Read Rongmei Naga 1 GUANGH NUNC 13 Bible Online

1 GUANGH NUNC 13 - Rongmei Naga bible

1 GUANGH NUNC 13

¹RINGHPOUC tuang latdanv theilayna Juda khou bammei muhzwng gaanv khat Bethel khou guang the. Jeroboam rui ravkhaeng khang ravchabamv khou ding bam khou kamei guang tangc the.

²RINGHPOUC tuang latdanv theilayna muhzwng tei rui kumna kauc pat the: “He ravchabamvle, RINGHPOUC rui sa e: David kaikhwang khou Josia twna kawmei nac gaanv khat puanc puni. Rav baih baihmei tuang ravchabamv khou taanv sw bammei nang khou khaengna bammei amuh nunc ta Josia rui nang ruc khou dow luai puni khatni kamei rui nang ruc khou maansei rou ntei puni.

³Mi ravchabamv hei bak puni the. Kum pwkhou RINGHPOUC rui akhou salou the twmei thay puni the.”

⁴Hei tei guangh Jeroboam rui chu pwkhou kamei rui muhzwng ta tei soucna latdanv pat the, “Mipu ti hei nym tho!” Mi dyng khou tei guangh baanc tei theic the kumna zay gut dat ngam mak khe.

⁵Thay mak daek khou ravchabamv tei bak keyna mbut tei kandih khou keylou the, hei tei muhzwng tei rui RINGHPOUC zanc khou dinc kasuakcloumei tei guang tanghmei tuang the.

⁶Khoutei guangh Jeroboam rui muhzwng khou tei sa the, “RINGHPOUC nang Racguangc khou akhang rui huayneylou o, kumna abaancpwam hei gay dat khang huayneylou o!” Muhzwng tei rui RINGHPOUC khou huayneylou the, kumna guangh baanc tei gay dat the.

⁷Khoutei guangh tei rui muhzwng khou tei sa the, “Nang athei kai lay guangna lungdak ganclou o. Nang rui taancloumei tuang swan hei ai nang khang tii nii e.”

⁸Muhzwng tei rui sa the, “Nang tuang lanv guay kapaek akhat tii bam sini, ai nang thei lay tatna nang lev tu zangv nchamc lak ge.

⁹Ramh khat na sini tu zangv riu kumna ai guangmei chaeng tei ni hanc dat riu twna RINGHPOUC rui akhou latdanv swna sa e.”

¹⁰Kumna kamei guangmei chaeng tei tat dat makna chaeng baihmei chaeng tat dat kan the.

¹¹Mi douc tei Bethel khou muhzwng gaanvthaih gaanv khat lungc bam khwan e. Kanac mpouh nunc rui kadaeng khou guangna Judamei muczwng mi nungc tei Bethel khou guangna taanc kanmei khatni kamei rui guangh Jeroboam khou sa kanmei guay kakhou raclou the.

¹²“Kamei tabui chaeng tat dat kanna cho?” twna mi karapouc tei rui kaniw khou thanv the. Kaniw rui kamei tat kanmei chaeng tei dinclou the,

¹³kum tina kakhang kuanniam chamdaanvlou tho twna kaniw khou sa the. Kaniw rui hei tei chamdaanvlou tina kamei tei kuanniam khou tuangcna

¹⁴Judamei muczwng rui tat kanmei chaeng tei lay suic key pwki mi pu tei mphauh bang bangc khou zaeng nthaekc bammei ta ariw the. “Nang Judamei muczwng kiu cho?” twna kamei rui thanv the. “Ngguay, kiuc e,” twna kamei rui daw the.

¹⁵“Nang akai thangc guangna nap tu nchamclou kho,” twna kamei rui sa the.

¹⁶Tiki Judamei muczwng tei rui daw the, “Ai nang kai thangc guangna tu zangv bam ngam mak ge,

¹⁷kalam thu ai ramhkhat na sini tu zangv nuh mak ge khatni guangmei chaeng tei ni hanc dat nuh mak ge twna RINGHPOUC rui akhou latdanv swna salou the.”

¹⁸Bethelmei muczwng karapouc tei rui kakhou sa the, “Ai ni nang kumcna muhzwng muay de, RINGHPOUC tuang latdanv theilayna baanchara akhou guangna ai rui nang ta akai khou kaw guangna titu tizangv o twna sa the.” Hei tei muhzwng karapouc tei saraamcna sa bam tuang e.

¹⁹Kumna Judamei muczwng tei mipu kai thangc tei tatna kamei lev tu nchamclou the.

²⁰Kaniw tu zangv khang kuakpaeng khou dungcna bam khou muhzwng karapouc khou tei RINGHPOUC tuang lat guang the.

²¹Kum tina kamei rui Judamei muczwng khou tei kumna kauc thau the, “Nang hei RINGHPOUC kalat piu mak khe twna RINGHPOUC kamei rui sa the.

²²Tu zangvlou nuh mak ge twna saloumei bamv khou nang liamna guangna tu zangv the. Hei zaeng rui nang ta swluai puni the, kumna nang pumc tei nang kai kaikhunc tuang tarou khou mbeihlou ni tuang hamh the.”

²³Tu zangv tang pwkhou muhzwng karapouc tei rui Judamei muczwng khang tei kuanniam chamdaanvlou the, kumna

²⁴kamei kuanniam tei tuangcna tat kan the. Kata tei chaengkui khou kamangliangpui rui sowriuna swluai the. Kapumc tei kandih khou nliaulouna bammei daeng khou kuanniam lev kamangliangpui tei dingna bam the.

²⁵Meic gaanvsaekc chaeng khou tei guang pwkhou kapumc daeng khou kamangliangpui dingna bammei ta how the. Kaniw tei Bethel khou guangna kaniw rui howmei tei poulou the.

²⁶Mi chamv tei muhzwng gaanvthaih tei rui chu lana sa the, “Mipu tei Ravguangc lat piu makmei muczwng e! RINGHPOUC kamei rui kum puni twna saloumei theilayna kamangliangpui thouc guangna kata swluaimei tuang the.”

²⁷Khoutei kamei rui kanac nunc khou tei sa the, “Akhang kuanniam chamdaanvlou tho.” Kanac nunc rui kuanniam chamdaanvlou tina

²⁸kamei tuangcna mi bamv khou tei guang pwki kapumc daeng khou tei katuang kuanniam lev kamangliangpui tei dingna bammei ta ariw the. Kamangliangpui tei rui kapumc ta tu mak ge, kuanniam ta ni nkay mak ge.

²⁹Muhzwng karapouc tei rui kapumc tei katuang kuanniam khou puanc thaulouna huayna mbeihlou khang Bethel thangc phungc guang the.

³⁰Kamei rui mi muczwng ta tei kakai kaikhunc tarou khou mbeihlou the: “Achanale, achanale!” twna kamei khatni kanac mpouh nunc rui huay the.

³¹Mbeihlou tang pwkhou muhzwng tei rui kanac mpouh nunc khou sa the, “Ai theic pw e thei ata ni mi tarou khou hei mbeihlou o kumna arou hei karou lev bam nchamc bam kan diu.

³²RINGHPOUC tuang latdanv theilayna kamei rui Bethel tuang ravchabamv khatni Samaria kaidai guay tuang kalummei bamv guay ruc khou kamei rui sa kasuakcloumei tei suai makna guang tangc puni.”

³³Isaraelmei guangc Jeroboam tei katuang simei chaeng khou rui ngalanc dat makna, kamei rui kasiamhloumei ravchabamv guay khou taanv taanh khang amuh kaikhwang hamhmei khou rui amuh khang suanglou geic the. Amuh sw nii niimei ta tei amuh khang kamei rui suanglou the.

³⁴Mi paap rui kakai guangh kaikhwang ta swmutlou the.