Read Rongmei Naga 1 GUANGH NUNC 21 Bible Online

1 GUANGH NUNC 21 - Rongmei Naga bible

1 GUANGH NUNC 21

¹Jezreel khou Guangh Ahab kai kaidaeng khou Nabot twna kawmeipu tuang drakhalau akhat nai khwan e.

²Zaeng neih khat Ahab rui Nabot khou sa the, “Nang tuang drakhalau tei akhang tii o; hei tei atuang guanghkai daeng khou nai e kumna hei tei ai gannuy pannu lingh khang sinsw nii e. Mi phaan tei mi khang tei suangc gaymei drakhalau tii lyn puni, nang rui kahaw e thei thu kamanv ni geicna tii puni de.”

³“Mi drakhalau hei apu apouc tuang de, mi hei zuanh khang RINGHPOUC rui nuh mak ge!” twna Nabot rui daw the.

⁴Nabot rui samei khou tei Ahab kalungpuamcna kakai tat dat the. Kamei laeng thei zip karihna ramhtu ramhzangv makna bam the.

⁵Kanow Jezebel rui kadaeng khou guangna “Tabui swna heidi neihla makna bam tu cho? Tabui swna nang tu mak zangv makna bam tu cho?” twna thanv the.

⁶Kamei rui daw the, “Nabot lat zaeng rui ai neihla makna e. Ai rui katuang drakhalau liu me, hamh e thei baihmei akhat lev akhiak kho twna sa tiki, hei tei akhang tii ngam mak ge twna sa the!”

⁷“Gay the, nang guangh hamhna cho? Thau tho neihlana tu tho zangv tho. Nabot tuang drakhalau tei ai rui tii puni,” twna Jezebel rui daw the.

⁸Jezebel rui tatdyn asaekc hy lana mi khou tei Ahab tuang suai swlou the khatni Ahab tuang sil diangclou the, kumna mi guay tei Jezreel khou bammei meicdaihmei khatni gaanvthaih guay khou nzanhlou the.

⁹Mi tatdyn khou tei kumna hylou the: “Munthianghmei tingmik akhat kauc pat tho, kumna meic guayna ta kaw kaduai tho, kumlana Nabot khang chakhwang swmei bamv tii tio.

¹⁰Kumna meic gaanv nei ta kahu khou tidungc achowlouna mi nei tei rui Nabot ta tei kamei Ravguangc ta khatni guangh ta siang the twna sa kan diu. Kumna kata tei kaidai paengc thangc zay patna ntauh nkwam luai tho.”

¹¹Jezreel khou bammei meicdaihmei khatni gaanvthaih guay tei rui Jezebel rui latdanv tiimei kumcna taanc the.

¹²Kaniw rui munthianghmei tingmik akhat kauc patna, meic guayna ta kaw guang kaduaina Nabot ta chakhwang swmei bamv khou tidungclou the.

¹³Khuay nkham nimeipu nei tei rui kamei Ravguangc ta khatni guangh ta sa kasic the twna meic guayna hu khou sa the. Kumna kata kaidai paengc thangc zay patna ntauh nkwam luai the.

¹⁴“Nabot ta swluai the,” twmei chamv Jezebel khou tii guang the.

¹⁵Jezebel rui chamv tei chu rappui lev, kamei rui Ahab khou sa the, “Nabot theic the. Kamei rui nang khang zuanclou zihmei drakhalau tei ntaw thu laa tho.”

¹⁶Kadyng mak khou Ahab tei drakhalau thangc tei tatna hei tei laa the.

¹⁷Khoutei Tisbemei muhzwng Elija khou RINGHPOUC rui sa the,

¹⁸“Nang Samariamei guangc Ahab daeng thangc tei tat ro. Kamei ntaw Nabot tuang drakhalau khou bam e, kamei hei tei laa ni the twna sa bam the.

¹⁹RINGHPOUC ai rui kumna sa e twna kakhou kumna sa tio, ‘Nang rui mipu ta tei swluaina katuang lanv ni laa ni twna cho? Nabot zei si rui aliakcmei bamv kahak khou tei nang zei ni si rui aliakc puni the.’ ”

²⁰Ahab rui Elija ta ariwna sa the, “Ata zauczihmeipule, nang ata nymtow thena cho?” Elija rui daw the, “Ngguay, ai nym the. Nang hei RINGHPOUC tuang mikzaw khou nkhuaimei tei taanh khang nang lung gut phumna bam bu the.

²¹Kumhpui zaeng rui RINGHPOUC rui nang khou sa the, ‘Ai rui nang ta swmaan puni the. Ai rui nang ta swluai ganc puni the, nang kai kaikhuncmei nggaanvmei guay ta alauc gaanvthaih kadah makna swluai puni the.

²²Nang kai kaikhunc hei Nabot nac mpouh Guangh Jeroboam kai kaikhunc khatni Ahija nac mpouh Guangh Baasha kai kaikhunc kumc puni the, kalam thu nang rui Isaraelmei ta paapc khou zaylouna alungpuam tithaulou the.’

²³Jezabel tuang pumc ta ni Jezreel kaidai khou si nunc rui tu puni the.

²⁴Nang kai kaikhuncmei kaidai khou theicloumei guay tei si guay rui tu puni the khatni ramvpuk khou theicloumei guay ta langdia rui tu puni the.”

²⁵(Ahab kumcna RINGHPOUC tuang mikzaw khou simei tuang taanv taanh khang kalung gut phum kanmei meic baihmei maek khe— mi guay tei kanow Jezebel rui katiulouna taanhmei tuang e.

²⁶Isaraelmei rui guang pwkhou RINGHPOUC rui alay ganc kanmei Amormei nunc kumcna ravmaengc kalumna zak kasicmei paap kamei taanc the.)

²⁷Elija rui hei tei salou pwkhou, Ahab tei kaphey siatkaekna, kapheybaan luak gancna zaengsiphey piu the. Kamei tuzangv mak khe, kumna zaengsiphey khou zip lana kalung ryanrana ruan tat the.

²⁸RINGHPOUC rui muhzwng Elija khou sa the,

²⁹“Ahab rui ahu khou niamh keyna bammei ta nang how bu cho? Kamei rui kumna niamh keymei zaeng rui karingcting khou thu mi dandi hei tiguang lak khe; kanac zuk khou mi kamut kamaimei hei Ahab kai kaikhunc khou tiguang puni the.”