Read Rongmei Naga 2 SAMUEL 12 Bible Online

2 SAMUEL 12 - Rongmei Naga bible

2 SAMUEL 12

¹RINGHPOUC rui muhzwng Nathan ta David khou thouc guang the. Nathan rui David khou guangna sa the, “Kaidai akhat khou meic gaanv nei lungc bam khwan e; gaanv khat tei thu lungcgaymeipu e, baihmei gaanv khat tei thu lungcsimeipu khwan e.

²Lungcgaymeipu tei guaih ni lauziu ni mpeyna nai khwan e,

³tiki lungcsimeipu tei thu kamei rui liu guangloumei tuang lauziunac akhat na nai khwan e. Kamei rui mi ta tei makuatna hei tei kakai khou kanac nunc lev daic thau nchamc bam khwan e. Kamei rui mi khang tei kamei tu tumei titu the, zangv zangvmei tizangv the kumna kapamv khou puancna lungc bam khwan e. Mi lauziunac tei kanac aluhpui kumh tuang khwan the.

⁴Zaeng neih khat thu lungcgaymeipu kai khou tei gin guang khwan e. Lungcgaymeipu tei rui kagin khang katuang khouringc dowluai nii makna lungcsimeipu tuang lauziunac tei nym lana kagin khang tei suangc kic the.”

⁵David rui lungcgaymeipu ta kiuc kalungpuamc the kumna sa the, “Mi kumhmeipu ta kiuc thu swluai nina e twmei hei ringhmei RINGHPOUC ta saancna ai latdyng swmei tuang e!

⁶Kamei rui mi kumhmei nzimei taanv hei taanhmei zaeng rui lauziu akhat khang tei lauziu padeih khangc dat nina e.”

⁷Nathan rui sa the, “Mipu kiu nang the. RINGHPOUC Isarael Racguangc rui kumna sa the, ‘Ai rui nang ta Saul khou rui kanlou the kumna Isaraelmei guangc ni tiswlou the.

⁸Ai rui nang khang kaguanghdic ni kanow guay ni tiilou the; ai rui nang ta Isarael lev Juda tuang guangc tiswlou the. Mi hei rui nang khang biuh mak ge thei, ai rui mi tuang kanei zu ni tiilou nuh de.

⁹Tabui swna nang atuang latdanv piu mak tu cho? Tabui swna nang mi kumhmei simei taanv hei taanh tu cho? Nang rui Uria ta rihbamv khou tiswluai the; nang rui kata Ammonmei baanc khou tiswluai the, kumlana kanow ta tei nang laa the.

¹⁰Ntaw thu, meickin kathuic khou nang kikta gaanvsaekc theicsi theic puni, kalam thu nang rui alat liamna Uria now ta laa the.

¹¹Nang kai kaikhunc khou rui nang khang ryanramei ai rui tipatlou puni the. Ai rui nangnow nunc ta laana meic baihmei khang tii dat puni the. Kamei rui kaniw ta kalaanv ndawna nang hu khou zip nduangh bammei ta nang how puni the.

¹²Nang rui nkamhna paapc taanc e, tiki ai rui mi hei kalaanv Isaraelmei guay hu khou titaanclou puni the.’ ”

¹³“Ai RINGHPOUC ruc khou paapc taanc dyng the” twna David rui sa the. Nathan rui daw the, “RINGHPOUC rui nang ta kuaklou the; nang theic lak khe.

¹⁴Tiki nang rui mi kumhmei RINGHPOUC khang chanymei tuang taanv hei taanhmei zaeng rui, nang nac thu theic puni the.”

¹⁵Mi tangv tei Nathan tei kakai tat dat kan the. Uria now rui puanhmei David nac mpouh ta tei RINGHPOUC rui ti-nnau ranv sihlou the.

¹⁶Mi nac ta tei tigaylou dat diu khang David rui huayney ranv sihna huayney the. Kamei munthiangcna zingbangc pum katuang kailungc thangc gutna kandih khou aliauna bam the.

¹⁷Katuang Latzankai khou meicdaihmei nunc guangna kata swm the, tiki kamei nuh mak khe kumna kaniw lev tu nchamc mak khe.

¹⁸Kanit akhat tangv mi nac tei theic the, kumna David tuang meicdaihmei nunc tei mi chamv tei poulou khang ping bam khwan e. Kaniw rui sa the, “Mi nac tei ringc bam khou sini aniu rui kata kachuc tina kamei daw mak ge. Kanac theic the twna akumhna salou ngam nina cho? Kamei karana kata sw kasic kho ni nuh e!”

¹⁹Kaniw rui khat khat khou kumna tanglum bammei ta how lana, kanac theic the twmei kamei thay the. Kumna “Ngana tei theic thena cho?” twna kamei rui kaniw khou thanv the. “Ngguay, theic the” twna kaniw rui daw the.

²⁰Khoutei David tei kandih khou rui thau lana, duilowna, kapy zay lana kaphey kabaan kalaic the. Kumna kamei RINGHPOUC kai thangc tatna kalum the. Kamei guanghkai khou guang datna tu zangv khang ney the, hei tei kasiamhlou pwkhou kamei tu the.

²¹Khoutei meicdaihmei nunc tei rui kakhou sa the, “Ngana tei ringc bam khou nang kakhang rui kap nganv lana, theic kan tiki thau datna tu zangv bammei hei tabui cho, aniw kabah thay mak khe.”

²²Khoutei David rui daw the, “Ngguay, ngana tei ringc bam khou ai munthiangcna kap bam khwan e. RINGHPOUC rui ata zauc nzianlouna mi nac ta tei titheiclou pu lak ge twna ai ning khwan e.

²³Ntaw thu kamei theic ri kan the, tabui khang ai munthiangc dat bam ni thena cho? Ai rui mi nac ta tei tiringc dat ngam ni thena cho? Neih khat thu ai ni kabamv thangc tei tat puni, tiki kamei thu adaeng khou guang dat ngam ni tuang hamh the.”

²⁴Khoutei David rui kanow Bathsheba ta swmlou the. Kamei rui kakhou tatlou datna nah mpouh gaanv khat puanc dat the, kumna David rui mi nac zanc tei Solomon twna phuaklou the. RINGHPOUC rui mi nac ta tei nzian e.

²⁵Kumna kazanc tei Jedidia twna phuaklou o twna muhzwng Nathan khou latdanv tii the, kalam thu RINGHPOUC rui kata nzian e.

²⁶Mi ganv khou tei Joab tei Ammonmei tuang kaidai Rabba ta adowna hei tei laa nina bam khwan e.

²⁷Kamei rui David khou latdiumei thouclouna kumna sa the, “Ai rui Rabba ta adowna mi kaidai tuang dui laamei bamv tei sin the.

²⁸Ntaw thu nang tuang ricmei guay ta tei khuam kaduaina mi kaidai ti hei adowna nang laa tho. Ai rui adowna laa e thei mi kaidai zanc tei azanc kaw bam punina re.”

²⁹Kumna David rui katuang ricmei guay ta khuam kaduaina Rabba ta adowna hei tei laa the.

³⁰Ammonmei rav Milkom maengc py khou rui David rui kilogram 35 dou nritmei kachaekc tuang pyrun laa khwan e. Mi khou tei kamanv kunghmei tauc ni nai khwan e. David rui mi tauc tei laana kapyrun khou duanclou the. David rui mi kaidai khou tei rui ramh mpeyna laa khwan e.

³¹Mi kaidaimei nunc ta tei thinggabaeng, ntanh lausuakphu, khatni ntanh rih sinna taanv titaanc khwan e. Kaniw ta tei niangtauc ni tikasiamh khwan e. Kamei rui baih baihmei Ammonmei kaidai guay khou ni hei tei kumcna swlou khwan e. Mi tangv tei kamei nunc ta nduanghna Jerusalem khou guang dat the.