Read Rongmei Naga 1 GUANGH NUNC 20 Bible Online

1 GUANGH NUNC 20 - Rongmei Naga bible

1 GUANGH NUNC 20

¹Siriamei guangc Benhadad tei katuang ricmei guay ta khuam kaduai the kumna kandih sinmei gaanv 32 rui ni kaniw tuang takuanc lev takuanh gari tiina kaniw kahak kazauhna nkhav the. Mi guangc tei rui Samaria ta dingbinna adow the.

²Kamei rui kaidai lungc khou tei latdiumei thouc gutna Isaraelmei guangc Ahab khou kumna sa the,

³“Nang tuang daandi, kachaekc, gay liangmei nang now nunc khatni nang nac nunc tei atuang de” twna Benhadad rui sa the.

⁴“He apoubauhmei Guanghle, nang rui samei kumcna ai khatni akhou naimei kaguay hei nang tuang de.”

⁵Mi tangv tei Benhadad tuang latdiumei nunc guangna Benhadad rui kumna sa e twna Ahab khou sa the. “Nang tuang daandi, kachaekc, nang now nang nac guay ta tei akhang tii nina e twna ai rui sa guang kan the.

⁶Ntaw thu ai rui atuang meicdaihmei nunc ta nthuanh mi kumhmei ganv khou thouc guang puni the kumna kaniw rui nang tuang meicdaihmei nunc khatni nang tuang guangh kai guay kariu karianna kamanv kunghmei puat guay kaniw rui laa kan puni.”

⁷Guangh Ahab rui kakandic tuang kapy swmei guay ta kawna kaniw khou sa the, “Mipu hei rui aniu ta swmutlou niina bam the twmei nangniw how the. Anow guay, anac guay, daandi khatni kachaekc guay kakhang tii o twna katuang latdiumei thouc guangna sa the. Hei tei ai nuhlou the.”

⁸Kapy nunc khatni meic nunc tei rui daw the, “Kamei rui samei tei nking riu; kakhou gutlou riu.”

⁹Kumna Ahab rui Benhadad tuang latdiu tatmei nunc khou tei sa the, “Kamei rui ney reymei tei thu ai tii nuh the, tiki kaneimei tei thu nuh mak ge twna akaipouc guangh khou sa tio.” Latdiumei nunc tei tat dat kan the kumna

¹⁰Benhadad khou rui chamv akhat kumna tiguang dat the: “Nang tuang kaidai tei swkamut kamailouna tat pangv keyloumei tauc guay tei khuaic nthan thiak biuhmei meic phungc guang puni the. Ai rui hei tei taanclou mak ge thei rav rui ata bai luai kan di tho!”

¹¹Guangh Ahab rui daw the, “Rihmei ling tei thu rih luai khou rui kagaengh swmei tuang de, kahu khou hamh e twna guangh Benhadad khou sa tio.”

¹²Guangh Ahab rui sa guangmei chamv tei Benhadad tei kabiak lianghmei dihsinpouc nunc lev kaniw tuang pheykai khou zouh zangv bammei ganv khou chu guang khwan the. Khoutei mi kaidai ta tei adow khang chamdaanv tho twna kamei rui katuang mei nunc khou latdanv pat kan the, kumna kaniw adow khang chamdaanv the.

¹³Mi ganv khou tei muhzwng gaanv khat Guangh Ahab daeng khou guangna sa the, “RINGHPOUC rui sa e, ‘Mi rihmei kangdai ta tei ping riu! Ai rui kaniw ta aseic hei nang baanc khou tiilou puni, khou kiu ai hei RINGHPOUC e twmei nang thay puni.’ ”

¹⁴“Thow rui kapy swna adow nina cho?” twna Ahab rui thanv the. Muhzwng tei rui daw the, “Kandih langv sinmei kapy nunc bangc khou bammei ricmei chabwan nunc tei rui kapy sw nina e twna RINGHPOUC rui sa e.” “Thow rui rih tei adow thau rey nina cho?” twna guangh tei rui thanv dat re. “Nang rui the,” twna muhzwng tei rui daw the.

¹⁵Kumna kandih langv langv tuang rihpy nunc bangc khou bammei rihmei chabwan nunc ta tei guangh rui kaw guang the, kumna kaniw tei meic guayna gaanv 232 the. Mi tangv Isaraelmei ricphyan guay ta ni kabai the kumna rihphyan 7000 khuam guang the.

¹⁶Benhadad khatni kabiak lianghmei guangh 32 tei lev twna kaniw tuang pheykai khou zouh zangv mbana bammei ganv khou, kalaanv neihdyng khou adow the.

¹⁷Rihmei chabwan guay tei huna gut the. Benhadad rui thoucloumei rihtiumei nunc rui Samaria thangc rui rihmei kang akhat pat the twna sa the.

¹⁸Khoutei kamei rui latdanv pat the, “Kaniw adow khang pat tu ny, gutlou khang pat tu ny thay mak ge, kaniw ta tei nringh nym o.”

¹⁹Rihmei chabwan nunc tei hu thwangna, mi thei khou tei Isaraelmei ricphyan guay tei laylouna adow gut the.

²⁰Kaniw kathuic tei kamei kamei rui akhangvmei kathuic ta tei swluai the. Siriamei tei pak kan the kumna Isaraelmei rui nthau ranvna nthau the, tiki Benhadad tei thu takuanh tuangcna takuanh ricmei gaanvsaekc ta nduanghna pak duak kan the.

²¹Guangh Ahab tei rui adow gutna takuanh khatni takuanh gari pang tei ngam the, kumna Siriamei ta dow mutsutlou the.

²²Khoutei muhzwng tei Guangh Ahab daeng khou guangna sa the, “Nang tat dat lana nang tuang ricmei kasiamh tho, chamdaanv chuyna chamdaanv tho, kalam thu Siriamei guangc tei nkun lauphwnswan khou guang adow dat puni the.”

²³Guangh Benhadad khou katuang meicdaihmei nunc rui sa the, “Isaraelmei tuang rav hei chyng rav tina kaniw rui aniu ta ngam bammei tuang e. Tiki kaniw ta nzaengc khou adow e thei thu aniu rui suai makna ngam puni de.

²⁴Ntaw thu kandih sinmei 32 ta tei rihpy bamv khou rui laa ganc tho kumna rihpy baihmei lou dat tho.

²⁵Theic kanmei rihmei zu tei, takuanh lev takuanh gari ni mi sing tei lev nchamcna khuam dat tho. Aniu rui kaniw ta nzaengc khou adow puni kumna aseic luan thu aniu rui kaniw ta ngam puni the.” Guangh Benhadad rui hei tei nuh the kumna kaniw lat tei laa the.

²⁶Guang datmei kwm lauphwnswan khou Benhadad tei kamei nunc ta kaw kaduaina kamei nunc ta nduanghna Isaraelmei ta adow khang Aphek kaidai khou guang the.

²⁷Isaraelmei guay ta ni kaw kaduaina rih khang chamdaanv the; kumna kaniw tei pat lana kakang kanei patna Siriamei biak karihna zypui kasiamhna bam the. Mi ramvpuk kapwm khou bam padikna bammei Siriamei tei lev kida pwkhou Isaraelmei kang kanei tei ziuh kang lau launa kumc the.

²⁸Muhzwng tei guangh Ahab khou guangna sa the, “RINGHPOUC rui sa e: ‘Ai hei chyng rav de, nzaengc rav hamh e twna Siriamei rui samei zaeng rui kaniw tuang ricmei kangdai ta tei nangniw baanc khou tiilou puni the, khou kiu ai hei RINGHPOUC e twmei nang khatni nang mei nunc thay puni the.’ ”

²⁹Isaraelmei khatni Siriamei tei zaeng chanei zypui bam achowna bamlou the. Zaeng chaneimei nungc kaniw adow thau the, kumna Isaraelmei rui Siriamei meic 1,00,000 ta dow luai the.

³⁰Theic nsaekcloumei nunc tei Aphek kaidai khou paklou the, khoutei kaidai raengc mpangv keyna kaniw gaanv 27,000 ta pangv bin the. Benhadad ni mi kaidai khou tei paklouna kai akhat tuang kalungcmei kailangv akhat khou dup the.

³¹Katuang meicdaihmei nunc rui kadaeng khou guangna sa the, “Isaraelmei guangc nunc thu zauzian thay e twmei aniu chu the. Aniu zaengsiphey nsuay lana aniu guang khou riang kasiatclouna guangh daeng khou guang zauc me, kum e thei kamei rui aniu panty ta kanlou kho ni nuh e.”

³²Kumna kaniw rui zaengsiphey nsuay lana, kaniw py khou riang kasiatclouna Ahab daeng khou guangna sa the, “Nang bangc Benhadad rui kapanty na thu kanlou o twna huay bam e.” Ahab rui daw the, “Kamei ringc bam dina cho? Gay the! kamei hei achana kumh tuang de!”

³³Benhadad tuang meicdaihmei guay tei tabui gaymei latkaeng sa pat puni cho twna zauc bam khou Ahab rui “Chana” twmei latkaeng hei sa pat pwkhou hei tei khuaic rapna “Benhadad ta nang chana the twna nang sa kan the cho!” twna kaniw rui Ahab khou sa the. “Kata adaeng khou nduangh guang o,” twna Ahab rui latdanv pat the. Benhadad tei guang pwkhou, Ahab rui kata katuang takuanc gari khou guang dungc o twna kaw the.

³⁴Benhadad rui kakhou sa the, “Apu rui nang pu khou rui laa kanmei kaidai guay tei tii dat ni the, khatni apu rui Samaria khou lanvguanhmei bamv kasiamhloumei kumcna, nang ni Damaskas khou lanvguanhmei bamv kasiamh thau khang tii ni the.” Ahab rui daw the, “Mi zaeng rui ai rui nang ta mpatlou puni the.” Kamei lev latryan tiswlouna mpatlou dat kan the.

³⁵RINGHPOUC tuang latdanv theilayna muhzwng kang akhat tuang gaanv khat pu rui kapammei gaanv khat ta kata bai o twna sa the, tiki mipu tei bai mu the.

³⁶Kum tina mipu tei rui kapammeipu khou tei sa the, “Nang rui RINGHPOUC tuang latdanv piu makmei zaeng rui nang akhou rui tatpat rappui lev kamangliangpui rui nang ta nkay luai puni the.” Kumna kamei tat pat rappui lev kamangliangpui guangna kata nkay luai the.

³⁷Mi muhzwngpu tei baihmei gaanv khat daeng khou guangna sa the, “Ata bai o.” Mipu tei rui bai the kumna bai ranv sihna baina zamh the.

³⁸Muhzwng tei kazaw phey rui duamlouna kalwn tithay makna Isaraelmei guangc tei patmei ta nkhwanna chaeng daeng khou ding bam the.

³⁹Guangh tei tatpat pwkhou muhzwng tei rui kawna sa the, “Guanghle, ai rihbamv khou bam khou rihmei gaanv khat rui zauczihmei gaanv khat ta nym guangna akhou nsinlouna, ‘Mipu ti hei nang zauc nina e, kamei pak duak kan e thei mi khang tei nang theic puni hamh e thei daandi paek 3000 khap nina e,’ twna sa the.

⁴⁰Tiki ai kalam baihmei akhat khou tynna bam kan khou rui, mipu tei pak duak kan the.” Guangh rui daw the, “Nang nkhuai the twmei nang rana rui sa di the, mi tuang dandi tei nang phungc nina di the.”

⁴¹Muhzwng tei rui kazaw duamloumei phey tei siatkaek pat the khou tei kamei muhzwng akhat re twmei thay the.

⁴²Khoutei muhzwng tei rui guangh khou sa the, “Mi hei RINGHPOUC tuang lat re: ‘Ai rui swluai o twna latdanv tiiloumeipu ta tei nang rui mpatloumei zaeng rui mi khang tei nang theic nina the, khatni nang tuang ricmei nunc ta ni kaniw rui Benhadad tuang ricmei nunc ta mpatloumei zaeng rui swmaan puni the!’ ”

⁴³Guangh tei kalung ryanrana Samaria thangc hanc dat kan the.