Read Rongmei Naga 1 GUANGH NUNC 15 Bible Online

1 GUANGH NUNC 15 - Rongmei Naga bible

1 GUANGH NUNC 15

¹Isaraelmei guangc Jeroboam rui guanghtumei tuang 18mei kwm, Abija Judamei guangc sw the.

²Kamei Jerusalem khou tingkwm kathumh guangh swlou khwan e. Kapui tei Absalom nac aluhpui Maaka khwan e.

³Kapu rui taanhmei paap kahak tei kamei taanc khwan e kumna kapouc David kumcna kamei RINGHPOUC kaRacguangc lat piu chuyna piu mak khwan e.

⁴Tiki, David zaeng rui, Jerusalem khou kaphaan guanghtu lyn khang Jerusalem ta gaeklou khang nah mpouh gaanv khat RINGHPOUC rui tiilou khwan e.

⁵Kamei rui mi hei taancloumei hei David rui RINGHPOUC kata tipianloumei zaeng rui e. David tei Hittimeipu Uria tuang latbamv khou na tei hamhna kamei RINGHPOUC tuang latdanv guay piu chuyna lungc khwan e.

⁶Abija tei kapanty saanvsaengh Jeroboam lev rih swna lungc khwan e.

⁷Abija rui taancloumei guayna Judamei guangc nunc Tuang Chak buk khou hylou the.

⁸Abija tei theic the kumna kata David kaidai khou mbeihlou the. Kanac mpouh Asa rui kaphaan guanghtu lyn the.

⁹Isaraelmei guangc Jeroboam rui guanghtumei tuang 20mei kwm, Asa Judamei guangc sw the.

¹⁰Kamei Jerusalem khou tingkwm 41 guanghtulou khwan e. Kapeic rui Absalom nac aluhpui Maaka khwan e.

¹¹Asa tei kapu kapouc David kumcna RINGHPOUC rui kahawmei taancna lungc khwan e.

¹²Rav baihmei ta kalummei bamv guay khou bammei ntumei khatni nggaanvmei kapumc zuanhmei guay ta tei kakandih khou rui alay ganc the khatni kahu khou lungcloumei nunc rui kasiamhloumei ravmaengc guay tei laa ganc the.

¹³Kamei rui kapeic Maaka ta liammav bamv khou rui lou key the, kalam thu kamei rui kingckiucmei ravpui Ashera maengc kasiamh khwan e. Asa rui ravmaengc tei dowbau keyna Kidron nzaengc khou mai ntei the.

¹⁴Asa kamei rui ravmaengc kalummei bamv guay tei swmaan ngam mak sini kamei kapanty khou RINGHPOUC khou lwmnuhmei swna bam khwan e.

¹⁵Kapu rui RINGHPOUC khang katgutloumei puat guay tei kamei rui Ravkai khou lou the. Kamei rui katgutloumei daandi kachaekc tuang puat guay tei ni Ravkai khou katlou dat the.

¹⁶Judamei guangc Asa lev Isaraelmei guangc Baasha tei kaney ngamv naina bam saanv kaney kak khou suc-rih swna bam khwan e.

¹⁷Baasha rui Juda khou rih keyna Juda khou meic tat pat tat gut dat nuh mak khang Rama khou rihmei nunc bamv sw khwan e.

¹⁸Kum tina Ravkai khou khatni guanghkai khou loumei daandi kachaekc guayna tei guangh Asa rui laana katuang meicdaihmei gaanvsaekc ta Damaskas thangc thoucna, Hezion tou Tabrimmon nac mpouh Siriamei guangc Benhadad khou phungc guangna kumna sa the:

¹⁹“Anei pu kumcna anei ni giang sw di kho. Mi daandi kachaekc hei nang khang kaipat swna phungc guangmei tuang e. Isaraelmei guangc Baasha lev giang swmei riang tei sw tap tho, kumna kamei rui katuang ricmei atuang kandic khou rui laa pat dat kan di tho.”

²⁰Asa rui samei tei Guangh Benhadad rui nuh the kumna katuang ricpy nunc ta rihmei nunc lev twna Isaraelmei kaidai guay ta adow khang thouc guang the. Kaniw rui Ijon, Dan, Abel Beth Maaka, Galili daeng khoumei ramv, khatni Naphtali ramv guay tei laa the.

²¹Mi chamv tei Guangh Baasha rui chu lana, katuang ricmei guay Rama khou rui laa patna Tirza thangc tat kan the.

²²Guangh Baasha rui Rama kaidai raengv raeng bam khou sinswmei ntauh khatni thing guay tei Rama khou rui phungc pat khang meic katana nkhav nina e twna Guangh Asa rui Juda kabamv kathuicna khou latdanv tiipat the. Asa rui mi thingtauh guay tei rui Benjamin ramv khou naimei Mizpa lev Geba kaidai raengv raeng the.

²³Guangh Asa rui taancloumei baih baihmei guay, katuang tancbauhmei taanv guay khatni kamei rui raengh raengloumei kaidai guay Judamei tuang Guangc nunc tuang Chak buk khou hylou the. Kamei tei gaanvthaih key pwkhou katan tuang ravpuat akhat rui kaphay chuanchai the.

²⁴Asa tei theic the kumna kata David kaidai khou guangh nunc tuang tarou khou mbeihlou the, kumna kanac mpouh Jehoshaphat tei kaphaan guanghtu lyn the.

²⁵Judamei guangc Asa rui guanghtumei tuang kaneimei kwm Guangh Jeroboam nac mpouh Nadab tei Isaraelmei guangc sw the, kumna kamei tingkwm kanei guangh swlou khwan e.

²⁶Kamei ni kapu kumcna RINGHPOUC ruc khou paapc taancna Isaraelmei ta paapc khou zaylou the.

²⁷Isakar kaikhwangmei, Ahija nac mpouh Baasha tei Nadab ta swluai khang nkamhmei chamvraeng rui Philistia khou naimei Gibbethon kaidai ta katuang ricmei nunc lev twna dingbinna Nadab ta swluai the.

²⁸Mi hei Asa rui Judamei guangc swmei tuang kathumhmei kwm pat kanmei tuang e. Kumna Baasha rui Nadab phaan Isaraelmei tuang guangc sw lyn the.

²⁹Kadyng mak khou kamei rui Jeroboam kai kaikhuncmei guay ta swluai thau the. Shilo khou bammei muhzwng Ahija rui dinc kasuakcloumei kumcna, Jeroboam kai kaikhuncmei guay ta swluai the; meic gaanv khat na sini theic nsaekclou mak khe.

³⁰Hei tei Jeroboam rui paapc taancna khatni Isaraelmei guay ta paapc titaancna RINGHPOUC Isarael Racguangc tuang lungpuam tithauloumei zaeng rui e.

³¹Nadab rui taancloumei baihmei guay ni Isaraelmei guangc nunc panty Chak buk khou hylou the.

³²Judamei guangc Asa khatni Isaraelmei guangc Baasha tei kaney ngamv nai bam saanv rih sw tanh tanna lungc bam khwan e.

³³Judamei guangc Asa rui guanghtumei tuang kathumhmei kwm Ahija nac mpouh Baasha rui Isaraelmei kaguayna tuang guangc sw the. Kamei Tirza khou tingkwm 24 guangh swlou khwan e.

³⁴Kamei ni kahu khou guangh swloumei Jeroboam kumcna RINGHPOUC ruc khou paapc taancna Isaraelmei mpeyna ta paapc khou zaylou khwan e.