Read Rongmei Naga 1 GUANGH NUNC 12 Bible Online

1 GUANGH NUNC 12 - Rongmei Naga bible

1 GUANGH NUNC 12

¹Rehoboam kata guangh tiswlou khang dihpy biak thangc bammei Isaraelmei guay guang kaduai bammei bamv Sekem khou tei kamei guang the.

²Nebat nac mpouh Jeroboam, guangh Solomon ta pingna Izip thangc pak tat kanmeipu tei mi chamv tei chu lana kamei Izip thangc rui guang dat the.

³Dihpy thangc bammei kaikhwang guay rui kata kaw the, kumna kaniw guayna Rehoboam daeng thangc tatna kakhou sa the,

⁴“Nang pu Solomon rui aniw khou puatrith tiphungclou the. Nang rui mi puatrith tei sw nthaanlou pw e thei aniw nang mei sw chuyna lungc bam ni e.”

⁵“Zaeng neih thumh tangv guang dat pu o, mi khou kiu nangniw khou dawlou dat puni,” twna Rehoboam rui daw the. Kumna kaniw guay tat dat kan the.

⁶Guangh Rehoboam tei kapu Solomon tuang latdinhpouc nunc swloumei gaanvthaih nunc khou thanv the. “Mi nunc khou tei tabui lat daw ti kho cho?” twna kamei rui kaniw khou thanv the.

⁷Kaniw rui daw the, “Nang rui mi nunc tuang siamruai hei sw chuyna swlou nii e thei kaniw rui kahawmei tei taanclou ni twna daw chuyna dawlou tio, kum ti thei kaniw nang ta nzianna nang siamruai sw bam puni.”

⁸Tiki Rehoboam rui gaanvthaih nunc lat tei laa mak khe, kumna kamei lev daicthau nchamcmei chabwan nunc ntaw katuang latdinhpouc nunc swna bammei nunc khou tei thanv the.

⁹“Kaniw tuang puatrith sw nthaanlou o twna sa bammei nunc khou tei tabui lat sa daw ti kho cho?” twna kamei rui kaniw khou thanv the.

¹⁰Khoutei kaniw rui daw the, “Nang rui kaniw khou ‘Abaanc zungngiatna hei apu sian suangc daic e!’

¹¹‘Apu rui nangniw khou nritmei puat mphunlou the; ai rui mi khang tei suangc ti-nritlou puni. Kamei rui nangniw ta builwang rui kathamv the; tiki ai rui nangniw ta kuanri riang rui bai puni!’ twna sa tio.”

¹²Zaeng neih thumh tangv meic nunc lev Jeroboam tei guangh Rehoboam daeng khou kamei rui nrianhloumei theilayna guang dat the.

¹³Guangh tei rui gaanvthaih nunc tuang lat tei thouh swlou makna meic nunc khou tei lat tancna sa the.

¹⁴Chabwan nunc tei rui sa tio twna samei tei kumcna kamei rui kumna sa the, “Apu rui nangniw khou nritmei puat mphunlou the, mi khang tei suangc nritdianghmei puat ai rui nangniw khou mphunlou puni. Kamei rui nangniw ta builwang rui kathamv e; ai rui kuanri riang rui bai puni!”

¹⁵Shilomei muhzwng Nebat nac mpouh Ahija rui Jeroboam khou saloumei tei tiguang tanghmei hei RINGHPOUC rui ningmei khwan e. Kum timei zaeng rui guangh tei meic nunc rui samei tei laalou mak khe.

¹⁶Guangh tei rui kaniw rui samei tei chulou ni tuang hamh the twmei how lana kaniw rui kauc the, “David khou aniw tuang dam tabui naina cho? Kakai kaikhunc tei key kan di tho! kaniw rui aniw khang tabui taancloumei tuang naina cho? Isaraelmei guayle, aniu kai tat dat kan di kho! Rehoboam karana kakhang na lungc bam kan di tho!” Kumna Isaraelmei tei kaniw kai thangc tat dat kan the.

¹⁷Rehoboam ta tei Juda kandic khou lungc bammei nunc tuang guangc khang na ganclou duc the.

¹⁸Namna taanvtaanhmei nunc ta sinmeipu Adoniram ta Rehoboam rui Isaraelmei nunc daeng khou thouc guang the, tiki Isaraelmei rui kata ntauh kwam luai the. Mi khou tei Rehoboam tei chadi chadana katuang takuanc gari tuangcna Jerusalem thangc pak tat kan the.

¹⁹Mi khou tei rui thauna dihpy biak thangc mei Isaraelmei tei David kaikhwang mei ta zauczih tat kan the.

²⁰Jeroboam tei Izip thangc rui guang dat the twmei Isaraelmei nunc tei chu pwkhou, kaniw rui kata Isaraelmei guay lat kaphianh khang guang bammei bamv khou kaw guang the, kumna kata Isaraelmei tuang guangc tiswlou the. Juda kaikhwang mei na rui David kiktamei thei lay khwan the.

²¹Rehoboam tei Jerusalem khou guang tangc lana Juda khatni Benjaminmei ricphyan gay liang liangmei 1,80,000 khuam kaduai the. Kamei rih keyna dihpy thangc mei Isaraelmei ta ni sin dat khang ning khwan e.

²²Tiki Ravguangc mei Shemaia khou Ravguangc lat guang khwan the.

²³Solomon nac mpouh guangh Rehoboam khou khatni Juda kaimei guay khou, Benjamin khatni meic nai na khou kumna sa o;

²⁴RINGHPOUC rui kumna sa e, “Nangniw chana punav swmei Isaraelmei nunc ta nangniw adow nuh mak ge. Nangniw meic guayna kakai kakai hanc dat tho. Pat bammei hei ai rui ningmei e.” Kaniw guayna tei RINGHPOUC tuang latdanv piuna kakai kai tat dat kan the.

²⁵Ephraim tuang chyngramv khou naimei Sekem kaidai tei Isaraelmei guangc Jeroboam rui raengh raenglouna bam kanaklou khwan e. Mi tangv tei kamei tat dat lana Penuel kaidai tei raengh raeng datna bam khwan e.

²⁶Jeroboam rui heikumna kakhanh khwan e, “Mi guangcdic hei David kaituang sw dat bam nuh e,

²⁷amei nunc rui Jerusalem thangc tatna mi khou tei naimei Ravkai khou kaniw RINGHPOUC khang khaengna kalum e thei Judamei guangc Rehoboam biak thangc kaniw lungning karihna ata swluai puni the.”

²⁸Kamei kumna kakhanhna, kamei rui kachaekc tuang guaichiclauna maengc kanei kasiamh lana kamei nunc khou sa the, “Nangniw Jerusalem thangc kalum tat bammei hei duc langv the. Isaraelmei nuncle, nangniw ta Izip khou rui phungc patloumei rav nunc tei mi khou hei nai the!”

²⁹Kamei rui kachaekc guaichiclauna kanei maengc tei akhat rui Bethel khou khatni akhat rui Dan khou lou the.

³⁰Heikumna meic nunc tei Bethel khatni Dan thangc kalum khang tatna paapc taanc the.

³¹Jeroboam rui chyng twan chyng twan khou kalummei bamv kasiamhlou the khatni Levimei kaikhwang hamhmei khou rui amuh nunc ni kadah the.

³²Jeroboam rui tachatmei bw tuang zaeng 15 nungc Judamei tuang ngai kumhmei ravriak tuang ngai kasiamhlou the. Bethel tuang ravchabamv khou kamei rui kasiamhloumei kachaekc guaituamchic tuang ravchabamv khou kamei rui ravkhaeng the, kumna mi Bethel khou tei amuh nunc ni suanglou the.

³³Tachatmei bw tuang zaeng 15 nungc, kamei rui Isaraelmei nunc khang kasiamhloumei ngay tingmik nungc tei Bethel thangc tatna mi tuang ravchabamv khou tei khaeng the.