Read Rongmei Naga 1 GUANGH NUNC 16 Bible Online

1 GUANGH NUNC 16 - Rongmei Naga bible

1 GUANGH NUNC 16

¹RINGHPOUC rui Hanani nac mpouh muhzwng Jehu khou Baasha khang kumna sa guang the:

²“Nang hei ramhkhat na sini hamh bam khwan e, tiki ai rui nang ta Isaraelmei tuang kapy tiswlou the. Kumna ntaw nang Jeroboam kumcna paapc taanc the kumna amei nunc ta paapc khou zaylou the. Kaniw tuang paap rui alungpuam tithau the,

³kumhpui zaeng rui Jeroboam khou taancloumei kumcna ai rui nang ta khatni nang kai kaikhuncmei ta swmaanlou puni the.

⁴Nang kai kaikhuncmei kaidai khou theicloumei guay ta tei si rui tu puni khatni ramvpuk khou theicloumei guay ta tei langdia rui tu puni.”

⁵Baasha rui taancloumei baih baihmei guay khatni katuang tancbauhmei taanv guay Isaraelmei guangc nunc tuang panty Chak buk khou hylou the.

⁶Baasha tei theic the kumna Tirza khou mbeihlou the. Kanac mpouh Ela rui kaphaan guanghtu lyn the.

⁷Baasha rui RINGHPOUC ruc khou paapc taanhmei zaeng rui Baasha khatni kakai kaikhunc khang muhzwng Jehu khou rui ravlat tii guang khwan e. Guangh Jeroboam rui taanc kanmei simei taanv guay tei kamei rui taanhmei na hamhna kamei rui Jeroboam kai kaikhuncmei guay ta swluaipui zaeng rui RINGHPOUC rui karuc khou lunghpuamc khwan e.

⁸Judamei guangc Asa rui guanghtumei tuang 26mei kwm Baasha nac mpouh Ela rui Isaraelmei guangc sw the, kumna kamei Tirza khou tingkwm kanei guangh swlou khwan e.

⁹Katuang takuanc gari guayna tuang paekri ta sinmeipu, katuang meicdaihmei Zimri twna kawmeipu rui kata swluai khang karamc khwan e. Zaeng neih khat Ela tei guanghkai sinmeipu Arza kai khou zouh zangv mba bam khwan the.

¹⁰Khoutei Zimri gutna Ela ta swluai the kumna kamei rui guanghtu lyn the. Hei tei Judamei guangc Asa rui guanghtumei tuang 27 kwm khwan e.

¹¹Zimri tei kamei guanghtu rappui lev, kamei rui Baasha kai kaikhuncmei guay ta swluai ngam khwan e. Nggaanvmei kariang kaluaic khatni kaduangda guay ta swluai ngam khwan e.

¹²RINGHPOUC rui muhzwng Jehu khou sa guangmei kumcna Zimri rui Baasha kai kaikhuncmei guay ta swluai ngam khwan e.

¹³Kaniw rui ravmaengc kalummei zaeng rui khatni Isaraelmei ta paapc khou zayloumei zaeng rui Baasha lev kanac mpouh Ela rui RINGHPOUC Isarael Racguangc tuang lungpuam tithau khwan e.

¹⁴Ela rui taancloumei baih baihmei taanv guay ni Isaraelmei Guangc nunc tuang panty Chak buk khou hylou the.

¹⁵Judamei guangc Asa rui guanghtumei tuang 27mei kwm Zimri Tirza khou zaeng chanei guanghtu the. Mi ganv khou tei Isaraelmei ricmei kang akhat rui Philistin kandic khou naimei Gibbethon kaidai ta dingbin bam khwan e.

¹⁶Kumna Zimri rui guangh ta swluai the twmei kaniw rui chu pwkhou kaniw rui kaniw tuang ricpy Omri ta Isaraelmei guangc the twna kauc pat the.

¹⁷Mi tangv tei Omri rui katuang ricmei kang ta nduanghna Gibbethon ganclouna Tirza ta guangna dingbin the.

¹⁸Mi kaidai tei bow the twmei Zimri rui how pwkhou, kamei rui guanghkai tuang kalungcmei rihgaekkai khou tei gutna guanghkai tei mai lou the, kumna kamei mai khou tei theiclou the.

¹⁹Mi hei kamei rui RINGHPOUC ruc khou paapc taancloumei zaeng rui patmei tuang e. Jeroboam kumcna kamei ni paapc taancna khatni Isaraelmei ta paapc khou zaylouna kamei rui RINGHPOUC lung tipuamclou the.

²⁰Zimri rui taancloumei baih baihmei guay khatni kamei rui guangh ta sw kasic khang swmei guay Isaraelmei guangc nunc tuang panty Chakh buk khou hylou the.

²¹Ntaw thu Isaraelmei tei kalangv kanei pat the. Kalangv akhat rui Ginat nac mpouh Tibni ta guangh tisw nii the, kalangv akhat rui Omri ta kahaw the.

²²Nkhamh khou Omri ta kahawmei kang rui ngam the; Tibni theic the kumna Omri rui guangh sw the.

²³Kumna Judamei guangc Asa rui guanghtumei tuang tingkwm 31mei kwm Omri tei Isaraelmei guangc sw the. Kumna kamei tingkwm 32 guangh swlou khwan e. Reymei tingkwm charuk tei kamei Tirza khou rui guangh swna sin khwan e,

²⁴mi tangv tei kamei rui Shemer twmeipu khou rui Samaria tuang chyngbut tei daandi paek 6000 khang liu khwan e. Omri rui mi chingcbut ta tei raengh raeng lana mi khou tei kaidai kasiamhlou the. Kumna mi kaidai zanc tei ramvpouc reymei Shemer zanc laana Samaria twna phuaklou the.

²⁵Omri tei kahu khou guangh swloumei nunc suangc sini paapc taanc mbu khwan e.

²⁶Kamei ni Jeroboam kumcna kapaap rui khatni kamei rui Isaraelmei nunc ta ravmaengc kalummei khou zayloumei zaeng rui RINGHPOUC lungpuam tithau khwan e.

²⁷Omri rui taancloumei baih baihmei guay khatni kamei rui taancloumei guay Isaraelmei guangc nunc panty Chakh buk khou hylou the.

²⁸Omri tei theic the kumna kata Samaria khou mbeihlou the, kumna kanac Ahab rui kaphaan guanghtu lyn the.

²⁹Judamei guangc Asa rui guanghtumei tuang tingkwm 38mei kwm, Omri nac mpouh Ahab tei Isaraelmei guangc sw the. Kamei Samaria khou tingkwm 22 guangh swlou khwan e.

³⁰Kamei ni kahu khou guangh swloumei guay suangc sini paapc taanc mbuna taanc the.

³¹Kamei tei guangh Jeroboam kumcna paapc taanhmei tei rui biuh makna; kamei mi khang tei suangc gut ducna Sidonmei guangc Ethbaal nac aluhpui ta kawna Baal ta kalum the.

³²Kamei rui Samaria khou Baal khang ravkai kasiamhlou the. Kamei rui Baal khang ravchabamv akhat ni kasiamhna hei tei mi ravkai khou tei lou the.

³³Kamei rui Ashera ravpui maengc ni lingc thau the. Kahu khou guangh swloumei Isaraelmei guangc guay suangc sini kamei rui RINGHPOUC lungpuam tithau ranvlou the.

³⁴Kamei guangh sw bammei ganv khou Bethelmei Hiel rui Jeriko kasiamh thau dat the. Hiel tei Jeriko kasiamh thau dat khang kabamv kasiamh thau khou kanac mpouh gaanvthaihmei Abiram amaanlou the, khatni kamei rui raenghkat guay kasiamh thaumei ganv khou kanac mpouh alauc liangmei Segub amaanlou the, mi hei RINGHPOUC rui Nun nac mpouh Joshua khou rui dinc kasuakcloumei guang tangh tuang e.