Read Rongmei Naga 1 GUANGH NUNC 19 Bible Online

1 GUANGH NUNC 19 - Rongmei Naga bible

1 GUANGH NUNC 19

¹Elija rui taanc kanmei tei khatni Baal tuang muczwng guay ta swluai kanmei hei guay hei guangh Ahab rui kanow Jezebel khou raclou the.

²Khoutei mipui tei rui Elija khou kumna sa guang the: “Nang rui muhzwng nunc khou taanclou kanmei kahak tei ai rui nthuanh kiu mi ganv khou hei nang khou taanclou mak khwan e thei rav rui ata bai luai kan di tho.”

³Elija tei pingna pak kan the; kamei kabangc ta nduanghna Juda khou naimei Beersheba thangc tat kan the. Kabangcpu ta mi bamv khou tei ganclou ducna,

⁴Elija tei neihmaryn chaeng tazikramv thangc tat kan the. Kamei nthaekcna thingbang bangc khou dungc bam khou kamei theic kan niimei chwn pat the. Khoutei kamei rui kumna huayney the, “He RINGHPOUC, ai khaengv ngam mak khe, apanty hei laathaulou pu tho, ai hei theihmei lev akhat di the!”

⁵Kamei mi thingbang bangc khou tei aliau mphaih keyna zipri tat the. Khoutei baanchara guangna kata kahina sa the, “Thauna tu tho”

⁶Kamei rak patna zauc kari kariang pwki ntyan dwm akhat lev dui haan akhat kapy daeng khou lou bammei ta how the. Kamei rui hei tei tu zangv tangna zip key dat kan the.

⁷RINGHPOUC tuang baanchara tei guang datna kata nchyang thaulou datna sa the, “Thauna tu dat lo, nang tat nimei bamv tat tangh mak lam e.”

⁸Elija tei thau lana hei tei tu the zangv the, kumna kamei Nthanmei Sinai Chyng nzwanna zaeng 40 tat nimei khang tei mi taektw tei rui pumtan tiilou the.

⁹Mi khou tei khowlang akhat nai tina kamei mi khou tei gut ziplou the. “Elija nang mi khou hei tabui sw bam tu cho?” twna thay mak daek khou RINGHPOUC rui kakhou sa the.

¹⁰Kamei rui daw the, “RINGHPOUC Ngamparymei Racguangc, ai hei nang tuang siamruai na swna bammei tuang e. Tiki Isaraelmei nunc nang khou kaniw rui swloumei latryan sw bakna nang tuang ravchabamv guay swra ngam the khatni nang tuang muczwng guay ta swluai ngam the. Theic nsaekcloumei kiu ai na hei di the; kaniw rui ata ni swluai khang karamc bam e!”

¹¹“Nang tat pat lana chyngtwan khou tei ahu khou ding o,” twna RINGHPOUC rui sa the. Khoutei RINGHPOUC guangna pwanzingh dai tiguangna chyngbut tei sw bak the khatni khou tei sw pangv the — tiki RINGHPOUC thu mpwan khou tei bam mak ge. Mpwan tei aliu nthaekc pwkhou baengla kanukc the — tiki mi baengla khou tei RINGHPOUC bam mak ge.

¹²Baengla tangv tei mai pat the — tiki mai khou tei ni RINGHPOUC bam mak ge. Mai tangv tei asuaicnamei, niamhmei khwan akhat guang the.

¹³Elija rui mi khwan tei chu pwkhou, kaphey rui kazaw gumna patna khowlang kaimun khou tei ding the. Khoutei khwan akhat rui kakhou sa the, “Elija, nang mi khou hei tabui sw bam tu cho?”

¹⁴Kamei rui daw the, “RINGHPOUC Ngamparymei Racguangc, ai hei nang tuang siamruai na swna bammei tuang e. Tiki Isaraelmei rui nang khou swloumei latryan sw bakna nang tuang ravchabamv guay sw ra key the khatni nang tuang muczwng guay ta swluai the. Theic nsaekcloumei kiu ai na di the; kaniw rui ata ni swluai khang karamcna bam e.”

¹⁵RINGHPOUC rui sa the, “Damaskas daeng khou naimei tazikramv khou tei nang guang dat tho, kumna mi kaidai khou tei gutna Hazael ta Siriamei tuang guangc khang thauh teylou tho.

¹⁶Nimshi nac mpouh Jehu ta ni Isaraelmei guangc khang thauh teylou tho kumna Abel Meholamei Shaphat nac mpouh Elisha ta nang phaan muhzwng sw lyn khang thauh teylou tho.

¹⁷Hazael baanc khou rui pak duak patpui mei ta tei Jehu rui swluai puni, Jehu baanc khou rui pak duak patpui mei ta tei Elisha rui swluai puni.

¹⁸Tiki alat piu chuyna Baal ta kalum makmei khatni Baal maengc ta kaput makmei Isaraelmei 7000 ta tiringclou puni.”

¹⁹Elija tei tat the kumna Elisha tei guaituamchic pang akhat ta nduanghna lau suak bammei ta ariw the; kahu khou kakang 11 suak bam the kumna kamei theiliang khou suak bam khwan the. Elija rui katuang thiula saenghmei tei luak patna Elisha khou nulou the.

²⁰Khoutei Elisha rui katuang guaituamchic guay tei ganclouna, Elija ta nzwanna pak tatna sa the, “Ai apui apu khou tat kan ni the twna kadylou duc ni he kum e thei ai nang thei lay tat ni the.” Elija rui daw the, “Gay the, tat tho, ai nang ta khaam mak ge!”

²¹Khoutei Elisha rui katuang guaituamchic pang ta tei laana swluaina guaihpuat thing guay tei rui thing swna suangc the. Kamei rui hei tei meic nunc khang tei tii tu the. Mi tangv kamei Elija thei lay tat kan the.