gut datna kaidai raengckat nganv nthau gut the.

²⁴Khoutei kaniw rui raengh khou rui sauhpai kaap patna guangh tuang meicdaihmei gaanvsaekc ta swluai the; khou tei meicdaihmei Uria ni theic kazauh the.”

²⁵Latdiu tatmeipu khou tei David rui sa the, “Joab ta katiulou o, kalung tangkhyn riu twna sa o. Rihbamv khou thu thow theic puni cho twmei meic thay mak ge. Mi kaidai ta tei adow ranvna adowna laa o twna sa o.”

²⁶Bathsheba tei kagaanv theic kan the twmei chu lana kamei kagaanv ta huay the.

²⁷Huaymei ganv tei luai pwkhou, David rui kata guanghkai khou kaw guang the; kumna kamei kanow swna kanac mpouh gaanv khat puanc the. Tiki David taanv ta tei RINGHPOUC neihla mak khe.