Read Rongmei Naga 2 SAMUEL 22 Bible Online

2 SAMUEL 22 - Rongmei Naga bible

2 SAMUEL 22

¹RINGHPOUC rui David kata Saul khou rui khatni baihmei zauczihmei guay khou rui kanlou pwkhou, David rui mi lu hei RINGHPOUC khou suanlou the:

²RINGHPOUC hei ata gaekloumeipu e; kamei hei akhang tanhmei rihgaekkai e.

³ARacguangc hei ata gaekloumeipu e, kapaan rui ai suai ngaam mak khe, kamei hei akhang nggih e; kamei rui ata gaeklou the. kamei hei ata kanloumeipu e; swluai swtiat nimei maansei nunc khou rui gaeklou the.

⁴Ai rui RINGHPOUC khou kaw pwkhou, kamei rui ata zauczihmei baanc khou rui kanlou e. RINGHPOUC ta thuanc o!

⁵Theihmei duimuat rui ata bam nkuay khwan e; swkamut kamaimei duimuat aruc khou liak guang khwan e.

⁶Theic suc nuhmei bamv adaeng nai ngguic bam khwan e, khatni theihmei phac akhang zawlou khwan e.

⁷Ai ryanramei ganv khou RINGHPOUC ta kaw khwan e; nkhavlou khang ai RINGHPOUC ta kaw khwan e. Katuang Ravkai khou kamei rui akhwan chulou khwan e; nkhavlou khang ai rui kawmei kamei chulou khwan e.

⁸Khoutei kandih kadunh kathanh khwan e; tingpuk bamv kadunh khwan e, kalam thu Ravguangc kalungpuamc khwan e!

⁹Kanukwang khou rui maikhou pat the, kamwang khou rui rawmutmei chuanghmei maithyn pat the.

¹⁰Kamei tingpuk siatra patna key the, muangh bangv zinghmei khou kaphay niilouna key the.

¹¹Kamei kerubim khou tuangcna samc the; kamei mpwan swkaeng khou tat re.

¹²Kamei rui kata zinghmei rui duamliam the; dui phunghmei zinghmei muangc rui kata duamliam the;

¹³Kahu khou ting palik patmei riw khou mai chuangc thau the.

¹⁴Khoutei RINGHPOUC rui tingpuk thangc rui ganh key the, khoutei Ngamparymei Racguangc khwan chu the.

¹⁵Kamei rui katuang pailu kaap guangna zauczihmei ta alay phaklou the; tingpalikmei riw rui kaniw ta tipak the.

¹⁶Duipui syng laanclou the, kandih bamv laanc duaklou the, RINGHPOUC rui zauczihmei ta luh pwkhou, kalungpuamcna kaniw ruc khou rah pwkhou.

¹⁷RINGHPOUC kamei kauh thangc rui haamv keyna ata kabaanc rui houlou the; kumna nthukmei dui khou rui ata zay patlou the.

¹⁸Kangamv naimei zauczihmei khou rui kamei rui ata kanlou the, asuangc tanhmei ata zauczihmei khou rui kanlou the.

¹⁹Ai ryanramei ganv khou, kaniw rui ata adow the, tiki RINGHPOUC rui ata gaeklou e.

²⁰Theic suc nuhmei bamv khou rui kamei rui ata gaeklou e; kamei rui ata kanlou e kalam thu kamei rui ata kwnlou e.

²¹Ai rui nchumhna taanhmei tuang phy RINGHPOUC rui akhang tii the; kamei rui ata suaihiamlou the kalam thu ai khuay maekmei e.

²²Ai RINGHPOUC tuang latdyn piu the; ai aRacguangc khou rui tat pat mak ge.

²³Katuang latdyn guay ai piu the; ai katuang latdyng piu makmei tuang sw mak khe.

²⁴Akhuay maek ge twmei kamei thay e, ai simei taanv taanh mak ge twmei kamei thay e.

²⁵Kumna nchumhmei taanhmei swan kamei rui akhang tii the, kalam thu ai hei khuay maek ge twmei kamei thay e.

²⁶He RINGHPOUC, nang thu nang khou lwmnuhmei nunc khou tei suai zat mak ge, khatni nthuihmei nunc khang gay nthuih thik ge.

²⁷Nang hei nthanmei nunc khang nthanmei e, tiki meicsimei nunc ta sina sw e.

²⁸Nang thu niamhmei nunc ta kanlou e, tiki gaenghswmei nunc ta tiniamhkeylou e.

²⁹He RINGHPOUC, nang thu akhang gaanhmei e; nang rui atuang zinghmei ta tigaanclou e.

³⁰Ata zauczihmei nunc ta adow khang nang rui akhang pumtan tiilou the; kaniw tuang rihgaekkai guay ta ngam khang ngamv tiilou the.

³¹Mi Racguangc hei kataanv adih nthuih cho, kalat adih lwm nuhmei cho! kakhou duploumei guay khang kamei hei nggih e.

³²RINGHPOUC kamei na hei Ravguangc e; Ravguangc na hei aniu ta gaekloumeipu e.

³³Mi Racguangc hei ai duppui bamv tanhmei e; kamei rui achaeng ti-nthuihlou e.

³⁴Kamei rui atan ta chalung tan kumc ti-magaplou the; kamei rui ata chyng ruc khou giuga makna titatlou the.

³⁵Kamei rui ata rih aphian khang nchamlou the, kumna tanc liangmei sauhpai sin ngam khang nchamlou the.

³⁶He RINGHPOUC, nang rui ata gaeklou the khatni kanlou the; nang rui nkhavloumei paan rui ata tidaiclou the.

³⁷Ata nym nimei khou rui nang rui kanlou the kumna ai bow zat mak khe.

³⁸Ai rui zauczihmei guay ta nthauna kaniw ta ngam the; kaniw ta swkamut kamailou mak saanv ai nthaekc mak ge.

³⁹Ai rui kaniw ta hiw key the, kumna kaniw thau dat ngam mak khe; ngam makna kaniw ahu khou zip bam the.

⁴⁰Rih adow khang nang rui akhang pumtan tiilou the kumna zauczihmei ta ngamlou the.

⁴¹Nang rui zauczihmei ta ahu khou tipaklou the; kumna ata zauczihmei guay ta ai rui swkamut kamailou the.

⁴²Nkhavlou khang kaniw phu khwan e, tiki meic gaanv khat na rui sini kaniw ta kanlou mak ge. Kaniw rui RINGHPOUC ta kaw e, tiki kamei dawlou mak ge.

⁴³Ai rui kaniw ta niak piaklou the, kaniw mbut mbaih the; ai rui kaniw ta kandih taniang ta kumc niibin the.

⁴⁴Amei nunc rui ata adowmei khou rui nang rui ata kanlou the, kumna ata zaatc guay ruc khou kaipouc swna tilungclou the; ai rui thay bam makmei nunc rui amei sw the.

⁴⁵Kandih baihmei nunc rui ahu khou nkhum key the; kaniw rui alat chu pwkhou piu the.

⁴⁶Kaniw bauh mak khe kumna kaniw tuang rihgaekkai khou rui kadunhna pat the.

⁴⁷RINGHPOUC hei ringcna bam e! Ata gaekloumeipu ta thuanc o! Ata kanloumeipu tanhmei Racguangc tuang hym ta thuanc o!

⁴⁸Kapaan rui ata zauczihmei guay ta ngam the; kamei rui zaatc nunc ta abangc tibamlou the.

⁴⁹Ata zauczihmei nunc khou rui ata kanlou the. He RINGHPOUC, nang paan rui ata zauczihmei guay ta ngam the khatni swluai-swtiat nimei nunc baanc khou rui gaeklou the.

⁵⁰Hei zaeng rui zaatc pang khou ai nang ta thuanc e; ai nang ta thuancna suan e.

⁵¹Ravguangc rui katuang guangc ta rihdai tingamlou the; kamei rui kadahloumei guangc ta taek makna nzianlou e, David khatni kakikta khou tingsaengzaeng nzianlou e.