Read Rongmei Naga 2 SAMUEL 7 Bible Online

2 SAMUEL 7 - Rongmei Naga bible

2 SAMUEL 7

¹Guangh David tei katuang guangckai khou kabamv swna lungc pwkhou RINGHPOUC rui kata zauczihmei guay khou rui gaeklou the.

²Khoutei guangh tei rui muhzwng Nathan khou sa the, “Ai thu sidar thing rui kasiamhmei kai khou lungcna bam the, tiki Ravguangc tuang Latdyng Khuk thu kalummei pheykai khou louna bam the!”

³Nathan rui daw the, “Nang khou ning pat patmei tei taanc tho, kalam thu RINGHPOUC rui nang ta nkhavlouna bam e.”

⁴Tiki mi nungc zingbangc tei RINGHPOUC rui Nathan khou sa the,

⁵“Ai rui sa e twna nang David khou tatna kumna sa o, ‘Ai rui lungc nimei Ravkai kasiamh nimei tei nang hamh e.

⁶Isaraelmei ta Izip khou rui kanpatlou rap khou rui thauna ntaw nganv ai Ravkai khou bam zat mak ge; ai pheykai khou rana bamna tat bammei tuang de.

⁷Ai rui Isaraelmei ta tat nchamcna bammei khou tei ai rui kadahloumei kapy nunc khou tei kaniw tabui swna akhang sidar tuang Ravkai kasiamhlou mak tu cho twna sa zat kan mak ge’.

⁸“Kumhpui zaeng rui Ngamparymei RINGHPOUC ai rui sa e twna abangc David khou kumna sa o, ‘Nang nwmbangc khou lauziu gaengc bammei khou rui ai rui nang ta kaw lana amei Isaraelmei tuang guangc tiswloumei tuang e.

⁹Nang rui tatloumei bamv kathuicna khou ai rui lamluailoumei tuang e, khatni nang hu khou zauczihmei guay ta tei zaw tisiloumei tuang e. Ai rui nang ta kandih khou daic liangmei kapy swmei akhat ta kumcna nang zanc titatlou puni.

¹⁰Ai rui amei Isaraelmei nunc khang kabamv khat kadahlouna mi khou tei tilungclou puni, mi khou tei meicsimei nunc rui rairiumei maekna lungc bam khang e.

¹¹Kaniw rui mi bamv khou tei gut rap khou rui thauna meicsimei nunc rui kaniw ta adow guang the, tiki mi kumhmei tei nai dat lak khe. Nangniw ta zauczihmei khou rui gaeklou puni, hei na hamhna RINGHPOUC rui nang khang nangkikta tiilou puni the twna latdyng swlou the.

¹²Nang theicna nang pu nangpouc pang khou mbeihlou kan pwkhou, ai rui nang nac mpouh gaanv khat ta guangh tiswlou puni kumna kaguanghdic tei titanclou puni.

¹³Kamei rui akhang Ravkai kasiamhlou puni kumna kaguanghdic tei ai rui tingsaengzaeng tinailou puni.

¹⁴Ai rui kapu sw puni kamei rui anac mpouh sw puni. Kamei rui nkhuaimei taanv taanc pwkhou, pu rui kanac mpouh ta riapmei kumc ai rui kata riap puni.

¹⁵Tiki ai rui Saul ta nkhavlou taanna nang ta guangh tiswloumei hei kumcna ai rui kata thu nkhavlou taan ni tuang hamh e.

¹⁶Nang tuang kikta nai tanh tan puni, kumna ai rui nang tuang guangcdic tingsaengzaeng tinailou puni. Nang tuang guangcbamvpaeng nai tanh tan bam puni.’ ”

¹⁷Nathan kamei rui Ravguangc rui kakhou dincloumei guay tei David khou dinclou the.

¹⁸Khoutei David tei RINGHPOUC ta kalummei pheykai thangc tatna dungc keyna kumna kalum the, “He kauh liangmei RINGHPOUC, nang rui akhang taancloumei hei ai ni akai kaikhunhmei ni biuhmei tuang hamh dyng e.

¹⁹He kauh liangmei RINGHPOUC, kum e tiki ntaw hei mi khang tei suangc sini mbumei taanv taanclou dat dyng he; atuang kikta khang latdyng ni swlou dat dyng he. Kumna nang rui hei tei meic nunc khou tihowlou the!

²⁰Ai rui nang khou tabui lat sa dat nina cho! Nang rui nang bangc ata thay e.

²¹Mi hei nang rui chwnmei khatni ningmei theilayna taancloumei tuang di the; ata nchamlou khang nang rui mi taanv daihmei guay hei taancloumei tuang di the.

²²He kauh liangmei RINGHPOUC, nang hei adih daic cho! Nang kumhmei baihmei maek ge; nang na hei Ravguangc e twmei aniw thay e.

²³Nang rui bangh khou rui thuak patlouna nang tuang mei nunc tiswloumei Isaraelmei zaat kumhmei zaatc baihmei kandih nam ruc khou maek ge. Nang rui kaniw khang taancloumei taanv daihmei tei rui nang zanc kandih kapwm chu lik kan the. Nang mei nunc gut pwkhou, zaatc baihmei khatni kaniw tuang rav guay ta tei nang rui alay ganc the.

²⁴Nang rui Isaraelmei ta tingsaeng nang tuang mei sw khang swlou the, kumna RINGHPOUC nang rui kaniw tuang Racguangc sw the.

²⁵“He RINGHPOUC Ravguangc, ntaw thu nang rui alam khou khatni atuang kikta nunc lam khou latdyng swloumei tei kaganv kathuicna khou tiguang nthuihlou o, kumna nang rui swlou ni twna nrianhloumei tei tiguang tangclou o.

²⁶Nang zanc tei daicna bam puni kumna ‘Ngamparymei RINGHPOUC hei Isarael Racguangc e’ twna meic nunc rui tingsaengzaeng sa bam puni. Nang rui atuang guangcbamv tingsaengzaeng tinai bam puni.

²⁷He Ngamparymei RINGHPOUC, Isarael tuang Racguangc! Mi ravsuai hei ai baucna suaihpui tuang e, kalam thu nang rui mi guay hei akhou ndauhlou the kumna atuang kikta rui guangh swna bam puni twna nang bangc akhou dinclou the.

²⁸“He kauh liangmei RINGHPOUC, nang hei Ravguangc e; nang tuang latdyng kalaic zat mak ge, kumna mi charynmei latdyng hei akhou swlou the.

²⁹Akikta guay hei nang tuang zauzian laatowna bam kan khang ntaw kaniw ta suaihiamlou o twna ai huay e. He kauh liangmei RINGHPOUC, nang rui mi hei nrianhlou the, kumna nang tuang suaihiam hei akikta guay khou tingsaengzaeng nai bam ni muay the.”