Read Rongmei Naga 1 GUANGH NUNC 18 Bible Online

1 GUANGH NUNC 18 - Rongmei Naga bible

1 GUANGH NUNC 18

¹Tingkaenghmei kathumhmei kwm RINGHPOUC rui Elija khou sa the, “Nang tatna guangh Ahab hu khou guang o, kum pwkhou ai rui ting tii key puni.”

²Kumna Elija tei tat the. Mi ganv tei nap nkowmei tei kami tangc bam khwan the,

³kumna guanghkai khou kathouc swna zauc bammeipu Obadia ta Ahab rui kadaeng khou kaw gut the. (Obadia tei RINGHPOUC ta lungh gutna kalum bammeipu khwan e.

⁴Jezebel rui RINGHPOUC tuang muhzwng guay ta swluai bammei ganv khou Obadia rui muhzwng gaanv 100 ta laana muhzwng riakngu riakngu kang kanei khang nzanhlouna mi nunc ta tei khowlang khou tiduplouna kamei rui taektw khatni dui akhangv khwan e.)

⁵Ahab rui Obadia khou sa the, “Aniu tuang takuanc guay hei kataek mpac tu ringc nuhmei bamv khang nai bu ny duipuakkai daeng daeng khou phu tat di kho. Aniu tuang khouringc guay ti hei tiringclou nuhmei phuaic nai kho ni nuh e.”

⁶Kaniw rui phutat gay khang ramv tei kalangv kalangv damcpatlouna Ahab rui ramvpuk khat thangc tat pwkhou Obadia rui akhat thangc tatpat khwan the.

⁷Obadia tei tatpat pwki thay mak daekna chaengkui khou Elija ta ariw the. Kamei Elija lwn thay lana kamei nkhum keyna sa the, “Kaipoucle, nang kiu changh dai?”

⁸Kamei rui daw the, “Ngguay, ai Elija de. Ai mi khou hei bam e twna nang kaipouc Ahab khou sa tio.”

⁹Obadia rui daw the, “Guangh Ahab rui ata swluai kan tu laa niina nang rui sw bammei hei ai rui tabui swlou thena cho?

¹⁰Ringc bammei RINGHPOUC nang Racguangc zanc saancna ai rui samei tuang e, twmei thu guangh rui nang ta kandih kabamv kathuicna khou phu the. Kandih kaipouc akhat rui kakandih khou nang bam mak ge twna samei ganv khou, nang ta phutow ngam mak khe twmei tuang siangdyng hei tisw raph rap the.

¹¹Nang mi khou hei bam e twna guangh khou salou khang nang kahawna cho?

¹²Ai tat kanmei thei thangc RINGHPOUC tuang bumaengc rui nang ta kabamv baih thangc phungclou dat kan e thei tabui sw ni. Ai rui nang mi khou hei bam e twna Ahab khou salou pwkhou kamei rui nang ta ariw lam mak ge thei kamei rui ata swluai puni. Ai hei alauc khou rui thauna RINGHPOUC ta nzianna kalum guangmeipu e twmei ningtowlou o.

¹³Jezebel rui RINGHPOUC tuang muhzwng nunc ta swluai bammei ganv khou ai rui muhzwng 100 ta kalangv kanei khang patna riakngu riakngu ta khowlang akhat khat khou nkamhlouna ai rui kaniw khang taektw khatni dui tiina makuatlou khwan e twmei nang chu makna cho?

¹⁴Kum e thei tabui swna nang mi khou hei bam e twmei guangh khou guang salou o twna tabui swna thouc bam tu cho? Kamei rui ata swluai puni the!”

¹⁵Elija rui daw the, “Ai rui kasiamruai swna bammeipu RINGHPOUC Ngamparymeipu zanc khou rui latryan swmei tuang e twmei thu, ai aseic hei guangh hu khou guang puni.”

¹⁶Kumna Obadia rui guangh Ahab khou guangna poulou the, kumna Ahab tei Elija ta ariw khang tat the.

¹⁷Ahab rui kata how pwkhou kumna sa the, “Isarael ta swkatuakc katit bammeipu nang mi khou hei bam bu di the ke!”

¹⁸Elija rui daw the, “Ai hei sw katuakc bammeipu hamh e. Isarael ta tiryanraloumei kiu nang khatni nang pu hei the. Nang RINGHPOUC tuang latdanv liamna Baal tuang maengc ta kalum the.

¹⁹Isaraelmei guay ta tei liamna Jezebel rui makuat bammei Baal tuang muhzwng 450 lev Ashera tuang muhzwng 400 ta nduanghna Karmel chyngbut khou ata ariw o twna latdanv pat tio.”

²⁰Kumna Ahab rui Isaraelmei guay khatni Baal tuang muczwng guay ta Karmel chyng khou guang o twna kaw the.

²¹Elija rui meic pang khou tei kuna sa the, “Asaanh nangniw lung ding makna pat pat gut gut bam ni hena cho? RINGHPOUC hei Ravguangc e thei kata kalum tho; tiki Baal hei Ravguangc e thei ni kata kalum tho!” Tiki meic nunc tei lat khat na sini sa mak khe.

²²Khoutei Elija rui sa the, “RINGHPOUC tuang muczwng nsaekcloumei kiu ai na hei di the, tiki Baal tuang muhzwng thu 450 nai e.

²³Guaituamchic kanei laaguang o. Baal tuang muczwng nunc rui guaituamchic akhat tei laana, swluaina dimpuat lana thing khwan ruc khou tei lou tho. Tiki mi khou tei mai thu thoulou riu. Ai ni guaituamchic akhat tei laana hei tei kumcna taanc muay puni.

²⁴Kumna Baal tuang muczwng nunc tei kaniw tuang rav khou huayney kan di tho kumna ai ni RINGHPOUC khou huayney puni the. Mai tikeyna dawlou loumeipu tei Ravguangc kiu the.” Meic nunc tei rui nuh the twna kauc the.

²⁵Khoutei Elija rui Baal tuang muhzwng nunc khou tei sa the, “Nangniw thu meic geic dyng the cho, kumna nangniw rui guaituamchic akhat hei laana kasiamh rey tho. Nangniw tuang rav khou huayney tho, tiki thing khou tei thu mai ntoulou nuh mak ge.”

²⁶Kaniw khang tiiloumei guaituamchic tei kaniw rui kasiamh lana Baal khou kalaanv nganvna huayney the. Kaniw rui kasiamhloumei ravchabamv daeng khou tei alaamh nkuayna “Baalle, aniw khou dawlou o!” twna kauc bam the. Tiki dawloumei tuang maek khe.

²⁷Kalaanv tangc pwkhou Elija rui kaniw ta matevna sa the, “Kauc ranvna ney tio! kamei rav de! kamei kachwn tarai bam lana kho ni nuh e, hamh e thei tyn lana kho ni nuh e hamh e thei kamei nggin tat kanna kho ni nuh e. Kamei zipri lana kho ni nuh e, kata nchyang thau o!”

²⁸Kumna muhzwng nunc tei kaniw riak theilayna kaniw pumpaengc guay tei baeng rui khatni baengsic rui kazam kazei sw patna zei rui zei lana kauc ranvna huayney the.

²⁹Neih nchiangh key mak saanv kaniw kauc rah ndy ndyna huayney the; tiki dawlou mak khe, ramh khwanring chu guang mak khe.

³⁰Khoutei Elija rui “Adaeng khou guang tuanc o,” twna meic nunc khou tei sa the. Kumna kaniw guay tei kadaeng khou guang kaduai the. Swra keyloumei RINGHPOUC tuang ravchabamv kamei rui kasiamh thau dat the.

³¹Kamei ntauh 12 laa the. Hei tei RINGHPOUC rui Isaraelmei twna kazanc phuakloumei Jakob nac mpouh gaanv 12 zanc phuakloumei kaikhwang 12 sing tei e.

³²Mi tauc guay tei RINGHPOUC ta kalummei bamv khang ravchabamv kasiamh the. Kamei rui mi ravchabamv daeng khou dui tinc akhat dou lou biuhmei duibwngchaeng riat ngguiclou the.

³³Kumlana kamei rui ravchabamv khou tei thing khuanlou the kumna zanh tei dimna thingkhwan ruc khou tei lou the. Kamei rui sa the, “Nangniw tuang muanh padei tei rui dui zu guangna puatkat khatni thing ruc khou tei bunlou tho.” Kaniw rui hei tei swlou the.

³⁴Khoutei “Lou dat ro,” twna kamei rui sa the, kumna kaniw rui lou dat the. “Lou dat ro,” twna kamei rui sa dat re kumna kaniw rui lou dat the.

³⁵Dui tei ravchabamv khou tei rui luangc chunh chun keyna duibwngchaeng riatloumei tei chungc padik the.

³⁶Tingzyn ravkhaengmei ganv khou tei Elija tei ravcha daeng khou guangna kumna huayney the, “He RINGHPOUC, Abraham, Isak khatni Jakob Racguangc, nang hei Isaraelmei tuang Racguangc e khatni ai hei nang bangc e kumna ai rui sw bammei hei nang tuang latdanv thei layna taanc bammei tuang e twmei kaniw khou ntaw hei lyanlou o.

³⁷Dawlou o, he RINGHPOUC, dawlou o, mi mei nunc hei RINGHPOUC nang hei Ravguangc e kumna nang rui kaniw ta nang khou phungc guanglou dat the twmei thay kan diu.”

³⁸RINGHPOUC rui mai tii keyna khaengpuat, thingkhwan, khatni ntauh guay tei raw ngam kan the. Kandih tei raw kangc the kumna duibwngchaeng khou naimei dui guay tei raw thip the.

³⁹Meic nunc tei rui hei tei how pwkhou kandih khou pun nkhumlaamv keyna sa the, “RINGHPOUC hei Ravguangc e; RINGHPOUC na hei Ravguangc e!”

⁴⁰“Baal tuang muczwng guay ta tei nym tho; kaniw gaanv khat na ta sini mpat dat ri tho!” twna Elija rui latdanv pat the. Meic nunc tei rui kaniw guayna ta tei nym the kumna Elija rui kaniw guay ta Kishon duithuak khou zay keyna swluai the.

⁴¹Khoutei Elija rui guangh Ahab khou sa the, “Ntaw thu tatna tu zangv tho. Ting riw ranvna riw guangmei khwan ai chu the.”

⁴²Ahab tei nap tu khang tat kanmei ganv khou, Elija tei Karmel Chyng twan khou kuna kapy kakhu kak khou sow nkhumlouna bam the.

⁴³“Nang tatna duipui biak tei phaengc zauc o,” twna Elija rui kabangcpu khou sa the. Kabangcpu tei tatna zauc lana hanc guang datna sa the, “Ai ramhkhat sini how pat mak ge.” Elija rui kata thouclou liang chanei lana tizauc the.

⁴⁴Chaneimei luan khou kamei guangna sa the, “Maansei baanc kumhmei muanghbangv duipui khou rui kumei ta ai how the.” Elija rui kabangcpu khou tei sa the, “Nang Guangh Ahab daeng thangc tei tatna ‘Nang tuang takuanc gari tuangcna ting riw namv mak khou nang kai nzwan la tho,’ twna sa ti tho.”

⁴⁵Asaanh mak khou tingpuk tei muangh rui guam zingh zing guang the, mpwan aliu guang the kumna ting riw ranvna riw thau the. Ahab tei katuang takuanc gari tuangcna Jezereel nzwanna tat kan the.

⁴⁶Elija khou RINGHPOUC tuang ngamv keylouna, kaphey kasian kagiatc ntiplouna Ahab hu pak kasuakcna Jezereel nganv pak guang tangc the.