Read Rongmei Naga 2 SAMUEL 24 Bible Online

2 SAMUEL 24 - Rongmei Naga bible

2 SAMUEL 24

¹RINGHPOUC rui Isaraelmei ruc khou lunghpuamcna, kaniw ta tiryanra khang David khou katiulou the. RINGHPOUC rui kakhou sa the, “Nang tatna Isaraelmei lev Judamei mei sing phuc o.”

²Kumna David rui katuang ricpy Joab khou sa the: “Nang tuang kapy swmei nunc ta nduanghna Isaraelmei kandic katin katou tat tangcna rihphyan sing phuc o. Rihphyan azuh si nai bu cho ai thay nii e.”

³Tiki Joab rui guangh khou daw the, “Guanghle, RINGHPOUC Ravguangh rui ntaw nang tuang nai bammei meising suangc luan phay tigeiclou kan diu, kumna guangh rui ringcna hei tei how tangh kan diu. Tiki tabui swna guangh rui meicsing phuc niina cho?”

⁴Tiki Joab khatni katuang kapy swmei nunc tei guangh lat tei piu mak ngam makna kaniw guangh hu khou rui tat patna Isaraelmei mei sing phuh khang tat kan the.

⁵Kaniw tei Jordan kaan pat lana Gad tuang ramv khou nzaengc chung khou naimei Aroer kaidai tuang dihba khou zypui sw the. Mi khou tei rui kaniw dihpy thangc Jazer

⁶khatni Hittimei ramv Gilead khatni Kades khou tat the. Mi tangv tei kaniw Dan khou tat the, kumna Dan khou rui neihkey thangc Sidon khou tat the.

⁷Mi tangv tei dihba thangc raengh raengloumei kaidai Tur khou keyna Hivimei khatni Kanaanmei kaidai guay khou tatlou the. Nkhamh khou Juda tuang dihba thangc Beersheba khou key the.

⁸Kumna Isaraelmei kandic kapwm tei tat likna bw chakiuna zaeng 20 tangv Jerusalem khou guang dat the.

⁹Kumna rihphyan hei Isarael khou 8,000,00 Juda khou 5,000,00 nai e twna Joab rui guangh khou poulou the.

¹⁰Tiki David tei meic sing phuc tang pwkhou kalung khou neihla makmei patna RINGHPOUC khou sa the, “Ai rui meic sing phucna RINGHPOUC hu khou si sihmei paap taanc dyng the! Ata kuaklou o. Ai mpangmei taanv taanc dyng the.”

¹¹David rui lauthwan zipthau pui ganv khou kata sigay zaucbammei muhzwng Gad khou Ravguangc lat dinc guang the.

¹²“David kamei rui kahaw hawmei kadah khang ramh kathumh tii puni twna nang kakhou tatna sa o. Kamei rui kahaw hawmei akhat ai rui taanclou puni the.”

¹³Gad tei David daeng khou guangna Ravguangc rui samei tei dinclouna thanv the, “Nang tuang kandic khou tingkwm kathumh[1] nap nkowmei ta kahaw ny, hamh e thei zauczihmei hu khou rui bw thumh pak tat nii ny, hamh e thei nang kandih khou zaeng neih thumh ravpyan guangmei ta kahaw cho? Ntaw kakhanhna RINGHPOUC khou tabui lat sa o cho twmei dinclou tho.”

¹⁴David rui daw the, “Ai hei ramh sw la khang thay mak khe! Tiki maansei rui dandi tiimei ta thu ai kahaw mak ge. RINGHPOUC rui dandi tii pu di tho. Kamei thu zauzian thaymeipu e cho?”

¹⁵Kumna RINGHPOUC rui mi nungc lauthwan tei rui thauna kamei rui kakloumei ganv luai mak saanv Isaraelmei ruc khou ravpyan tiguang the. Kumna Isaraelmei kandih tintou nganvna meic 70,000 theic tangc the.

¹⁶RINGHPOUC tuang baanchara rui Jerusalem ta swkamut kamai khang swthaumei ganv khou tei RINGHPOUC kalung kalaicna, “Biuc the, nthaekc tho!” twna swluai bammei baanchara khou tei sa the. Mi ganv khou tei mi baanchara tei Jebusimeipu Arauna tuang laudybamv khou bam khwan e.

¹⁷Meic nunc ta swluai bammei baanchara ta tei David rui how lana RINGHPOUC khou sa the, “Nkhuaimei kiu ai dyng the. Nkhuaimei taanv taanhmei kiu ai dyng the. Mi san simei nunc hei rui tabui tuang taanclouna cho? Ai khatni akai kaikhunc ta dandi tii nimei tuang de.”

¹⁸Mi nungc tei Gad David daeng khou guangna sa the, “Nang Arauna tuang laudybamv thangc tei kuna RINGHPOUC khang ravchabamv kasiamh tho.”

¹⁹David tei RINGHPOUC tuang latdanv piuna Gad rui samei tei kumcna kamei tat the.

²⁰Arauna tei zauc key pwkhou guangh tei katuang meicdaihmei nunc ta nduanghna kadaeng thangc tat kumei ta how the. Kamei David hu khou pun nkhum keyna

²¹sa the, “Guanghle, tabui khang nang mi khou hei guang tu cho?” David rui daw the, “Nang tuang laudybamv hei liuna ravpyan hei nthaekc khang mi khou tei RINGHPOUC khang ravchabamv kasiamhlou khang guang tuang e.”

²²Arauna rui sa the, “Guanghle, laa tho, kumna nang rui RINGHPOUC khang tii nii niimei tii khwan tho. Ravchabamv khou rawna khaeng khang ni guaituamchic nunc mi khou hei nai the; thing khang ni guaih guangkhap khatni laudypaeng nai the.”

²³Arauna rui mi guay tei guangh khang tiina sa the, “RINGHPOUC nang tuang Racguangc rui nang tuang puatkat laalou pw diu o.”

²⁴Khoutei guangh rui sa the, “Ai kamanv tii puni de. RINGHPOUC aRacguangc khang nsa laamei puat kat lak ge.” kamei rui laudybamv khatni guaituamchic nunc tei daandi paek 50 khang laa the.

²⁵Khoutei ravchabamv kasiamhna rawna khaengmei khatni alamvpuatkat kat the. RINGHPOUC rui karavsuai chulouna Isarael khou ravpyan nthaekc the.