Read Rongmei Naga 2 SAMUEL 20 Bible Online

2 SAMUEL 20 - Rongmei Naga bible

2 SAMUEL 20

¹Benjamin kaikhwangmei Bikri nac mpouh Sheba twna kawmeipu gaanv khat Gilgal khou bam khwan e. Kamei hei meic nunc ta swkatuakc bammeipu akhat khwan e. Kamei rui bianggun amuan lana kauc the, “David tei key kan diu! Aniu kathei lay lak ge! Isaraelmei guayle, aniu kai tat dat di kho!”

²Kumna Isaraelmei guay tei David ta mpatlouna Sheba thei lay kan the, tiki Judamei thu mpatlou makna Jordan khou rui Jerusalem khou David thei lay guang the.

³David rui Jerusalem khou katuang guangc kai khou guang tangc pwkhou, guangh kai nkhwan khang lou duhmei katuang laamvnow gaanv ruh ta tei laaguangna kaniw ta rigaanvmei nunc rui nkhwan kan the. Kamei rui kaniw bung khang thu tii the, tiki now swna thu tatlou dat mak khe. Kaniw ta tei ringh saanv sumlouna amaypui kumcna lungc kan the.

⁴Guangh rui Amasa khou sa the, “Judamei guay ta adaeng khou kadouh kiu kaw kaduai guang o, kumna nang ni mi khou hei bam nina e.”

⁵Amasa tei nyankeyna guangh rui saloumei ganv khou tei kaw guang ngam mak khe.

⁶Kum tina guangh rui Abishai khou sa the, “Absalom suangc sini Sheba rui aniu ta swkatuakc ranv puni the. Amei nunc ta nduanghna kata suic tat tho, hamh e thei kamei rui raengh raengloumei kaidai asaekc laana aniu khou rui duak kan kho ni nuh e.”

⁷Kumna Sheba ta suic khang Abishai tei Joab tuang mei nunc, guangh tuang rigaanv, khatni baihmei ricmei guay ta nduanghna Jerusalem khou rui kaamc thau the.

⁸Gibeon tuang taudaic khou kaniw tei bam bam khou Amasa rui kaniw ta ariw the. Joab tei rihpwan piuna baengsaeng kathwap khou louna kasian khou kamcna bam khwan the. Kamei kaamc pat pwkhou baengsaeng tei kathwap khou rui kathyng key the.

⁹Khoutei Joab rui “Champanvle, gayna bam dai cho?” twna Amasa khou sa the, kumna kaput khang kabaanzat rui Amasa biangc hiw zamc the.

¹⁰Joab baanc akhat khou baengsaeng sinna bammei ta tei Amasa rui zauclou mak khwan the, kumna Joab rui Amasa bung chau huaklouna karei kandih khou key the. Kadyng khou kamei theic the kumna Joab rui kata dow dat kaluaih bam khang kage maek khwan the. Mi tangv tei Joab lev kachana Abishai tei Sheba ta suic tat kan the.

¹¹Joab tuang ricmei gaanv khat Amasa tuang pumc daeng khou tei dingna kumna kauc the, “Joab khatni David thei lay nimei guay Joab thei lay tho!”

¹²Amasa pumc tei zei rui haengh haengna chaeng chung khou zipna bam the. Meic guayna ding kanmei ta Joab tuang mei tei rui how pwkhou Amasa tuang pumc tei chaeng paengc thangc zay patna phey gumlou kan the.

¹³Amasa pumc tei chaeng paengc thangc zay pat kan pwkhou meic katana Joab thei layna Sheba ta suic tat the.

¹⁴Sheba tei Isaraelmei tuang ramv guay tat kaanna Abel Beth Maaka twna kawmei kaidai khou guang the, mi khou tei Bikri puinacmei guay guang kaduaina mi kaidai khou tei kathei lay guang the.

¹⁵Sheba mi kaidai khou tei bam the twmei Joab tuang mei nunc tei rui thay lana kaniw rui mi kaidai tei dingbin the. Kaniw rui mi raengh paengc biak tei taniang chaeng thwan thau the kumna raengh tei chau pangv khang kabangc ni langc the.

¹⁶Mi kaidai khou tei ningtyngmeipui gaanv khat nai khwan e, kumna mipui tei rui raengh khou rui kauc the, “Nking o! Nking o! Joab ta mi khou hei guang khang kawlou o; ai kata kachuc nii e.”

¹⁷Joab tei guang pwkhou kamei rui sa the, “Nang Joab kiu tha?” “Ngguay, ai the” twna kamei rui daw the. “Kaipoucle, ai rui samei hei nkinglou o” twna kamei rui sa the. “Ai nking bam the” twna kamei rui daw the.

¹⁸Mipui tei rui sa the, “‘Abel kaidai khou tatna thanv o’ twna rey khou rui meic nunc rui sa bam khwan e. Kaniw rui kumna Abel kaidai khou rui thanvna lungc bam khwan e.

¹⁹Mi kaidai hei nchu-nzaenghna Isarael khou latpiumei kaidai swna lungc bam tuang e. Tabui swna nang rui mi kaidai ti hei swmaan khang sw bam tu cho? RINGHPOUC tuang kaidai ta nang swmaan niina cho?”

²⁰Joab rui daw the, “Kum zat mak ge! Ai rui nangniw tuang kaidai ta swmaan lak ge!

²¹Aniw rui sw bammei kiu mi khang tei hamh e. Ephraim kaikhwangmei Bikri nac mpouh Sheba rui guangh David ruc khou rihthauna mi khou hei bam the. Mipu ta tei tii pat tho, kum e thei ai mi kaidai khou rui tat dat kan ni de.” “Aniw rui Sheba py raengh khou rui phaic key puni the” twna mipui tei rui sa the.

²²Mipui tei kaidai tuang meic nunc khou tei tatna kaphianhna kaniw rui Sheba py dangv lana raengh khou rui Joab khang phaic key the. Tat dat khang Joab rui bianggun amuan tina kaniw guay tei kaniw kai hanc dat the. Kumna Joab tei Jerusalem khou guangh daeng khou guang dat the.

²³Joab tei Isaraelmei ricmei nunc rihpy e; Jehoiada nac mpouh Benaia tei David tuang rigaanv nunc ta sinmeipu e;

²⁴Adoniram tei bangh nunc ta sinmeipu e. Ahilud nac mpouh Jehoshaphat tei hyloumei guay sinmeipu e;

²⁵Sheva tei guangh peikai tuang hymeipu e; Zadok khatni Abiathar rui amuh e;

²⁶Jair kaidaimei Ira tei David tuang amuh gaanv khat re.