Read Rongmei Naga 2 SAMUEL 4 Bible Online

2 SAMUEL 4 - Rongmei Naga bible

2 SAMUEL 4

¹Abner ta Hebron khou swluai the twmei chamv chu pwkhou Isboshet tei ping the, khatni Isaraelmei guay ni ping the.

²Isboshet tuang rihkey tatmei khou kapy swmei gaanv nei— Baana lev Rekab nai khwan e. Mi nei hei Benjamin kaikhwangmei Beerot khou bammei Rimmon nac mpouh nei e. (Beerot hei Benjamin tuang ramv akhat re.

³Mi khou tei lungc bammei nunc thu Gittaim khou pak tatna mi khou tei lungc kan the.)

⁴Saul nac mpouh Jonathan rui puanhmei Mephiboshet twmeipu nai khwan e. Saul lev Jonathan ta swluaimei chamv Jezreel khou rui chu guang khwan e, mi khou tei kamei katingkwm panguh na di he. Mi ganv khou tei katuang naruaipui rui kata tei puanc thauna pak kan the; tiki chadi chada langv khou rui puanc duak keyna katan bau the.

⁵Rekab lev Baana Isboshet kai thangc tat the, kumna kaney kalaanv neihdyngmei ganv khou guang tangc the. Isboshet tei zaeng sw bam khwan e.

⁶Khoutei chaengmun daeng khou gehu nggamna bammeipui tei tanguihna zipsuy twkey kanmei dak khou Rekab lev Baana tei tiap gut the.

⁷Kainung khou tei gut lana Isboshet zip bammei laengbamv khou tei gutna swluai the. Kaney rui kapy dangv lana Jordan nzaengc khou tei zingbangc tat thangcna tat the.

⁸Kaney rui Hebron khou mi py tei David khou guang katna kakhou sa the, “Mi hei nang ta swluai khang rik bammei Saul nac mpouh Isboshet tuang py the. Aseic hei RINGHPOUC paan rui Saul khatni kakikta guay ruc khou khwm khangh khang nuhlou the.”

⁹David rui kaney khou daw the, “Ata theic-suc nuhmei bamv guay khou rui kanloumei ringhmei RINGHPOUC zanc khou rui latdyng sw e!

¹⁰Saul theihmei chamv tei akhou Ziklag khou guang pouloumeipu tei kamei rui gaymei chamv phungc guang tuang e twmei kamei kakhanh e. Ai rui kata tei nym lana swluai the. Kamei rui phungc guangmei gaychamv khang tei kamei rui mphang nimei swan kiu hei tei khwan e!

¹¹Kakhuay maekna, kakai khou zip bammeipu ta swluaimeipu tuang dandi thu adih si ranv puni cho? Ai rui katuang khwm khangc puni the. Kumna nangney ta kandih nam ruc khou rui swmaan puni the.”

¹²David rui latdanv pat the, kumna katuang ricmei nunc rui Rekab lev Baana ta swluai lana kaney phaybaanc dan gancna Hebron khou duikhunc daeng khou thaengclou the. Kamei rui Isboshet tuang py tei laana Hebron khou Abner tuang tarou khou mbeihlou the.