Read Rongmei Naga 2 SAMUEL 5 Bible Online

2 SAMUEL 5 - Rongmei Naga bible

2 SAMUEL 5

¹Khoutei Isaraelmei kaikhwang guay rui Hebron khou David daeng khou guangna sa the, “Aniw hei nang zeibangv e, nang zancbangv e.

²Saul rui aniw tuang guangc swna bammei douc nganvna nang rui Isaraelmei ta rihbamv khou zaylouna tat khwan e, kumna nang rui Isaraelmei ta chaengzayna lungc puni khatni kaniw tuang guangc sw puni twna RINGHPOUC rui nrianhlou khwan e.”

³Kumna Isaraelmei tuang kapy guay Hebron khou guangh David daeng khou guang the. Kamei rui nthukmei tuang latdyng swlouna, kaniw rui kata thauh teylou the, kumna kamei Isaraelmei guangc sw the.

⁴David kamei tei katingkwm 30 khou guangh sw the, kumna kamei tingkwm 40 guangh sw the.

⁵Kamei Hebron khou rui Judamei guangc swmei tei tingkwm chanei kapaek khatni Jerusalem khou rui Isarael lev Judamei guangc swmei tei tingkwm 33 e.

⁶Guangh David khatni kamei nunc tei Jerusalem ta adow khang tat nimei ganv guang khwan the. Jerusalem khou lungc bammei Jebusimei nunc tei rui David rui mi kaidai tei laa ngam ni tuang hamh e twmei kakhanhna, kaniw rui kakhou kumna sa the, “Nang mi kaidai khou hei gut ngam ni tuang hamh e. Kaphaybau kamik tiatmei nunc rui sini akhangv biuc e.”

⁷(Tiki David rui kaniw tuang Zaion rihgaekkai tei laa the kumna mi ta tei “David tuang Kaidai” twna kaw the.)

⁸Mi nungc tei David rui kamei nunc khou sa the, “Jebusimei ta ai rui karaengmei kumcna karaengmei thowkumhmei mi khou hei nai bu cho? Kaniw ta swluai nimei thow nai cho? Mi kumhmei nai e thei duichaeng tei gutna mi miktiat phaybaumei nunc ta tei adow tho.” (Kum timei zaeng rui “Mik tiat phay baumei nunc RINGHPOUC tuang kai khou gut nuh mak ge” twna samei tuang e.)

⁹Mi rihgaekkai tei David rui laana mi khou tei kamei lungc the, kumna mi kaidai zanc tei “David tuang Kaidai” twna kaw the. Kamei rui mi khou tei kaidai sw nkuaylou the, chyngbut tuang neihpat biak khou kandih thwanmei bamv khou tei rui taanc kahouh thau the.

¹⁰Kamei tei tanc khith khit thau the kalam thu Ngamparymei RINGHPOUC Ravguangc rui kata nduanghlou khwan e.

¹¹Turmei guangc Hiram rui David khou latdiumei nunc thouc guang khwan e; kamei rui David khang guanghkai kasiamhlou khang sidar thing khatni thing ntauh taanv taanhmei tiguang khwan e.

¹²RINGHPOUC rui David kata Isaraelmei guangc tiswlou the khatni kamei nunc khang rui kakandih ta tilungcgaylou the twmei kamei thay the.

¹³Hebron khou rui Jerusalem khou guangmei tangv, kanow khatni laamvnow mpeyna kaw datna kanac mpouh aluh mpeyna puanc dat khwan e.

¹⁴Mi hei Jerusalem khou rui puanc kanmei nac nunc zanc the: Shammua, Shobab, Nathan, Solomon,

¹⁵Ibhar, Elishua, Nepheg, Japhia,

¹⁶Elishama, Eliada khatni Eliphelet hei guay e.

¹⁷David ta guangh tiswlou the twmei Philistinmei khou raclou the, kum tina kata nym khang kaniw tuang ricmei nunc tat pat the. Mi chamv tei David rui chu pwkhou raengh raengloumei bamv khou key bam the.

¹⁸Philistinmei nunc tei Rephaim tuang nzaengc khou keyna hei tei laa the.

¹⁹Khoutei David rui RINGHPOUC khou thanv the, “Ai Philistinmei nunc ta adow nina cho? Nang rui kaniw ta abaanc khou tiilou puni cho?” “Ngguay, adow tho! Ai rui kaniw ta nang baanc khou tiilou puni the!” twna RINGHPOUC rui daw the.

²⁰Kumna David rui Baal Perazim khou keyna mi khou tei kamei rui Philistinmei ta ngamlou the. Kamei rui sa the, “RINGHPOUC rui ata zauczihmei guay ta duidai kumcna swphaklou the.” Kumna mi bamv zanc tei Baal Perazim twna kaw the.

²¹Philistinmei nunc tei kaniw tuang ravmaengc ganclou ducna pak kan the, kumna hei tei David khatni kamei nunc rui laa the.

²²Mi tangv tei Philistinmei tei Rephaim nzaengc khou guang datna hei tei laa dat the.

²³David rui RINGHPOUC khou thanv dat re, tiki RINGHPOUC rui kumna daw the, “Kaniw thei biak thangc rui tat nkuay guang o balsam thingbang phaengc achowmei biak thangc rui adow o.

²⁴Rihmei lwan guangmei khwan tei balsam thingbang twan thangc chu pw e thei, adow thau tho, kalam thu RINGHPOUC ai rui nangniw hu khou tat gutna Philistinmei ricmei nunc ta ngamlou puni the.”

²⁵RINGHPOUC tuang latdanv piuna David taanc the kumna kamei rui Philistinmei ta Geba khou rui Gezer nganv nthau tangclou the.