Read Rongmei Naga 1 GUANGH NUNC 17 Bible Online

1 GUANGH NUNC 17 - Rongmei Naga bible

1 GUANGH NUNC 17

¹Gilead ramv khou naimei Tisbemei muhzwng Elija rui Guangh Ahab khou sa the, “Ai rui kasiamruai swna bammei ringhmei RINGHPOUC, Isarael Racguangc zanc khou rui samei tuang e, twmei thu guang nimei tingkwm kanei kathumh hei ai rui sa dat ti mak saanv zikdui ni tingdui ni key dat lak khe.”

²RINGHPOUC rui Elija khou sa the,

³“Nang mi bamv khou rui tatpat tho, kumna Jordan tuang neihpat khou naimei Kerit duithuak daeng khou tei kaithy ley tat tho.

⁴Mi duithuak tei rui nang khang dui tii puni, kumna nang khang taektw mi khou tei phungc guang bam khang ai rui agaekc khou latdanv tii kan the.”

⁵Elija tei RINGHPOUC tuang latdanv piuna Kerit duithuak daeng thangc tei kaithy ley tat kan the.

⁶Kamei mi duithuak dui tei zangv the kumna agaekc rui tingmik pum lauthwan tingzyn kakhang ntyan lev zanh phungc guang the.

⁷Ting key timakmei zaeng rui mi duithuak tei ni kangc the.

⁸Khoutei RINGHPOUC rui Elija khou sa the,

⁹“Nang Sidon daeng khou naimei Zarephat kaidai thangc tei tatna mi khou tei bam tho. Mi khou tei bammei amaypui gaanv khat rui nang ta kic bam khang ai rui latdanv pat kan the.”

¹⁰Kumna Elija tei Zarephat khou guang pwkhou amaypui gaanv khat dikmei thing khuaicna bammei ta ariw the. “Ai zangv khang dui laaguang o,” twna kamei rui mipui khou tei sa the.

¹¹Kamei rui dui laa khang tat patmei ganv khou tei “Akhang ntyan ni laaguang o,” twna sa the.

¹²Mipui tei rui daw the, “Ringcna bammei RINGHPOUC nang Racguangc zanc pancna samei tuang the, akai khou ntyan khat na sini maek khe. Akai khou naimei twmei kiu gehu buay baankiu akhat na lev thauh haan khou Olive thauc zow key guai biuc na di the. Mi katit na naimei tei ai lev anac mpouh aney khang ntyan kabic me twna khou hei thing khuaih khang patmei tuang e. Aney tulou khang hei tei rui nkhamh liangmei taektw di the, mi tangv tei thu aney ndaapc khaengvna theih khang di the.”

¹³Elija rui kakhou sa the, “Lungh geic nangh e. Nang tatna tuzangv khang kasiamh tho. Tiki katit na naimei kiu kasiamhna akhang laaguang rey tho, mi tangv rui nang kai puinav nei khang kasiamh tho.

¹⁴Kalam thu RINGHPOUC Isaraelmei Racguangc rui sa e: ‘RINGHPOUC ai rui ting tii key dat makmei hu khou nang tuang ntyan buay kouc tei nsa zat ni tuang hamh e nang tuang thauc haan ni karaeng zat ni tuang hamh e.’ ”

¹⁵Elija rui samei kumcna mi amaypui tei rui taanc the, kumna kaniw guayna zaeng mpeyna tu biucna tuna lungc khwan the.

¹⁶RINGHPOUC rui Elija khou rui sa guangmei kumcna katuang ntyan buay kouc ni thauh haan ni karaeng zat mak khwan e.

¹⁷Kanakmei tangv amaypui nac pu tei nnau the; kamei tei si khith khit gutna theic the.

¹⁸Mipui tei rui Elija khou sa the, “Ravguangc meile, tabui swna nang rui mi kumhmei hei akhou taanclou bam tu cho? Nang rui mi khou hei guangmei kiu Ravguangc khou apaap guay tiningtow louna anac ta tiswluai khang guang dina cho?”

¹⁹“Mi nac tei adaeng khou laaguang o,” twna Elija rui sa the. Kamei rui mi nac ta tei kapui baanc khou rui laana kamei bammei bamv kai kauh thangc tei puanc ku lana laeng khou nzilou the.

²⁰Kumna kamei rui kauc ranvna kumna huayney the, “He RINGHPOUC aRacguangc, tabui swna mi kumhmei ramsi hei mi amaypui khou hei taanclou bam tu cho? Kamei nzian thayna ata makuat bammei tuang the, kumna ntaw nang rui kanac mpouh ta swluailou the!”

²¹Khoutei Elija tei mi nac ruc khou tei zip nkhum key liang kathumhlouna kumna huayney the, “He RINGHPOUC aRacguangc, mi nac ti hei tiringclou dat ro!”

²²RINGHPOUC rui Elija tuang ravsuai dawlouna mi nac tei kathiu laana ringc thau dat the.

²³Elija rui mi nac ta tei kai kabangc thangc tei nduangh key datna, “Zauc lo, nang nac ringc dat the!” twna sa the.

²⁴Mipui tei rui daw the, “Nang hei Ravguangc tuang mei dyng the. Kumna Ravguangc rui nang khou kachuclou dyng the twmei ntaw thu ai thay the!”