Read Rongmei Naga 2 SAMUEL 18 Bible Online

2 SAMUEL 18 - Rongmei Naga bible

2 SAMUEL 18

¹David rui kamei guay ta khuam guang kaduaina 1000 khatni 100 kang kasiamhlou lana kapy swmei khang damclou the.

²Kumna kamei rui kakang kathumh swna thouc pat the. Joab khatni Joab chana Abishai khatni Gatmei Ittai kaniw rui kakang akhat khat tuang kapy sw the. Kumna guangh rui mi nunc khou tei sa the, “Ai rui nangniw ta tat nduangh puni.”

³Kaniw rui daw the, “Nang aniw lev tat nuh mak ge. Aniw guay hei thei karih datna pak bam tini, hamh e thei aniw meic kapaek ta swluai ngam bam tini zauczihmei nunc rui ramh khang swna ning ni tuang hamh e; tiki nang thu aniw meic 10,000 suangc sini nthuk ge. Nang mi kaidai khou hei bamna aniw ta nkhav bammei rui gay de.

⁴“Nangniw rui gay e twna ningmei kiu ai sw puni the” twna guangh rui daw the. Katuang ricmei 1000 khatni 100 swna alwan patmei ganv khou tei kamei kaidai tuang raengc daeng khou tei dingna bam the.

⁵Kamei rui Joab, Abishai khatni Ittai khou sa the, “Azaeng khang rui nangniw mi chabwan Absalom ta tei sw kabiu nuh mak ge.” David rui rihpy nunc khou heikumna latdanv tiimei tei katuang ricmei guay rui ni chu khwan e.

⁶David tuang ricmei guay tei nwmbangc key the kumna Isaraelmei ta Ephraim tuang nwmbangc khou adow the.

⁷Isaraelmei guay ta David tuang mei nunc rui ngam the; kumna mi nungc tei Isaraelmei 20,000 ta dowluai the.

⁸Kaniw tei nwmbangc thangc ni adow gutna rihbamv khou swluaimei suangc nwmbangc khou swluaimei rui geic the.

⁹Thay mak daekna David tuang mei gaanvsaekc ta Absalom rui ariw the. Absalom tei takuanh tuangcna pat khwan e kumna kamei mphauh bang daihmei akhat bangc khou pak gut khou rui thingchy khou kasam manc the. Takuanh tei pak tat kan tina Absalom tei kauh khou thaengc bam duc the.

¹⁰David tuang mei gaanv khat rui hei tei how lana Joab khou sa the, “Kaipoucle, Absalom tei thingbang khou thaengc bammei ta ai how the!”

¹¹Joab rui daw the, “Nang kata how e thei tabui swna kadyng khou swluai mak tu cho? Kum khwan e thei ai rui sini daandi paek ruh khatni rihbungkam akhat nang khang tii ni tuang e.”

¹²Khoutei mipu tei rui daw the, “Nang rui akhang daandi paek 1000 tii bam sini ai thu guangh nac mpouh ruc khou abaanczung akhat na sini zaythaulou ni tuang hamh e. ‘Azaeng khang rui nangniw mi chabwanpu Absalom ta tei nangniw swkabiu nuh mak ge’ twna guangh rui nang, Abishai khatni Ittai khou latdanv pat kanmei tei aniu guayna chu de.

¹³Ai rui guangh lat liamna Absalom ta swluai ti thei, guangh rui chu puni the kum pwkhou nang ata gaeklou ngam ni tuang hamh e.”

¹⁴“Nang lev ai kaganv swmaan bam saengc lak khe” twna Joab rui sa the. Kamei rui buy kathumh laana mphauh bang khou ringcna thaengc bammei Absalom ngaengv khou mi buy kathumh tei phianlou the.

¹⁵Khoutei Joab tuang rih na phunghmei gaanv ruh guangna Absalom ta tei swluai the.

¹⁶Adow nthaekc khang bianggun amuan tho twna Joab rui latdanv pat the kumna katuang ricmei guay tei Isaraelmei ta nthau tatmei khou rui hanc guang dat the.

¹⁷Kaniw rui Absalom tuang pumc tei nwmbangc khunh nthukmei akhat khou phaiclouna ntauh khuan dai rui khuan binlou the. Isaraelmei guay tei kakai kakai thangc pak ntamv tat ngam kan the.

¹⁸Absalom tei kamei ringc bammei dak khou kata ningtow bam khang Guangh nunc tuang nzaengc khou ntauh suamclou khwan e, kalam thu kazanc tei naina bam khang kanac mpouh maek khwan e. Kumna kamei rui hei tei kazanc khou phuaklouna mi tausuam zanc tei Absalom Tausuam twna ntaw ni thayna bam e.

¹⁹Khoutei Zadok nac mpouh Ahimaz rui Joab khou sa the “RINGHPOUC rui guangh kata zauczihmei nunc khou rui kanlou the twmei tuang gaychamv hei ntaw pak tatna guangh khou dinclou ni the.”

²⁰Joab rui sa the, “Tat nuh mak ge, nang aseic thu gaychamv phungc tat nuh mak ge, tingmik baihmei khou rui phungc tat ro, kalam thu aseic hei thu guangh nac mpouh theihmei tingmik ge.”

²¹Khoutei kamei rui Sudanmei bangcpu khou tei sa the, “Nang tatna nang howmei tei guangh khou dinclou ti tho.” Mipu tei nkhum keylouna pak tat kan the.

²²“Guangh nac mpouh theihmei khang tei kakhanh bam nangh e; ai mi chamv tei phungc tat rap ni de” twna Ahimaz rui sa ranvna sa the. “Nang tabui swna mi chamv kiu dinclou niina cho? Nang mi khang tei swan ni mphang bam ni tuang hamh e” twna Joab rui sa the.

²³“Tabui bui pu ni sw bam kan di tho, ai tat nii rapna di the” twna Ahimaz rui sa dat re. “Kum e thei tat tho” twna Joab rui sa the. Kumna Ahimaz tei Jordan nzaengc chaeng tei pak pat the, kumna kamei rui banghpu ta tei pak rina tat the.

²⁴David tei raenghmun kapaenghmei lev kalunghmei kak khou naimei bamv akhat khou dungc bam khwan e. Rigaanvmeipu rui raenghpy khou kuna chaeng thangc phaengc key pwki meic gaanv khat karana pak guangmei ta how the.

²⁵Rigaanvpouc tei rui guangh khou tei kauc key pwkhou guangh tei rui sa the, “Kamei karana e thei thu kamei gaymei chamv phungc guang lana e.” Mipu tei ana khith khit guang the.

²⁶Khoutei meic baihmei gaanv khat ni karana pak guangmei ta rigaanvpouc tei rui how the, kumna kamei rui raenghmun nkhwanmeipu khou tei “Zauclo, meic baihmei gaanv khat ni pak guang e!” twna kauc the. Guangh rui daw the, “Mipu hei ni gaychamv phungc guangmeipu e.”

²⁷Rigaanvpouc tei rui sa the, “Reymeipu rampak tei Ahimaz rampak kumc e.” Guangh rui sa the, “Kamei meicgaymei de, kumna kamei gaymei chamv phungc guangmei tuang de.”

²⁸Ahimaz rui kaucna guangh khou sa khwan e, Ramh guayna hei gay the, kamei rui kandih khou pun keyna kalumna sa e, “Guangh ruc khou rihthaumeipu ta rihngamloumeipu RINGHPOUC nang Racguangc ta thuanc o.”

²⁹“Absalom tei duak dai cho?” twna guangh rui sa the. Ahimaz rui daw the, “Guanghle, nang tuang meicdaihmei Joab rui ata thouhmei ganv khou tei kachin karona bam duc kan e, hei tei tabui sw tina cho ai thay mak ge.”

³⁰“Nang hei thangc tei ding o” twna guangh rui sa the; kumna kamei patna ding the.

³¹Mi tangv tei Sudanmei banghpu tei guangna guangh khou sa the, “Guangh khang gaymei chamv ai phungc guang e. Guangh ruc khou rihthaumei nunc ta aseic hei RINGHPOUC rui rihngamlou the!”

³²“Absalom tei duak dai cho?” twna guangh rui thanv the. Banghpu tei rui daw the, “Kakhou patloumei tei nang ta zauczihmei nunc khou khatni nang ruc khou rihthaumei nunc khou patlou e thei gay nimei tuang e.”

³³Guangh tei kazaengsimei rui padik the. Kamei rui raenghkat ruc khou naimei kailungc khou gutna kap the. Kamei tatna kapna kumna kauc the, “He anac mpouh! Anac mpouh, Absalomle! Nang phaan ai theic e thei gay nimei tuang e! Absalom, anac mpouhle!”