Read Rongmei Naga 2 SAMUEL 13 Bible Online

2 SAMUEL 13 - Rongmei Naga bible

2 SAMUEL 13

¹David nac mpouh Absalom tanpui tunac liuchang kalwn gaymei kazanc Tamar twmeipui gaanv khat nai khwan e. David nac mpouh Amnon rui mipui ta tei nzian khwan e.

²Kamei rui kata tei nzian langv lana nnau the, kalam thu kamei tei tunac timei zaeng rui nggaanvmei ta ti-ariw timakna kamei kata tei ariw tow mak khe.

³Karouh simei kapammei Jonadab twmeipu gaanv khat nai khwan e. Mipu tei David chana Shamma nac khwan e.

⁴Jonadab rui Amnon khou sa the, “Nang hei guangh nac e, tiki nang lung ryanramei lwn neih khat neih khat khou mbu mbuna how pat re cho. Tabui tuang swna cho?” “Ai Absalom kainac Tamar ta nzian the” twna kamei rui daw the.

⁵Jonadab rui kakhou sa the, “Nang nnaumei rouc swna nang laeng khou zip tho. Nang pu rui nang ta zauh khang guang pwkhou kakhou kumna sa tho, ‘Tamar ta adaeng khou guangna ntyan tii khang salou o. Kamei rui mi khou hei guangna ai rui howmei khou napgan kasiamhna titulou pwmei ta laa nii e.’ ”

⁶Kumna Amnon tei nnaumei rouc swna laeng khou zipna bam the. Guangh David rui kata zauh khang guang pwkhou Amnon rui kakhou sa the, “Tamar ta mi khou hei thouc guangna ai rui howmei khou ntyan kasiamh lana kamei kahak rui ata titulou o.”

⁷David rui guanghkai khou bammei Tamar khou meic thouclouna sa the, “Nang Amnon kai thangc tatna kakhang tu zangv khang kasiamhlou tio.”

⁸Tamar tei guang pwkhou Amnon tei laeng khou zip bam khwan the. Tamar rui ntyan dwm laana kamei howmei khou ntyan kasiamh the.

⁹Kamei rui ntyan tei tu khang kasiamhlou the tiki kamei tu mak khe. Kamei rui sa the, “Meic guayna ta thouc ganc kan o.” Kumna meic guayna tat ngam kan the.

¹⁰Khoutei Amnon rui Tamar khou sa the, “Mi ntyan tei alaeng khou laaguangna nang rui phalou o.” Kamei rui ntyan tei laana kadaeng khou guang the.

¹¹Kamei rui ntyan tei tii bam khou Amnon rui kata zayna “Anei zip di kho” twna sa the.

¹²Kamei rui sa the, “Nuh mak ge. Apuningcle hei kumhmei simei Isarael khou taanh makmei taanv akhou simei taanclou rio. Mi hei meicpingmei taanv de.

¹³Akumhna ai charuangc khou ngangc thau dat ngam nina cho? Nang ta Isarael kandic khou tizaklou puni the. Guangh khou sa tio, kamei rui nang khang suai makna tii puni de.”

¹⁴Tiki Amnon rui hei tei chulou mak khe; kamei tei ntumei suangc tanc la mei thu nymna tizaklou the.

¹⁵Ntaw thu Amnon rui Tamar ta karaeng the; kata nzianmei khang tei suangc karaengmei rui gut duc the. “Tat kan o!” twna Amnon rui sa the.

¹⁶Khoutei kamei rui sa the, “Kumh rio. Ata kumna thouc ganhmei thu nang ntaw taanc kanmei khuay suangc sini daic the!” Tiki Amnon rui hei tei nkinglou mak khe;

¹⁷kamei rui kabangc gaanv khat ta kaw guangna sa the. “Mipui ti hei akhou rui zay ganc kan o. Kata zay gancna kaikhamv taanlou o!”

¹⁸Banghpu tei rui kata tei zay gancna kaikhamv taanlou the. Tamar tei baanhpwam saenghmei thiula saenghmei nu bam khwan e. Hei tei mi douc tuang guangh nac liuchang tuang pwan khwan e.

¹⁹Kamei rui kapy khou mbut nroulouna, kaphey siatkaek lana, kazaw kagoucna kap ranvna tat pat khwan e.

²⁰Kachaic Absalom rui hei tei how pwkhou kamei rui thanv the, “Amnon rui nang ta swkasiclou thena cho? Nang lung heidi kabiu nangh e. Kamei hei nang chaic de, kumhpui zaeng rui mi lam hei meic baihmei khou dinclou nangh e.” Kumna Tamar tei lungh ryanrana karana Absalom kai khou bam the.

²¹Mi chamv tei Guangh David rui chu pwkhou kalungpuamc the.

²²Absalom rui ni Amnon ta heidikamv karaengna lat sini kachuc dat mak khe.

²³Tingkwm kanei tangv Absalom tei Ephraim kaidai daeng khou Baal Hazor twna kawmei bamv khou katuang lauziu hiw tiapna bam khwan e. Khoutei kamei rui guangh nac mpouh guay ta kaw guang khwan e.

²⁴Kamei rui Guangh David khou guangna sa the, “Guanghle, ai atuang lauziu hiw tiapna bam e. Mi ngai khou tei nang khatni nang tuang meicdaihmei guay ni guanglou o.”

²⁵Guangh tei rui daw the, “Guang lak khe, anacpule.” “Aniw guayna guang ti thei nang khang ryanra langv pwng de.” Absalom rui thu kaw dat kaw datna kaw the, tiki guangh tei rui thu nuhlou mak khe, kumna Absalom ta tei tat dat tho twna suaihiamlouna kadylou the.

²⁶Tiki Absalom rui sa the, “gay the, kum e thei, achana Amnon na ta sini thouc guang tho.” “Tabui sw khang kamei guang bam nina cho?” twna guangh tei rui sa the.

²⁷Tiki Amnon lev David nac mpouh baihmei guay tei kamei lev guangh nchamc mak saanv nuh mak ge twna Absalom rui sa the. Absalom rui guangh khang kic nimei khwmkih taektw kasiamh the,

²⁸kumna kamei rui kabangc nunc khou sa the: “Amnon rui zouh zangv geic kanmei tei nangniw thay nina e, kumna mi ganv khou tei swluai tho twna ai rui latdanv pat puni. Nangniw ping riu. Hei tei ai rui karith guay phungc puni de. Bauc o, rouh riu!”

²⁹Kumna kabangc guay rui kalat piuna Amnon ta swluai the. David nac mpouh baihmei guay tei takuanh tuangcna pak kan the.

³⁰Kaniw chaeng khou tatna bammei ganv khou tei David khou kumna sa the: “Absalom rui nang nac mpouh guay ta swluai ngam the— meic gaanv khat na ta sini nsaekclou mak khe!”

³¹Guangh tei dingthauna kalung kabiuna kaphey siatkaekna kandih khou pun key the. Kadaeng khou bammei kabangc guay tei ni kaniw tuang pheybaan siatkaek the.

³²Tiki David chana Shamma nac mpouh Jonadab rui sa the, “Guanghle, nang nac mpouh guayna ta swluai ngam rap mak ge. Amnon na de theihmei, Amnon rui kakainac Tamar ta swkasiclou khou tei rui thauna kamei kata swluai ni the twna kalung ding kanmei tei kalwn tei zaucna nang how the cho.

³³Nang nac mpouh guay theic ngam the twmei thu lwm rio; Amnon na de theihmei.”

³⁴Kum bam khou tei Absalom tei pak kan the. Mi dyng khou tei meic mpeyna Horonaim thangc rui chyng chaeng khou key kanmei ta rigaanvmeipu rui how the. Kamei rui guangh daeng khou guangna kamei rui howmei tei poulou the.

³⁵Jonadab rui David khou sa the, “Hei tei nang nac mpouh nunc the. Kaniw theih mak ge twna ai sa the cho.”

³⁶Kamei rui mi lat tei sa tang rappui lev David nac mpouh nunc tei gut the. Kaniw tei kap the kumna David khatni katuang meicdaihmei guay ni kap ranv sihna kap the.

³⁷Absalom pak tatna Geshurmei guangc Ammihud nac mpouh Talmai daeng khou bamlou the. David rui kanac mpouh khang tei rui latlu saengc sihlou khwan e.

³⁸Kumna Absalom rui pak tatna Geshur khou tingkwm kathumh bamlou khwan e.

³⁹Tiki Amnon ta huaymei ganv tei luai pwkhou, kamei kanac mpouh Absalom ta ning thau the.