Read Rongmei Naga 1 GUANGH NUNC 1 Bible Online

1 GUANGH NUNC 1 - Rongmei Naga bible

1 GUANGH NUNC 1

¹Ntaw thu guangh David tei gaanvthaih sih the, kumna kabangc nunc rui pheyguan baanvlouna bam sini kamei lumc ngam mak khe.

²Kumna katuang meicdaihmei nunc rui kakhou sa the, “Guanghle, nang daeng khou bamna nang siamruai sw bam khang aniw tunac gaanv khat phu guang pum e. Kamei rui nang ta zip nduangh lumc bam khang e.”

³Kalwn gaymei tunac ta Isarael kandic kapwmna khou phu the, kumna Shunem khou Abishag twna kawmeipui ta phutow the, kumna kata tei guangh daeng khou nduangh guang the.

⁴Mipui tei kalwn gay e. Kamei guangh siamruai swna guangh daeng khou bam the, tiki guangh rui kakhou thu tatlou mak ge.

⁵Absalom tei theic kan the, kumna Haggit rui puanhmei Adonija rui karana ta ningkauh lana “Ai rui guanghtu puni” twna sa khwan e. Kumna kamei rui takuanh gari khatni takuanh nunc maansei 50 lev chamdaanv the.

⁶Kapu rui kata “Nang swbammei thiak hei tabui tuang cho” twna thanvna kata khat sini lungning sw katuakclou zat mak khwan e. Kamei hei kalwn kachav gaymeipu akhat re. Absalom tangv thu kamei di the.

⁷Kamei rui Zeruia rui puanhmei Joab lev amuh Abiathar khou mi lam khou tei kachuc pwkhou kaney rui kata matung ni the twmei nuh the.

⁸Tiki amuh Zadok, Jehoiada nac mpouh Benaia, amuh Nathan, Shimei, Rei, khatni David tuang rigaanv guay rui thu Adonija biak liangh mak khe.

⁹Zaeng neih khat Adonija tei Enrogel duipuakkai daeng khou naimei Nrui Taucdaic khou lauziu, guaichic, khatni kameigaymei guaihnac pang khaeng khwan e. Mi ravkhaengmei taektw tei tu khang kamei rui David nac mpouh nunc khatni Judamei David tuang meicdaihmei nunc ta kaw khwan e.

¹⁰Tiki kamei rui kachana Solomon, amuh Nathan, Benaia khatni guangh tuang rigaanv nunc ta thu kaw mak khwan e.

¹¹Khoutei Nathan rui Solomon pui Bathsheba daeng thangc tatna sa the, “Haggit nac mpouh Adonija tei karana kata guangh suang kan the twmei nang chu mak hena cho? Guangh David rui mi lam khou tei khat na sini thay mak khwan e.

¹²Nang rui nang panty khatni nang nac mpouh Solomon tuang panty ta kan nii e thei ai lat dinclou puni,

¹³nang katumcna guangh David daeng thangc tatna, ‘Guanghle, anac Solomon rui nang phaan guanghtu puni twna nang akhou nthukmei latryan sw kan tuang hamhna cho? Kum e tiki akumhna Adonija rui guangh sw bam tu cho?’ twna sa o.”

¹⁴Nathan rui sa dat re, “Nang rui guangh lev kachuc bammei ganv khou ai guangna nang rui sa bammei tei kaling the twmei salou puni.”

¹⁵Kumna Bathsheba tei guangh ta ariw khang guangh zybamv khou gut the. Kamei tei gaanvthaih sih the kumna Abishag rui kasiamruai sw bam khwan e.

¹⁶Bathsheba rui nkhum keyna guangh ta kalum the. “Nang tabui kahawna cho?” twna guangh rui thanv the.

¹⁷Bathsheba rui daw the, “Guanghle, nang tangv anac Solomon rui guangh sw puni twna nang rui RINGHPOUC nang tuang Racguangc zanc khou nthukmei latryan sw kan the.

¹⁸Tiki Adonija rui guangh sw kan the, hei tei nang thu thay mak ge.

¹⁹Kamei rui lauziu, guaihtuamchic, khatni kameigaymei guaituamnac mpeyna khaengna mi khou tei nang nac mpouh nunc, amuh Abiathar, khatni nang tuang rihpy Joab kaniw ta tu zangv khang kaw kan the, tiki nang nac mpouh Solomon ta thu kaw kan mak ge.

²⁰Guanghle, thow rui nang phaan guanghtu nina cho twmei nang rui sa pat pwmei ta Isaraelmei guay nkhwanna bam the.

²¹Nang rui hei tei salou mak ge thei nang theic kan pwkhou anac Solomon aney ta thu guangh tuang zauczihmei tisw puni the.”

²²Kamei kumna sa bam khou Nathan guangh kai khou guang the.

²³Muhzwng guang e twna guangh khou dinclou the, kumna Nathan guangh ta nkhum keyna kalum the.

²⁴Khoutei kamei rui sa the, “Guanghle, Adonija rui nang phaan guanghtu lyn puni the twna nang rui kauc pat thena cho?

²⁵Aseic hei kamei guaihtuamchic, lauziu, khatni kameigaymei guaituamnac mpeyna khaeng kan the. Kamei rui nang nac mpouh nunc, nang tuang rihpy Joab, khatni amuh Abiathar kaniw ta kawna ntaw hei kaniw tu zangvna ‘Guangh Adonija ringcsaengc kan diu!’ twna kauc bam the.

²⁶Tiki Guanghle, kamei rui amuh Zadok, Benaia, Solomon aniw ta thu kaw mak ge.

²⁷Nang rui nang phaan thow rui guanghtu lyn nina cho twmei nang tuang meicdaihmei nunc khou nganvna dinclou makna mi hei guangh rui nuhlou ti thena cho?”

²⁸Guangh David rui sa the, “Bathsheba ta gut ro twna sa o.” kamei gutna guangh hu khou ding the.

²⁹Khoutei guangh rui kakhou sa the, “Akhang kunghmei bamv guay khou rui ata kanloumei RINGHPOUC zanc saancna ai latryan sw e twmei thu

³⁰nang nac mpouh Solomon rui aphaan guanghtu puni twna RINGHPOUC Isarael Racguangc zanc khou ai rui latryan swlou kanmei tei aseic hei taanclou puni the.”

³¹Bathsheba tei nkhum keyna kalumna sa the, “Apoubauhmei guangh tingsaengzaeng ringc bam kan diu!”

³²Khoutei guangh rui Zadok, Nathan, khatni Benaia ta kaw the. Kaniw tei guang pwkhou

³³guangh rui kaniw khou sa the, “Atuang peikai tuang baanhza guay ta tei nduanghna, anac mpouh Solomon ta atuang takuanc khou tidungcna Gihon duipuakkai thangc tei nduangh key tho,

³⁴kumna mi khou tei Zadok lev Nathan rui kata Isaraelmei tuang guangc khang thauh teylou nina e. Kumna bianggun amuan lana ‘Guangh Solomon, ringcsaengc o!’ twna kauc nina e.

³⁵Kamei rui mi khou hei atuang guangcbamv khou dungh khang guang dat pwkhou nangniw kathei lay guang nina e. Kamei rui aphaan guanghtu lyn puni, kalam thu kamei hei Isarael lev Juda tuang guangc khang ai rui kadahloumeipu the.”

³⁶Benaia rui daw the, “Hei tei taanc puni the, kumna RINGHPOUC nang Racguangc rui hei tei sw ntiplou pw di tho.

³⁷RINGHPOUC rui guangh ta nkhavloumei kumc, Solomon ta ni nkhavlou diu tho, kumna kaguanghdic tei nang guanghdic suangc daic mbu thau kan di tho.”

³⁸Kumna Zadok, Nathan, Benaia khatni guangh tuang ricmei nunc rui Solomon ta guangh tuang ricmei nunc rui Solomon ta guangh David tuang takuanc khou tidungclouna Gihon tuang duipuakkai khou nduangh key the.

³⁹Zadok rui Olive thauc haan RINGHPOUC ta kalummei pheykai khou rui laa lana phungc tatna Solomon khou teylou the. Kaniw rui bianggun amuan pwkhou “Guangh Solomon ringcsaengc o!” twna meic nunc rui kauc the.

⁴⁰Mi tangv tei kaniw alim amuanna, neihlana kandih kauc kachyn liuh liuna kathei lay guang the.

⁴¹Adonija khatni kamei rui kaw guangloumei guay tei tu tang zangv tang pwkhou meic nunc rui kauc bammei khwan tei chu the. Bianggun khwan chu pwkhou Joab rui sa the, “Kaidai thangc heidi kachin karo bammei hei tabui tuang cho?”

⁴²Kamei sa luai mak khou amuh Abiathar nac mpouh Jonathan guang the. Adonija rui sa the, “Guang o, nang hei meicgaymei e, kumna nang gay chamv phungc guang tuang kan the.”

⁴³Jonathan rui daw the, “Ai sa rouh mak khe.” “Guangh David rui Solomon ta guangh tiku kan the.

⁴⁴Kata suanc tat khang Zadok, Nathan, Benaia khatni guangh tuang rigaanv nunc ta thouclou the. Kaniw rui kata guangh tuang takuanc khou tidungclouna

⁴⁵Zadok lev Nathan rui Gihon duipuakkai khou guangh khang thauh teylou kan the. Kaniw neihlana kaucna kaidai khou gut the kumna meic nunc tei kachin karo bam tuang e. Nangniw chumei khwan tei mi khwan tei the.

⁴⁶Solomon tei ntaw thu guangh di the.

⁴⁷Heina hamh e, peikai tuang baanhza guay rui guangh David ta kalum khang guangna ‘RINGHPOUC nang Racguangc rui Solomon ta nang ta suangc sini kazanc tatmei tiswlou pw di tho khatni Solomon tuang guanghdic hei nang tuang guanghdic suangc sini daicthau bam kan di tho,’ twna suaisamhlou kan the. Khoutei Guangh David tei kalaeng khou nkhum keyna

⁴⁸huayneyna sa the, ‘He RINGHPOUC, Isarael Racguangc, akikta gaanv khat ta aphaan guangh tikuloumeipu, hei tei amik kahak rui how khang tiiloumeipu ta aniw thuanc e!’ ”

⁴⁹Khoutei Adonija tuang ngai khou tei guangmei guay tei ping the, kaniw guayna tei thau lana kanyng kanyng swna tat kan the.

⁵⁰Adonija tei Solomon ta ping langv lana RINGHPOUC tuang pheykai thangc tatna ravchapaeng chei hou the.

⁵¹Adonija tei pingna ravchapaeng chei koucna bam the, kumna “Guangh Solomon rui ata swluai lak ge twmei latryan swloumei ta kahaw e,” twna kamei rui sa e twna guangh Solomon khou poulou the.

⁵²Solomon rui daw the, “Kamei rui abangc khou bam pw e thei, kasamlu akhat na sini kahilou lak ge; kum mak ge thei kamei theic puni.”

⁵³Guangh Solomon rui Adonija ta kaw khang thouclou the kumna kata ravchapaeng khou rui nduangh key the. Adonija tei guangh hu khou guangna nkhum keyna kalum the, khoutei guangh rui sa the, “Nang kai tat dat nuh the.”