Read Rongmei Naga 1 GUANGH NUNC 10 Bible Online

1 GUANGH NUNC 10 - Rongmei Naga bible

1 GUANGH NUNC 10

¹Solomon zanc dinc kachynna bammei tei Shebamei liammavpui rui chu lana kamei rui Solomon ta kungh kunghmei lat tam khang Jerusalem khou guang the.

²Kamei rui katuang mei kangdai khatni maruai, kunghmei tauc, khatni kachaekc phunghmei guaikuan mpeyna nduangh guang khwan e. Kamei Solomon ta ariw pwkhou kamei rui ning patmei lathanv guay thanv the.

³Solomon rui mi guayna tei kunghmei tuang maekna daw the.

⁴Shebamei liammavpui tei rui Solomon tuang ningting tei thay the khatni kamei rui kasiamhloumei guanghkai tei how the.

⁵Solomon rui tu bammei taektw tei kamei how the. Katuang meicdaihmei nunc lunghmei kai guay, guanghkai khou taanv sw bammei thiak, kaniw tuang pwanrai, khumngai khou tamthiwmei nunc, khatni kamei rui Ravkai khou khaeng bammei hei guay tei kamei how pwkhou kamei hahlahla the.

⁶Kamei rui guangh Solomon khou sa the, “Nang tuang taanv khatni ningting lam khou akandih thangc chu guangmei tei kaling dyng the!

⁷Ai amik kahak rui guangna how mak saanv ai lwm mak khwan e. Ai chumei tei thu kapaek na sini chu tangh mak bu di he; nang tuang ningting khatni nang tuang lanv hei akhou racloumei suangc mbu taph tap bam the.

⁸Nang tuang mei guay hei adih sangaymei nunc cho? Nang daeng khou bamna nang tuang ningting lat guay hei chu towna bammei nang bangc nunc tei adih sangaymei nunc cho?

⁹RINGHPOUC nang Racguangc ta thuanc e. Kamei rui nang ta Isaraelmei guangc tiswloumei hei rui kamei nang ta adih nzianlou cho twmei lyanlou the. Kamei rui Isaraelmei ta taek makna nzianlou bammei zaeng rui nang rui kariak nchumhna kandih sin khang nang ta Isaraelmei guangc tiswlou the.”

¹⁰Kamei rui phungc guangmei kachaekc kilogram 4000 suangc mbumei khatni kunghmei tauc khatni maruai mpeyna tuang kaipat guay tei guangh Solomon khang tiilou the. Mi nungc phungc guangmei maruai tei kamei rui laatow guangmei pang khou geic liangmei khwan the.

¹¹(Ophir khou rui kachaekc phungc guangmei Hiram tuang rungh pang tei rui mi thangc tei rui Junipar thing khatni kunghmei tauc mpeyna phungc guang khwan e.

¹²Solomon rui mi thing tei Ravkai khatni guanghkai tuang kaisangh raengv khang kasiamh khwan e. Hei tei rui ludowmei nunc tuang nrah khang ni kasiamhlou khwan e. Hei tei Isarael khou phungc guangmei gay liangmei junipar thing khwan e; hei tei kumhmei how zat kan mak he.)

¹³Karam lunggai theilayna kalung daicna Solomon rui kaipat guay ruc khou rui Shebamei liammavpui rui neymei guay tei ni tiilou khwan e. Mi tangv tei kamei khatni kathei laymei guay tei Sheba kandic thangc tat dat the.

¹⁴Tingkwm pum kachaekc kilogram 23,000 dou guangh Solomon khang tii guang tanh tan khwan e.

¹⁵Hei tei lanvguanhmei nunc rui dihkhav swna tii guangmei khatni Arabmei guangc nunc khatni Isaraelmei ramv langv kaipouc nunc rui dihkhav tii guangmei guay tei kazauh mak ge.

¹⁶Solomon rui nggih daihmei 200 kasiamh khwan e, kumna nggih akhat khat tei kilogram chanei dou nritmei kachaekc rui kasiamh e.

¹⁷Nthyam maihmei nggih 300 ni kasiamh khwan e, kumna mi guay tei akhat khou kilogram kanei dou nritmei kachaekc rui lup khwan e. Kamei rui mi guay tei Lebanon tuang ngouc twna kawmei kailangv daihmei khou tei lou khwan e.

¹⁸Kamei rui guanghbamv daihmei akhat ni kasiamh khwan e. Hei tei kalangv asaekc khou guaipuang nei lou khwan e, kumna baihmei guay tei gay liangmei kachaekc rui kasiamh khwan e.

¹⁹Guanghbamv khou tei phaykhuat charuk louku khwan e. Guanghbamv tuang katwan thei biak khou tei guaihtuamchic py maengc nai e. Guanghbamv kathuic khou tei baanhpwam nai e khatni mi khou tei kamangliangpui maengc lou khwan e.

²⁰Phaykhuat charuk tuang baanzat-baandau khou tei kamangliangpui 12 tidinglou khwan e. Mi kumhmei tei guangdih akhat na khou sini maek ge.

²¹Solomon tuang zangv nimei buangh guay tei kachaekc rui kasiamh e khatni “Lebanon Ngouc Kai” khou tei loumei taanv na guay tei kachaekc rui kasiamh e. Daandi akhat na sini piu mak ge kalam thu Solomon ganv khou tei daandi hei kamanv kunghmei puat re twna laa mak ge.

²²Hiram tuang rungh pang lev Solomon tuang duipui khou tatmei rungh pang nai khwan e. Tingkwm kathumh pum katuang rungc guay tei kachaekc, daandi, guaipuang nei, zoucdaihmei khatni zouc mpeyna phungc guang raph rap khwan e.

²³Guangh Solomon tei guangh guay pang khou rui lungcgayliang khatni ningtyngliang khwan e,

²⁴kumna Ravguangc rui kakhou tiiloumei ningting tei kandihmei guay rui nking niina guang nking bam khwan e.

²⁵Kakhou guangmei guay rui daandi, kachaekc, pheybaan, rih na, maruai, takuanh, takuanh nthyammei mi guay hei kaipat swna phungc guang bam khwan e. Heikumna tingkwm mpeyna tat key bam khwan e.

²⁶Solomon rui takuanh gari 1400 khatni rih takuanc 12,000 tuang ricmei kang kasiamhlou khwan e. Mi guay tei asaekc rui Jerusalem khou khatni baihmei guay rui kaidai baih baihmei khou lou khwan e.

²⁷Solomon rui guangh sw bammei ganv khou daandi hei Jerusalem khou ntauh kumc mphamh khwan e khatni sidar thing hei mphamh mphahna nai khwan e.

²⁸Solomon tuang takuanc guay tei Izip khatni Silikia thangc rui guangh tuang lanvguanhmei nunc rui phungc guang khwan e.

²⁹Izip thangc rui takuanh gari ni liu khwan e. Gari akhat khou daandi paek 600 khang khatni takuanh rui 150 khang liu khwan e. Kaniw rui Hittimei khatni Siriamei guangc khang mi guay tei zuanc dat bam khwan e.