Read Rongmei Naga 1 GUANGH NUNC 2 Bible Online

1 GUANGH NUNC 2 - Rongmei Naga bible

1 GUANGH NUNC 2

¹David tei kamei theic zaic ni khou, kamei rui kanac mpouh Solomon ta kawna nkhamhmei lat swna kady the:

²“Ai theic nimei ganv guang pu the. Nang lung ding ntip bo,

³RINGHPOUC nang Racguangc rui nang khang tiimei latdanv tei piu o. Mousi tuang Riakdanv khou hyloumei latdanv khatni latdyn guay tei piu nina e, kum e thei nang rui taanhmei kathuicna kathai nthai puni.

⁴Nang rui RINGHPOUC lat piu ti thei kamei rui kalatdyng ngaek puni, kalam thu akikta guay rui RINGHPOUC kalat kaniw lung khatni bumaengh guay rui piu nthuihna piu e thei kaniw rui Isaraelmei guangc sw tanh tanna lungc puni twna nrianhlou e.

⁵“Kalam baihmei akhat dat rui, Joab rui Isarael ricpy gaanv nei twmei thu Ner nac mpouh Abner khatni Jether nac mpouh Amasa ta swluaina aruc khou ryanramei tiguang kanmei tei nang ningtow e. Suc-rih ganv khou swluai kanmei khwm khangcna kamei rui suc-rih maek khou kaney ta swluai kanmei tei nang thay e. Kamei rui kakhuay maekmei ta swluai the, kumna kataanv thai tei aruc khou keylou the, akhou ryanramei keylou the.

⁶Tabui tuang sw nina cho twmei nang thay e; kata tei meicriak ram thei titheic lak nina e.

⁷“Gileadmei Barzillai nac mpouh nunc ta thu nzianlou o khatni kaniw ta zauclou o, kalam thu ai nang chaic Absalom hu khou rui pak tat bammei ganv khou ata nkhavlou khwan e.

⁸“Benjaminmei Bahurim kaidaimei Gera nac mpouh Shimei rui ai Mahanaim thangc tat bammei chaenglwan khou ata siang kasicna sianglou khwan e, tiki ai kata Jordan duithuak khou ariw datmei ganv khou kata swluai lak khe twna RINGHPOUC zanc khou rui latdyng swlou kan the.

⁹Tiki nang rui kata dandi tii makna mpatlou nuh mak ge. Tabui sw nina cho twmei nang thay e, kata tei swluai nina e.”

¹⁰David theic the kumna kata David kaidai khou mbeihlou the.

¹¹Kamei Hebron khou tingkwm chanei, Jerusalem khou tingkwm 33, tingkwm 40 Isaraelmei guangc swlou khwan e.

¹²Solomon rui kapu phaan guanghtu lyn the kumna kaguangc bamv tei ntipna swlou the.

¹³Haggit rui puanhmei Adonija tei Solomon pui Bathsheba daeng khou guang the. “Nang guangmei hei nzianmei ramguang dai cho?” twna Bathsheba rui thanv the. “Ngguay, kiuc de,

¹⁴ai nang khou ramhkhat ney khang guang tuang e,” twna daw the. “Tabui tuang cho?” twna Bathsheba rui thanv the.

¹⁵Kamei rui daw the, “Ai rui guangh sw nimei tuang e kumna Isaraelmei guay rui ni ai rui guangh sw pwng e twna ning bam tuang e. Tiki hei tei hamhmei baihmei thiak guangna akainac rui guanghtu kan the, kalam thu hei tei RINGHPOUC rui ningmei the.

¹⁶Kumna ntaw ramh akhat taanclou khang ney nii e; hei tei nuhlou mak tuang swlou rio.”

¹⁷“Mi kiu tabui cho?” twna Bathsheba rui thanv the. Kamei rui daw the, “Shunemmei tunacpui Abishag ta anow khang tii o twna guangh Solomon khou salou o, nang rui sa tina thu kamei nuh mak bam ni tuang hamh e.”

¹⁸Kamei rui daw the, “Gay the, ai rui nang khang guangh khou salou puni the.”

¹⁹Kumna Bathsheba rui Adonija khang kachuc khang guangh daeng khou guang the. Guangh tei ding thauna nkhum keyna kapui ta kalum the. Mi tangv tei Solomon guangh bamv khou dungc key kan the kumna guangh bamv baihmei akhat laaguangna guangh baanzat khou kapui tei dungc the.

²⁰“Nang rui nzianlouna ramh katit na taanclou khang nang khou sa khang guang tuang e, hei tei nuhlou makmei tuang sw rio,” twna kapui rui sa the. “Mi kiu tabui tuang cho? Ai nuhlou mak bam ni tuang hamh e,” twna guangh rui daw the.

²¹Kapui rui sa the, “Nang chaic Adonija now khang Sunemmeipui Abishag ta tii tio.”

²²Guangh rui sa the, “Tabui swna Abishag ta kakhang tii khang ney tu cho? Guangh bamv ni kakhang tii tio twna ney dam bu cho? Tabui bui pwni kamei thu achaic e kumna amuh Abiathar lev Joab rui kabiak liangc the!”

²³Khoutei Solomon rui RINGHPOUC zanc khou ntipmei latdyng akhat kumna sw the, “Adonija rui Abishag ta neymei zaeng rui ai rui kata swluai mak ge thei RINGHPOUC rui ata bai luai diu tho.

²⁴RINGHPOUC rui ata apu David guangh bamv khou ntipna lou the; kamei rui kalatdyng ngaekna guanghdih tei akhou khatni akikta khou tiilou the. Adonija hei aseic kahak theic puni the twmei latdyng hei ringhmei Racguangc zanc saancna latdyng swmei tuang e.”

²⁵Kumna Guangh Solomon rui Benaia khou latdanv pat tina kamei rui Adonija ta swluai the.

²⁶Khoutei Guangh Solomon rui amuh Abiathar khou sa the, “Nang kai Anathot thangc tat tho. Nang hei theic biuc the, tiki ntaw thu ai nang ta swluai lak khe, kalam thu apu ringc bammei douc nang rui Latdyng Khuk tei zauc bam khwan e kumna kamei lev ryanramei dam phungc nchamc bam khwan e.”

²⁷Kumna Solomon rui Abiathar ta RINGHPOUC tuang amuh bamv khou rui laa pat the, kumna Shilo khou RINGHPOUC rui Eli khatni kakikta lam khou saloumei tei guang tangc kan the.

²⁸Heikumna pat kanmei lam tei Joab rui chu the. (kamei Adonija biak thu liangc e tiki Absalom biak thu liangh mak ge.) Kumlana kamei pak tatna ravchapaeng chei tei kouc the.

²⁹Joab tei pak tatna ravchapaeng daeng khou bam the twmei Guangh Solomon rui chu pwkhou tabui swna kamei ravchapaeng khou paklou tu cho twna meic thouclouna thanv the. Kamei Solomon ta pingna RINGHPOUC khou paklou tuang e twna Joab rui daw the. Kumna Joab ta swluai khang Guangh Solomon rui Benaia ta thouc the.

³⁰Kamei RINGHPOUC ta kalummei pheykai thangc tatna Joab khou sa the, “Nang ta pat ro twna guangh rui latdanv tii e.” “Ai pat lak ge, ai hei khou hei theiclou kan ni de,” twna kamei rui daw the. Benaia rui guangh daeng thangc tat lana Joab rui samei tei poulou the.

³¹Solomon rui sa the, “Joab kamei rui samei tei taanclou ti tho. Kata swluaina phup tho. Kum kan e thei Joab rui kakhuay maekmei nei ta swluaimei tuang nwan tei akhou khatni David kikta gaanv khat na khou sini nai bam lak khe.

³²Apu ta tithay makna Joab kamei rui meicdowmei tuang dandi tei RINGHPOUC rui Joab khang tii puni. Joab rui kakhang suangc gaymei kaney khuay maekmei Isaraelmei tuang ricpy Abner lev Judamei tuang ricpy Amasa ta swluai the.

³³Kaney ta swluaimei tuang dandi tei Joab khatni kakikta khou tingsaengc nai puni. Tiki guangh bamv khou bammei David kikta guay khou thu zaw kauhmei tiilou puni.”

³⁴Kumna Benaia tei RINGHPOUC tuang pheykai thangc tatna Joab ta swluai the kumna katuang ramv nwmbangc khou phuplou the.

³⁵Guangh rui Benaia ta Joab bamv khou rihpy khatni Zadok ta Abiathar bamv khou amuh tiswlou the.

³⁶Khoutei guangh rui Shimei ta kawna sa the, “Jerusalem khou hei nang khang kai kasiamh tho. Khou hei lungc bam o, kaidai paengc pat nuh mak ge.

³⁷Nang kaidai paengc patna Kidron duithuak tat twan pat re thei nang theic puni — theic e thei nang khuay de.”

³⁸Shimei rui daw the, “Gay the, nang rui samei tei ai piu ni the.” Kumna kamei Jerusalem khou tingsaengc sihna lungclou khwan e.

³⁹Tingkwm kathumh tangv Shimei tuang bangc gaanv nei kakhou rui pak tatna Gatmei guangc Maaka nac mpouh Akis khou paklou khwan e. Kaney tei Gat khou bam the twmei Shimei rui chu lana

⁴⁰kamei katuang kuanniam tuangcna Gat thangc Akis daeng thangc kabangc nei ta laa dat khang tat the. Kamei rui kabangc nei ta tei phungc guang dat the.

⁴¹Kumna Shimei tei Jerusalem khou rui Gat thangc tatna ngalanc guang datmei chamv tei Solomon rui chu pwkhou,

⁴²kamei rui Shimei ta kawna sa the, “Nang Jerusalem khou rui tatpat nuh mak ge twna ai rui nang ta RINGHPOUC zanc khou rui latdyng tisw kan the. Nang pat re thei theic puni twna ai rui nang khou salou kan the. Nang hei tei nuhna piu ni the twna sa kan mak dai?

⁴³Kum e thei tabui swna nang latdyng sw bakna alat liam tu cho?

⁴⁴Nang rui apu David khou taanc nkhuailou kanmei guay tei nang thay nthan thiak bam tuang de. RINGHPOUC rui mi tuang dandi tei nang khang tii puni the.

⁴⁵Tiki RINGHPOUC rui ata suaihiamlou puni kumna David tuang guangcdic tingsaeng sw ntiplou bam puni.”

⁴⁶Khoutei Solomon rui latdanv pat tina Benaia rui Shimei ta swluai the. Ntaw thu Solomon rui ramh kaguayna sin bin the.