Read Rongmei Naga 2 SAMUEL 14 Bible Online

2 SAMUEL 14 - Rongmei Naga bible

2 SAMUEL 14

¹David rui Absalom ta ningna bammei tei Joab rui thay the.

²Kum tina Tekoa khou bammei ningtyngmeipui gaanv khat ta kaw guang khang Joab rui meic thouc the. Mipui tei guang pwkhou Joab rui kakhou sa the, “Nang latlumei pwan piuna, nang sam zay makna kaganv tingsaengcna latlu bammei lwn sw o.

³Kumna nang guangh daeng khou tatna ai rui sa o twna saloumei lat tei sa o.” Khoutei kumna sa o twna Joab rui kakhou nchamlou the.

⁴Mipui tei guangh daeng khou guangna kandih nkhum key tangcna sa the, “Guanghle, ata nkhavlou o!”

⁵“Nang tabui kahawna cho?” twna guangh rui thanv the. Kamei rui sa the, “Guanghle, ai hei lungcsimei amaypui e. Agaanv theic the.

⁶Guanghle, anac mpouh gaanv nei nai bam khwan e. Zaeng neih khat kaney laupuk khou agay the. Hei khou tei kaney ta khaamlou nimei meic maek khe kum tina gaanv khat ta thu swluai the.

⁷Guanghle, kum tina kachana ta swluaimeipu ta tei swluai dat khang tiipat tho twna ariang aluaicmei guay rui sana bam the. Kata tei swluai dat kan e thei ai hei kanac maekmeipui swna bam puni the. Atuang machun swna bammei tei kaniw rui swmaan kan puni the kumna agaanv hei kanac mpouh maekmei swna kazanc maekna taan puni the.”

⁸Guangh rui daw the, “Nang kai thangc tat dat tho, mi latbamv hei ai rui kaphianh puni the.”

⁹Kamei rui sa the, “Guanghle, nang rui tabui bui pwni taancloumei guay tei ai khatni akai kaikhunc khou nkhamlou kan ni de; guangh khatni guanghkai kaikhunc khuay sw mak kan diu.”

¹⁰Guangh tei rui daw the, “Kata swluai khang sw bampui mei ta kiuc akhou tiguang o, kum e thei kamei rui nang ta sw katuakc dat zat pu lak khe.”

¹¹Kamei rui sa the, “Guanghle, anac khwm khangh khang sw bammei akaimei guay rui anac mpouh gaanv khat ti hei swluai dat lana si ranvmei taanv taanh mak khang RINGHPOUC nang Racguangc khou huayneylou o.” David rui daw the, “RINGHPOUC zanc saancna latdyng swmei tuang e” twmei thu “Nang nac mpouh ta tei kasamlu akhat na sini ti-ntang lak ge.”

¹²Mipui tei rui sa the, “Guanghle, ai lat akhat na kha salou dat ni he.” “Sa tho” twna kamei rui sa the.

¹³Mipui tei rui sa the, “Tabui swna nang Ravguangc tuang mei nunc khou mi kumhmei nkhuaimei taanv hei taanclou tu cho? Nang rui nang nac ta tei alay ganhmei hei nkhuai e twmei ntaw nang rui sa pat kanmei lat hei rui dinc the.

¹⁴Aniu meic guayna theic puni de, aniu hei kandih khou bun keyloumei dui laa thau dat nuh makmei kumh tuang de. Ravguangc rui nganvna theihmei ta tiringclou dat mak ge, tiki guangh rui thu alay ganc kanmei ta kai khou laaguang dat khang kachaeng kasiamhlou nuh de cho.

¹⁵Guanghle, ai rui nang khou guangmei lam thu meic nunc rui ata tipingna bammei zaeng rui the. Kumna ai rui samei tei guangh rui taanclou pwng e twmei lwmgayna guangmei tuang the. Ai rui samei chulouna

¹⁶ai khatni anac ta swluaina Ravguangc rui tiiloumei kandic khou rui aney ta swmaan khang swna bammei nunc khou rui nang rui kanlou pwng e twmei lwmna guangmei tuang e.

¹⁷Guanghle, nang tuang latdyng rui ata kanlou puni twmei ai ning the, kalam thu guangh hei thu Ravguangc tuang baanchara kumh tuang de kumna simei gaymei ta thay e. RINGHPOUC nang Racguangc rui nang ta nduanghlou pw diu o!”

¹⁸Guangh rui daw the, “Ai rui nang khou lat akhat thanv puni, nang nchumhmei lat sa nina e.” Kamei rui daw the, “Guangh rui thanv nii niimei lat thanvlou pu do.”

¹⁹“Mi hei Joab rui sw bam tuang hamhna cho?” twna kakhou thanv the. Kamei rui daw the, “Nthanmei puat sindaancna ai latdyng swmei tuang e. Guanghle, nang lat hei ley duak dat nimei chaeng maek khe. Tabui kumhna sw nina cho khatni tabui lat sa nina cho twmei nang tuang meicdaihmei Joab rui saloumei tuang the.

²⁰Ntaw pat bammei lwnlung hei sw ndiaulou khang kamei rui sw bammei tuang e. Guangh, nang thu Ravguangc tuang baanchara kumcna thay ngampary bammei tuang de, kumna pat bammei guay hei thay bammei tuang de.”

²¹Katang thangc guangh rui Joab khou sa the, “Nang rui kahaw hawmei tei ai taanclou ni the twna ai ning the. Nang tatna Absalom ta mi khou hei kaw guang dat tho.”

²²Joab tei kandih nkhum key tangcna David ta kalumna sa the, “Guanghle, Ravguangc rui suaihiamlou diu! Guangh nang rui ata nzianlou e twmei ai thay the, kalam thu ai rui taanclou o twmei nang rui taanclou dyng the.”

²³Mi tangv tei kamei thau lana Geshur thangc tatna Absalom ta Jerusalem khou nduangh guang dat the.

²⁴Tiki Absalom tei guanghkai khou bam nuh mak ge twmei guangh rui latdanv pat the. “Ai kata zauc nii mak ge” twna guangh tei rui sa the. Kumna Absalom tei karana kakai khou bam the, kumna kamei guangh hu khou guang mak khe.

²⁵Isaraelmei pang khou Absalom kumhmei lwnchav gaymei khou kazanc dinhmei meic baihmei maek khwan e; kapy khou rui kaphaypav nganv nthuih thikh thik khwan e.

²⁶Kasam geic khwan e kumna kasam tei saengc langvna nrit langv pwkhou tingkwm luaimei ganv khou rap guai guai bam khwan e. Hei tei kilogram kanei suangc nrit khwan e.

²⁷Absalom tei kanac mpouh gaanv thumh khatni aluh gaanv khat nai khwan e. Mipui zanc kiu Tamar twna kaw e, kumna kamei tei mpeyna kalwn kachav gaymeipui khwan e.

²⁸Absalom tei guangh ta how zat makna Jerusalem khou tingkwm kanei lungclou khwan e.

²⁹Khoutei Joab ta kamei rui guangh daeng thangc thouclou nii lana kadaeng khou guang khang kaw the, tiki Joab tei guang mak khe. Absalom rui kaluaihna kaw dat khwan e, tiki khou tei ni kamei guang mak khe.

³⁰Kumna Absalom rui kabangc nunc khou sa the, “Zauclo, Joab tuang laupuk hei atuang laupuk daeng khou nai e, mi khou tei sipian thau bam e. Nangniw tatna hei tei mailou tho.” Kumna kaniw tat lana mi laupuk tei mai thow the.

³¹Joab tei Absalom kai thangc tatna, “Tabui swna nang bangc guay rui atuang laupuk mai thow tu cho?” twna sa the.

³²Absalom rui daw the, “kalam thu ai rui nang ta kawmei ganv khou tei nang guang makmei zaeng rui e. Ai rui nang ta guangh khou thouclouna ‘Ai Geshur mpatlouna mi khou hei guangmei hei tabui khang cho? Hei thangc tei bam kanmei rui akhang gay tap be twna tisa me twna e.’ ” Absalom rui kakhou sa dat re, “Ai guangh ta ariw nuh khang nang rui swloumei ta kahawna the, ai akhuay nai e thei kamei rui ata swluai kan diu.”

³³Kumna Joab tei David daeng thangc tatna Absalom rui samei tei raclou the. Guangh rui Absalom ta kaw the, kumna Absalom tei kandih nkhum key tangcna kalum the. Guangh rui kata kaputna laalou the.