Read Rongmei Naga 1 GUANGH NUNC 11 Bible Online

1 GUANGH NUNC 11 - Rongmei Naga bible

1 GUANGH NUNC 11

¹Solomon rui zaatc baihmei luc mpeyna ta nzian khwan e. Izipmei guangc nac aluhpui ta na hamhna Hittimei, Moabmei, Ammonmei, Edommei khatni Sidonmei luc nunc ta ni kanow khang laa khwan e.

²Mi zaat nunc hei lev nggyang nuh mak ge, kum e thei kaniw ta ravmaengc khou zaylou puni twna RINGHPOUC rui kaniw khou latdanv tiilou sini kamei hei tei liamna taanc the.

³Solomon rui guangh nac aluh 700 ta kanow khang laa khwan e, mi ruc khou rui laamvnow 300 ni nai khwan e. Mi nunc tei rui kata Ravguangc khou rui tiduc pat the,

⁴kumna kamei gaanvthaih key pwkhou kanow nunc tei rui kata zaatc baih baihmei rav ta tikalumlou khwan e. Kamei tei kapu David kumcna RINGHPOUC kaRacguangc khou lwmnuhmei sw kan mak khwan the.

⁵Kamei rui Sidonmei tuang ravpui Astarte khatni meic chanymei Ammonmei tuang rav Milkom ta kalum khwan e.

⁶Kamei RINGHPOUC ruc khou paapc taanc khwan e kumna kamei kapu David kumcna lwmnuhmei sw mak khwan e.

⁷Chanymei Moabmei tuang rav Kemos khatni Ammonmei tuang rav Milkom ta kalummei bamv Jerusalem tuang neihpat khou naimei chyngbut khou kasiamhlou khwan e.

⁸Hei tei kumcna zaatc baihmei luc nunc tei rui katuang katuang rav khou agaw nteina khatni khaengna kalum khang Solomon rui kabamv kasiamhlou khwan e.

⁹RINGHPOUC rui Solomon ruc khou lunghpuamc the, kalam thu kakhou lyanlouliang kanei khwanmei Isaraelmei RINGHPOUC Ravguangc khou rui kalungning mbianghpat khwan the,

¹⁰khatni rav baihmei ta kalum tat nuh mak ge twmei lam khou latdanv tiilou khwan e; tiki kamei rui RINGHPOUC lat piulou mak khe.

¹¹Heikumhpui zaeng rui RINGHPOUC rui Solomon khou sa the; “Nang rui anei kak khou swloumei latryan tei sw bak ni twna sw bak lana alat liam the. Kumhpui zaeng rui ai nang tuang guangcdic tei nang khou rui laa datna mi nang bangc gaanv khat khou tiilou kan puni the.

¹²Tiki nang pu David zaeng rui, hei tei nang ringc bam khou changh thu taanclou lak khe, tiki nang nac mpouh hak khou pat puni the.

¹³Guanghdic kapwm tei thu kakhou rui laa pat lak ge; abangc David khatni atuang swloumei Jerusalem kaidai zaeng rui kaikhwang akhat thu kakhang ganclou duc puni.”

¹⁴Kumna RINGHPOUC rui Edommei guangckai kaikhwangmei Hadad rui Solomon ta zauczih khang tiswlou the.

¹⁵Kahu nungc David rui Edommei ta adowmei ganv khou katuang ricpy Joab theihmei ta mbeih khang nganghmei khou tei kamei rui mi bamv khou nggaanvmei guay ta swluai khwan e.

¹⁶Joab khatni Isaraelmei guay tei mi bamv khou tei bw charuk Edommei nggaanvmei guay ta dowluaipary mak saanv bamlou khwan e.

¹⁷Tiki Hadad lev kapu bangc Edommei gaanvsaekc lev twna thu Izip kandic thangc pakduak khwan e. (Mi douc tei Hadad tei angana bam khwan e.)

¹⁸Kaniw Midian kandic mpatlouna Paran thangc tat the, hei khou tei meic gaanvsaekc ni kaniw pang khou lay kazauhlou the. Mi tangv tei kaniw Izip kandic thangc keyna Izip guangc daeng khou guang pwkhou guangh rui kakhang ramv, kai khatni taektw tii the.

¹⁹Hadad tei Izipmei guangc lev giang sw the kumna guangh tei rui Liammav Tahpenes swanrey, kapuinau ta Hadad now khang tii the.

²⁰Mipui tei rui kanac mpouh Genubat ta puanclou the. Mipu ta tei liammav tei rui guanghkai khou makuat thauna guangh nac mpouh nunc lev daicthau nchamc the.

²¹David khatni katuang ricpy Joab theic the twmei chamv Izip kandic khou Hadad khou chu guang pwkhou Hadad rui guangh khou “Ai akandic thangc tat dat kan ni the,” twna sa the.

²²Guangh rui kakhou sa the, “Tabui swna nang tat dat nina cho? Ai nang khang ramh tii ntangh makmei tuang nai bu thena cho? Nang kai tat dat nimei kiu nang khang pian makmei tuang nai bu thena cho?” “Titat rap di tho,” twna Hadad rui sa the. Kumna kamei kakandih thangc tat dat kan the.

²³Ravguangc rui Eliada nac mpouh Rezon ta ni Solomon ta tizauczihlou the. Rezon tei kakaipouc Zobamei guangc Hadadezer khou rui pak tatna

²⁴kariak twanmei pang akhat tuang kapy sw the. (Mi hei David rui Hadadezer ta rihngamna kamei lev akhat na swmei Siriamei guay ta swluaimei tangv pat kan tuang e.) Rezon khatni katuang mei guay tei Damaskas thangc tatna lungc the, kumna kamei nunc rui kata Siriamei guangc tiswlou the.

²⁵Kamei tei Solomon ringh saanv Isaraelmei ta zauczihmeipu sw khwan the.

²⁶Guangh Solomon ta zauczihmei gaanv khat dat rui katuang meicdaihmei Jeroboam khwan e. Jeroboam hei Ephraimmei kandic khou Zereda kaidaimei Nebat nac mpouh khwan e. Kapui Zerua tei amaypui khwan e.

²⁷Kamei rui guangh ruc khou rih thaumei tuang pary kiu mi hei the. Solomon tei Jerusalem neihpat biak kandic tei thwanna raeng katamv datna bam khwan e.

²⁸Jeroboam tei ramh ngammei chabwan akhat khwan e. Kamei taanv adih ranvna taanvtaanc cho twmei Solomon rui how lana Manase lev Ephraim ramv khou bammei namna taanv titaanhmei ta sigay zauhmeipu khang kakhou tiilou khwan e.

²⁹Zaeng neih khat Jeroboam tei Jerusalem khou rui mi bamv thangc tei karana tat bammei chaengkaamv khou Shilo khou bammei muhzwng Ahija rui kata chaengkui khou ramvpuk khou ariw khwan e.

³⁰Ahija rui kamei nu bammei thiula saenghmei kathanc tei kakiak 12 khang siatkaek pat lana

³¹kamei rui Jeroboam khou sa the, “Kakiak ruh hei nang khang laa tho, kalam thu RINGHPOUC Isaraelmei Racguangc rui nang khou sa the, ‘Ai rui guanghdih tei Solomon khou rui laa pat puni the, kumna nang khang kaikhwang ruh tii puni the.

³²Solomon khang kaikhwang akhat ganclou duc puni, hei tei abangc David khatni Isaraelmei kandic kapwm khou rui akhang twna kadahloumei Jerusalem zaeng rui e.

³³Ai rui mi hei swloumei thu Solomon rui ata ganc patna zaatc baih baihmei rav Sidonmei ravpui Astarte; Moabmei rav Kemos, khatni Ammonmei rav Milkom ta kalum tatmei zaeng rui e. Solomon rui alat liam the; kamei nkhuaimei taanv taanc the kumna kapu David kumcna kamei alatdanv guay piu mak khe.

³⁴Tiki Solomon khou rui guanghdic kapwm tei thu laa pat rap lak ge, kumna kamei ringc bam saanv thu ngamv tei kakhou lou bam puni. Mi hei ai rui kadahloumei alatdanv piumei abangc David zaeng rui e.

³⁵Solomon nac mpouh khou rui guanghdih tei laana ai rui nang khang kaikhwang ruh tiilou puni.

³⁶Tiki ata kalummei bamv khang ai rui kadahloumei Jerusalem khou abangc David kikta rui guangh sw tanh tan bam khang kaikhwang akhat ta thu Solomon nac mpouh baanc khou lou puni.

³⁷Jeroboamle, ai rui nang ta Isaraelmei guangc tiswlou puni, kumna nang rui kahawmei kandic khou tei nang ta guangh tiswlou puni the.

³⁸Nang rui alat piu nthuihna, alatdanv theilayna lungcna alung tikwnna abangc David kumcna lungc e thei, ai nang ta lamluai tanh tanlou puni. Ai rui nang ta Isaraelmei tuang guangc tiswlou puni, kumna ai rui David khang swloumei kumcna nang khang ni guang nimei ganv thangc nganvna nang kikta rui guangh sw tanh tan bam khang swlou puni.

³⁹Solomon tuang paap zaeng rui ai rui David kikta ta dandi tii puni the, tiki hei tei tingsaengzaeng khang thu hamh e.’ ”

⁴⁰Kumna Solomon rui Jeroboam ta swluai khang karamc the tiki kamei Izipmei guangc Shishak daeng thangc paklouna duak the. Kamei mi khou tei Solomon theih mak saanv bamlou khwan e.

⁴¹Solomon rui taancloumei, kapanty khatni kaningting mi guay hei Solomon tuang panty pary buk khou hylou the.

⁴²Kamei Isaraelmei guayna guangc swna Jerusalem khou tingkwm 40 lungclou khwan e.

⁴³Kamei theic the kumna David kaidai khou mbeihlou the, kumna kanac mpouh Rehoboam rui kaphaan guanghtu lyn the.