Read Rongmei Naga 2 SAMUEL 9 Bible Online

2 SAMUEL 9 - Rongmei Naga bible

2 SAMUEL 9

¹“Saul kai kaikhuncmei ringc bammei thowkumhmei nai bu cho? Nai e thei, Jonathan zaeng khang rui ai kakhou zauzian taanv taanclou nii e” twna David rui kakhi the.

²Khoutei Saul kai kaikhuncmei bangc Ziba twna kawmeipu gaanv khat nai bam khwan e. Kata tei David daeng khou kaw guang the. “Nang Ziba cho?” twna David rui thanv the. “Ngguay kiuc e” twna kamei rui daw the.

³Khoutei guangh rui kakhou thanv the, “Saul kai kaikhuncmei ringc bammei thowkumhmei nai bu cho? Ai rui Ravguangc khou nrianhlou kanmei theilayna kakhou nzianmei taanv taanclou nii e.” Ziba rui daw the, “Jonathan nac mpouh gaanv khat nai e. Kamei thu kaphay kanei chuanchayna tat thay mak khe.”

⁴“Kamei tabui thangc bamna cho?” twna guangh rui thanv the. “Lodebar khou Ammiel nac mpouh Makir kai khou bam e” twna Ziba rui daw the.

⁵Khoutei David rui meic thouclouna Makir kai khou rui kadaeng khou nduangh guang the.

⁶Jonathan nac mpouh Mephiboshet tei guangh David daeng khou guang pwkhou nkhum laamvkeyna kalum the. David rui “Mephiboshet” twna kaw tikhou kamei rui “Ngguay, nang bangc ai e” twna kamei rui daw the.

⁷David rui sa the, “Nang ping riu. Nang pu Jonathan zaeng khang rui ai rui nang khou zauzian taanv taanclou nii e. Nang pouc Saul tuang ramv guay tei ai rui nang khang tii puni the kumna nang atuang kuakpaeng khou guang tu kariu tanh tan bam nina the.”

⁸Mephiboshet rui nkhum key datna sa e, “Theihmei si kumhmei ata tabui swna heidi nzianlou bam nina cho?”

⁹Khoutei David rui Saul bangc Ziba ta kaw guangna sa the, “Ai rui nang kaipouc Saul tou Mephiboshet khang Saul khatni kakai kaikhunc tuang ramv kaguayna tei tiilou puni the.

¹⁰Nang, nang nac mpouh nunc khatni nang bangc nunc rui nang kaipouc Saul kai kaikhunc khang kakai tuang ramv khou tei kailau taancna kaniw ta makuat nina the. Tiki Mephiboshet kamei thu atuang gin swna bam tanh tan nina e.” (Ziba tei kanac mpouh gaanv 15 khatni kabangc gaanv 20 nai khwan e.)

¹¹“Guangh tuang latdanv guay ai piu ni” twna Ziba rui daw the. Kumna Mephiboshet tei guangh nac akhat kumcna guangh tuang kuakpaeng khou tu kariu the.

¹²Mephiboshet tei kanac mpouh alauc kazanc Mika twmeipu gaanv khat nai khwan e. Ziba kai kaikhuncmei guay Mephiboshet bangc sw the.

¹³Kumna kaphay kanei chuanchaymei Mephiboshet tei guangh tuang kuakpaeng khou tuna Jerusalem khou lungc the.