Read Rongmei Naga 1 GUANGH NUNC 14 Bible Online

1 GUANGH NUNC 14 - Rongmei Naga bible

1 GUANGH NUNC 14

¹Mi tangv tei Guangh Jeroboam nac mpouh Abija tei nnau the.

²Khoutei Jeroboam rui kanow khou sa the, “Nang lwn meic thay mak khang kasiamh lana ai hei Isaraelmei guangc sw puni twna akhou saloumei Shilo thangc bammei muhzwng Ahija daeng thangc tei nang tat tho.

³Ntyan dwm ruh kiak-tyan asaekc khatni nkhuaihdui kahaan akhat phungc tat tho. Anei nac nnau bammei hei akumh puni cho twmei kakhou thanv o, kamei rui dinclou puni.”

⁴Kumna kanow tei Shilo thangc Ahija kai thangc tat the. Ahija tei gaanvthaih langvna kamik how mak khe.

⁵Jeroboam now tei kanac mpouh nnau bammei lam khou thanv khang guang puni twna RINGHPOUC rui kakhou dinclou the. Tabui lat dawlou nina cho twmei ni RINGHPOUC rui Ahija khou dinclou the. Jeroboam now tei meic baihmei khe swna guang the.

⁶Kamei kaimun khou guang tanghmei khwan chu lana Ahija rui sa the, “Gut tho. Nang Jeroboam now e twmei ai thay de. Nang tabui swna meic baihmei thak swna guang tu cho? Nang khang simei chamv nai the.

⁷RINGHPOUC Isaraelmei Racguangc rui kumna sa e tu e twna Jeroboam khou guangna kumna sa tho: ‘Ai rui nang ta meic pang khou rui kadah lana amei Isaraelmei guay tuang guangc tiswlou the.

⁸Ai rui guanghdic tei David kikta khou rui laana nang khang tii the. Tiki nang hei thu alat piu chuymei abangc David kumh mak khe.

⁹Nang hu khou guangh swloumei guay rui sini taanc tangh makmei paap nang taanc the. Nang rui ata ganc pat the kumna ravmaengc kasiamh lana alungpuam tithau the.

¹⁰Hei zaeng rui ai rui nang kai kaikhwang khou kamut kamaimei tiguang puni the kumna nggaanvmei guay ta alauc gaanvthaih kadah makna swluai puni the. Ai rui nang kai kaikhuncmei ta swmaan puni the; kaniw guay ta tei zwn-bav ta kumcna giak ganc puni the.

¹¹Nang kai kaikhuncmei kaidai khou theicloumei guay ta si rui tu puni khatni nwmbangc khou theicloumei guay ta langdia rui tu puni. RINGHPOUC ai rui sa the.’ ”

¹²Ahija rui Jeroboam now khou sa dat re, “Ntaw thu nang kai tat dat tho. Nang kaidai khou tei gut rappui lev nang nac mpouh theic puni.

¹³Isaraelmei guay rui kata huayna mbeihlou puni. Jeroboam kai kaikhuncmei khou mbeih chuy rih rina mbeihlou nimei kiu kamei na puni the kalam thu RINGHPOUC Isarael Racguangc rui pianlou nuhmei kiu kamei na di the.

¹⁴Jeroboam kai kaikhwangmei ta sw mutsutlou nimei guangc RINGHPOUC rui Isarael khou tiilou puni the.

¹⁵RINGHPOUC rui Isaraelmei ta dandi tii puni, kamei hei duithuak khou ntou bang kadunh kumc kadunh puni the. Kaniw ta tei kaniw pupouc nunc khou tiiloumei kandic gaymei ramc khou tei rui RINGHPOUC rui phuai pat lana Euphratis duithuak paengc thangc zin phaklou puni the, kalam thu Ashera ravpui maengc kasiamhna kaniw rui alungpuam tithau the.

¹⁶RINGHPOUC rui Isarael ta ganclou puni the kalam thu Jeroboam rui paapc taanc the khatni Isaraelmei nunc ta paapc khou zaylou the.”

¹⁷Jeroboam now tei Tirza thangc tat dat the. Kamei kakai khou gut rappui lev ngana tei theic the.

¹⁸RINGHPOUC rui kabangc muhzwng Ahija khou rui sa guangmei kumcna Isaraelmei guay rui kata huayna mbeihlou the.

¹⁹Guangh Jeroboam rui taancloumei, kamei rui rih adowmei khatni kamei rui akumhna kandih sinlou tu cho twmei Isaraelmei guangc nunc tuang panty chakh buk khou hylou the.

²⁰Jeroboam tei tingkwm 22 guangh swlou khwan e. Kamei theicna mbeihlou the, kumna kanac mpouh Nadab rui kaphaan guangh sw lyn the.

²¹Solomon nac mpouh Rehoboam tei kamei katingkwm 41 khou Judamei guangc sw khwan e, kumna RINGHPOUC rui kata kalummei bamv khang Isaraelmei kandic kapwm khou rui kadahloumei Jerusalem kaidai khou kamei tingkwm 17 guanghtulou khwan e. Jeroboam pui tei Ammon kaidaimei Naama khwan e.

²²Judamei nunc rui RINGHPOUC ruc khou paapc taancna kaniw pupouc nunc suangc sini kaniw rui RINGHPOUC lungpuam kaniw ruc khou tithaulou khwan e.

²³Nchumh makmei rav nunc ta kalummei bamv mpeyna kaniw rui kasiamh thaulou khwan e. Khatni chyng twan chyng twan khou khatni thingbang bangc khou swangtauc tiangc khatni Ashera maengc lingclou geic khwan e.

²⁴Siliangmei thu, mi zaatc baihmei nunc tuang rav ta kalummei bamv guay khou tei kapumc zuanhmei ntumei khatni nggaanvmei bam geic khwan e. Isaraelmei rui mi kandic khou tei gutmei ganv khou alay ganc kanmei zaat nunc tei rui taanc bammei zakmei taanv guay tei Judamei nunc tei rui taanc khwan e.

²⁵Rehoboam rui guangh swmei tuang panguhmei kwm Izipmei guangc Shishak rui Jerusalem ta adow khwan e.

²⁶Kumna Ravkai khou khatni guanghkai khou naimei lanv guay kamei rui phungc tat kan khwan e. Solomon rui kasiamhloumei kachaekc tuang nggih guay tei ni kamei rui laa tat kan khwan e.

²⁷Mi guay phaan tei Rehoboam rui tanzinc tuang nggih kasiamh dat khwan e kumna mi guay tei zauclou khang guanghkai chaengmun nkhwanmei rihpy nunc khou tei nsinlou khwan e.

²⁸Guangh rui Ravkai thangc tatmei kathuic rigaanvpouc nunc tei rui mi nggih guay tei phungc tat the, kumna rigaanvkai lungc khou tei laaguanglou dat raph rap the.

²⁹Guangh Rehoboam rui taancloumei baih baihmei guay ni Judamei guangc nunc tuang Chakh buk khou hylou the.

³⁰Kamei kapanty khou Jeroboam lev nthaekc makna rih swna lungc bam khwan e.

³¹Rehoboam tei theic the kumna David kaidai khou guangh nunc tuang tarou khou mbeihlou the. Kanac mpouh Abija rui kaphaan guanghtu lyn dat the.