Read Rongmei Naga 2 SAMUEL 3 Bible Online

2 SAMUEL 3 - Rongmei Naga bible

2 SAMUEL 3

¹Saul kai kaikhunc biak lianghmei khatni David biak lianghmei rihmei nunc tei kaganv tingsaengc sihna adowna bam khwan e. David rui tanc khith khit, Saul kaimei nunc tei nsuan khith khit key khwan the.

²Kabangc khoumei David nac mpouh gaanv charuk hei Hebron khou rui puanc khwan e. Gaanvthaihmei khou rui chak thauna Jezreelmei Ahinoam rui puanhmei Amnon,

³Kaneimei khou Karmelmei Nabal now swloumei amaypui Abigail rui puanhmei Kileab; Kathumhmei khou Geshurmei guangc Talmai nac aluhpui Maaka rui puanhmei Absalom;

⁴Padeihmei khou Haggit rui puanhmei Adonija; Panguhmei khou Abital rui puanhmei Shephatia;

⁵Charukmei khou Egla rui puanhmei Ithream hei nunc hei e. Kaniw guayna hei Hebron khou rui puanhmei nunc e.

⁶David tuang mei nunc lev Saul kaimei nunc lev adowmei tei kumna tatkey pwkhou, Abner tei Saul thei laymei pang khou tanc khith khit thau the.

⁷Zaeng neih khat thu Saul nac mpouh Isboshet rui Abner ta Saul laamvnow, Aia nac aluhpui Rizpa lev zip kariu e twna nkham the.

⁸Khoutei Isboshet tuang lat tei rui Abner kalungpuamc the. Kamei rui sa the, “Ai Juda khang siluhpu e na cho? Ai rui Saul ta guat puni twna nang ningna cho? Ai Juda ta nkhav bam e twmei nang ning changhna cho? Thaureyna khou rui ai nang pu Saul, kachana nunc khatni kapam nunc ta nzianna lungc guang tuang de. Ai rui nang ta David baanc khou rui kanloumei tuang de. Kum tiki nang aseic hei ntumei lam khou ata nkhuaimei khang chak bam bue ni!

⁹David khou RINGHPOUC rui nrianhloumei tei ai rui tiguang nthuihlou mak ge thei khatni

¹⁰Saul tuang guangcdic tei tikalaicna David guangcdic Isarael khou khatni Juda kapwm khou Dan khou rui Beersheba nganv kasiamh thau ngam mak ge thei Ravguangc rui Abner aruc khou situ-routu keylou kandi tho.”

¹¹Isboshet tei Abner ta pingna lat akhat na sini sa dat mak khe.

¹²Abner rui David khou Hebron kaidai khou chamv phunghmei thouc guangna sa the, “Thow rui mi kandic khou hei guangh sw puni cho? Akhou latdyng swlou o, kum e thei Isaraelmei guay ta ai rui nang biak thangc zay pat puni.”

¹³David rui daw the, “Gay the!” “Ai rui nang lev latdyng sw puni the, tiki ai rui nang khou ramh khat na kage nai e: Mi kiu thu Saul nac aluhpui Mikal ta nduangh guang nina e.”

¹⁴David rui Isboshet khou ni latdiumei thouclouna sa the, “Anow Mikal ta tii dat tho? Ai rui kamanv khang Philistinmei nggaanvmei 100 gic tii kanmei tuang di the.”

¹⁵Kumna Isboshet rui Mikal ta kagaanv Lais nac mpouh Paltiel khou rui laa dat the.

¹⁶Paltiel tei kapna kanow thei layna Bahurim kaidai lay guang tangc the. Tiki Abner rui “Nang kai thangc hanc dat tho” twna sa tina hanc dat kan the.

¹⁷Abner rui Isaraelmei kapy nunc daeng khou guangna kaniw khou sa the, “Nangniw rui David ta nangniw guangc khang tingsaengcna kahaw guangmei tuang the.

¹⁸Ntaw hei kadow chamei kiu nai the. ‘Isaraelmei ta Philistinmei khatni baih baihmei kata zauczihmei guay khou rui kanlou khang ai rui abangc David ta piu puni the’ twna RINGHPOUC rui sa kanmei tei ningtow o.”

¹⁹Abner rui Benjaminmei nunc khou ni tatna kachuc the kumna Hebron thangc David daeng khou guangna Benjaminmei khatni Isaraelmei rui nuhmei latbamv tei guangna raclou the.

²⁰Abner tei meic gaanv 20 ta nduanghna Hebron khou guang pwkhou, David rui kaniw ta napkaw the.

²¹Khoutei David khou Abner rui sa the, “Ai tatna Isaraelmei guay ta akaipouc nang biak thangc phungc guang puni the. Kaniw rui nang ta kaniw tuang guangc swna laa puni the, kum pwkhou nang rui kahaw hawmei nang laatow puni the, kumna mi kandic kapwm khou hei nang guanghtu puni the.” David rui Abner ta gaeklou puni twmei latdyng swlou lana suanc patlou kan the.

²²Mi tangv tei Joab khatni David tuang meicdaihmei nunc tei kwam tatna ramh mpeyna phungcna guang dat the. Mi ganv khou tei Abner tei Hebron khou bam mak khe kalam thu David rui kata gaeklou ni de twna salouna thouclou dat kan the.

²³Joab khatni kamei nunc tei mi khou tei guang pwki Abner tei David daeng khou guang tina David rui kata gaeklou ni twmei latdyng swlouna nchu-nzaenghna thouclou dat kan the twmei chu the.

²⁴Khoutei Joab rui David khou guangna sa the, “Nang tabui sw tu cho? Abner tei nang daeng khou guang the— tabui swna nang kata heikumna mpatlou tu cho?

²⁵Kamei mi khou hei guangmei tei nang ta guat khang guangmei tuang e. Nang taanv guay khatni nang rui tatlou tat guangmei bamv guay thay khang guang tuang e. Nang hei tei thay de!”

²⁶Joab tei David daeng khou rui tat pat dat lana Abner ta kaw guang khang meic thouc the, kumna kaniw rui Abner ta Sira duikhunc khou rui nduangh guang dat the. Heikumna sw bammei tei David thu thay mak khwan e.

²⁷Abner tei Hebron guang tangc pwkhou, Joab rui kata pary rac langc nimei thak swna raenghmun daeng thangc nduangh pat the, kumna mi khou tei Abner ta tei kabung khou baengsaeng rui chumlou the. Kumna Asahel tuang khwm tei khangclou the.

²⁸David rui mi chamv tei chu pwkhou kamei rui sa the, “Abner ta swluaimei khou tei ai khatni amei nunc thu thay mak ge twmei RINGHPOUC rui thay e.

²⁹Mi tuang dandi tei Joab khatni kakai kaikhunc khou keylou kan diu! Meickin meickin khou kakai khou nggaanvmei gaanv khat khou khurou ravpuat bu ny, meic gic ravpuat bu ny, nsuan-mbaengmei bu ny suc-rihbamv khou swluaimei bu ny, tu zangv khang maekmei bu ny akhat thu suai makna nai tanh tan kan diu!”

³⁰Kumna Joab lev kakainac Abishai rui kakainac Asahel ta Gibeon tuang ricbamv khou rui swluaimei khwm tei laa dat the.

³¹Khoutei David rui Joab khatni kamei nunc ta tei kaniw tuang phey siat kaekna zaengsiphey piuna Abner khang latlu o twna latdanv pat the. Kumna mbeih khang puanc pat khou tei David tei takiu thei khou lwanna tat the.

³²Kumna Abner ta tei Hebron khou mbeihlou the, khoutei David khatni kamei nunc tei tarou khou tei kap ranvna kap the.

³³David rui mi latlumei lu hei Abner khang suanlou the: “Tabui swna Abner tei mpangmei kumcna theic nina cho?

³⁴Kaphay ni kabaanc ni karak mak ge; meicdowmei rui swluaimei kumcna kamei theic the!” Khoutei meic nunc kap kalwanna kap dat the.

³⁵David tei ramh katit na sini tu kan diu khang neihmaryn nthiam the, tiki kamei rui kumna latdyng sw the, “Neih key mak khou ai rui ramh katit na sini tu e thei Ravguangc rui ata swluai diu tho!”

³⁶Kaniw rui hei tei thay lana pian the. David rui taanhmei guay tei meic nunc rui pian khwan e.

³⁷Abner ta swluaimei khou tei David kazauh mak ge twmei Davidmei nunc khatni Isaraelmei nunc rui thay khwan e.

³⁸Guangh David rui katuang meicdaihmei nunc khou sa the, “Isarael tuang kapy swmei daihmei akhat aseic hei theic the twmei nangniw thay makna cho?

³⁹Ai hei Ravguangc rui kadahloumei guangc bam sini, aseic hei ai hei alung nnau key the. Zeruia nac mpouh nei hei rira langv the. Kaney simei twanlyammei taancloumei khang tii biuhmei dandi tei RINGHPOUC rui tii diu tho!”