Read Rongmei Naga 1 GUANGH NUNC 22 Bible Online

1 GUANGH NUNC 22 - Rongmei Naga bible

1 GUANGH NUNC 22

¹Isaraelmei lev Siriamei kak khou tingkwm kathumh nchu-nzaenghna lungc bam dat khwan e,

²tiki kathumhmei kwm Judamei guangc Jehoshaphat rui Isaraelmei guangc Ahab ta ariw khang guang khwan e.

³Ahab rui katuang meicdaihmei nunc khou thanv khwan e, “Gilead khou naimei Ramot kaidai hei Siriamei baanc khou rui laa pat dat khang tabui swna aniu karamh mak tu cho? Hei tei aniu tuang de!”

⁴“Ramot kaidai ta adow khang nang ni lay kazauhlou nuh puni cho?” twna Ahab rui Jehoshaphat khou sa the. Jehoshaphat rui daw the, “Nang tat ni thei thu ai ni nuh the. Atuang ricmei khatni takuanh ricmei guay ni tat puni the.

⁵Tiki RINGHPOUC khou thanv rey kho.”

⁶Kumna Ahab rui muhzwng 400 dou ta kaw kaduaina kaniw khou sa the, “Ai Ramot kaidai ta adow kho ny adow nangh cho?” “Adow tho, RINGHPOUC rui rih tingamlou puni the,” twna kaniw rui daw the.

⁷Tiki Jehoshaphat rui sa the, “Aniu RINGHPOUC chwn thanv nuhmei muhzwng baihmei maek khena cho?”

⁸Ahab rui daw the, “Gaanv khat nai e, kamei Imla nac mpouh Mikaia e. Tiki ai kata thu karaeng e, kalam thu kamei akhang gay khang salou zat mak ge; simei lat rana sa e.” “Nang heikumna sa nina hamh e” twna Jehoshaphat rui daw the.

⁹Khoutei Ahab rui latzankai khou meicdaihmei gaanv khat ta kaw guangna Mikaia ta katumcna kaw guang o twna thouc the.

¹⁰Mi guangc nei tei guangh pwan piuna Samaria tuang raengh paengc khou laudybamv khou dungcna bam the, kumna muhzwng guay tei kanei mav khou ravmun dincna bam khwan e.

¹¹Kaniw pang khou gaanv khat, Kenaana nac mpouh Zedekia rui ntanh tuang guaihchei kasiamh lana Ahab khou sa the, “RINGHPOUC rui sa the: ‘Mi hei rui nang rui Siriamei ta apwanna khai puni kumna kaniw ta swmutsutlou puni.’ ”

¹²Muhzwng guayna tei hei tei kumcna sa ngam the. “Ramot ta adow tho, nangniw ngam puni the. RINGHPOUC rui nang ta tingamlou puni,” twna kaniw rui sa the.

¹³Mi ganv khou tei, Mikaia daeng thangc tat kanmei meicdaihmeipu tei rui Mikaia khou sa the, “Guangh rui rih ngam puni de twmei muhzwng baihmei guay rui thu sa the, nang ni hei tei kumcna samei gay pwng e.”

¹⁴Tiki Mikaia rui daw the, “Ringc bammei RINGHPOUC zanc saancna samei tuang e twmei thu kamei rui samei tei ai rui sa puni!”

¹⁵Mikaia tei guangh hu khou guang pwkhou guangh rui kakhou thanv the, “Mikaiahle, guangh Jehoshaphat aney Ramot kaidai ta adow kho ny adow nangh cho?” “Mikaia rui daw the, Adow tho! Nang ngam puni de. RINGHPOUC rui rih tingamlou puni.”

¹⁶Tiki Ahab rui sa the, “Nang RINGHPOUC zanc khou rui sa khou, akhou latling sa o! Latling sa o twna ai nang khou azuh sa bam nina cho?”

¹⁷Mikaia rui daw the, “Isaraelmei tei gaengcloumei maekmei lauziu pang kumcna chyngbut khou zin phak zinza bammei ta ai how the. Khoutei RINGHPOUC rui sa the, ‘Mi mei nunc hei kaniw tuang kapy swmei maek khe; kaniw ta nchu nrina kakai kakai ti tat dat tho.’ ”

¹⁸Ahab rui Jehoshaphat khou sa the, “Kamei rui akhang ramh gaymei khat na sini salou mak ge twna ai sa kan makna cho? Ramh khat simei thu salou tan de!”

¹⁹Mikaia rui sa dat re, “RINGHPOUC rui samei hei nking o! RINGHPOUC tingkauh thangc kaguangc bamvpaeng khou dungcna baanchara guay rui kadaeng khou ding bammei ta ai how e.

²⁰Khoutei RINGHPOUC rui thanv the, ‘Ahab tei Ramot khou tatna mi khou tei kata swluai nuh khang thow rui kata guat ni cho?’ Baanchara guay tei lat nchamh makna kaphianhna bam the.

²¹Khoutei bumaengh akhat tatpatna RINGHPOUC daeng khou guangna ‘Ai rui kata guat ni the,’ twna sa the.

²²‘Nang tukumhna guat nina?’ twna RINGHPOUC rui sa the. Bumaengh tei rui daw the, ‘Ai tatna Ahab tuang muczwng guay ta tei tisaraamclou puni the.’ RINGHPOUC rui sa the, ‘Nang tat lana kata guat tho. Nang ngam puni the.’ ”

²³Mikaia rui nkhamh khou sa dat re: “Pat kanmei tei mi hei the. RINGHPOUC rui nang tuang muczwng nunc ta tisaraamclou the. Tiki nang kamut kamaimei ariw puni the twmei hei RINGHPOUC tuang latdyng di the!”

²⁴Khoutei muhzwng Zedekia rui Mikaia daeng khou guangna kabiangc kaphina sa the, “Tabui nungc rui RINGHPOUC tuang bumaengc akhou rui tat patna nang khou kachuclouna cho?”

²⁵“Nang kaitheimei kailangv thangc nkamh khang gutpui nungc kiu hei tei nang thay puni,” twna Mikaia rui daw the.

²⁶Khoutei guangh Ahab rui katuang meicdaihmei gaanv khat khou kumna latdanv pat the, “Mikaia ta nymna kaidai tuang guanghkhyn Amon lev Guangh nac Joas daeng thangc zay tat tho.

²⁷Ai gayna guang dat mak saanv kata kangkai khou lou o, kumna kakhang ntyan tit na lev dui na tii o.”

²⁸Mikaia rui sa the, “Nang gayna guang dat re thei RINGHPOUC rui akhou salou timakna the! Ai sa kanmei tei meic guayna chu lo.”

²⁹Isaraelmei guangc Ahab lev Judamei guangc Jehoshaphat tei Gilead khou naimei Ramot kaidai ta adow khang tat the.

³⁰Ahab rui Jehoshaphat khou sa the, “Anei rihbamv khou gut pwkhou nang guangh pwan piu tho, ai thu alwn kalaih puni the.” Kumna Isaraelmei guangc tei kalwn kalaicna rihbamv khou gut the.

³¹Siriamei guangc rui katuang takuanc gari tuang kapy nunc 32 khou kaniw rui meic baihmei ta hamhna Isaraelmei guangc ta tunna adow nina e twna latdanv pat the.

³²Kumna kaniw rui Jehoshaphat ta Isaraelmei guangc khwang the twna kata adow khang tun guang the. Tiki kamei rui kauc thau pwkhou,

³³kamei tei Isaraelmei guangc hamh e twmei thay pat the, kumna kaniw adow nthaekc the.

³⁴Tiki Siriamei ricmei gaanv khat rui katuang saucpai kaap pat pwkhou kadou chana guangh Ahab ta katuang rihpwan kak khou pailu tei gutna kabiu the. “Ata kabiu the, thei karihna rihbamv khou rui tat pat tho,” twna kamei rui katuang gari thouhmeipu khou kauc the.

³⁵Rih tei adow ranvna adow bam khou, guangh Ahab tei katuang takuanc gari khou Siriamei biak karihna aliauna bam the. Katuang takuanc gari pang tei kazei rui chunh chun the, kumna tingzyn key pwkhou kamei theic the.

³⁶“Meic kathuicna kakai kai hanc dat tho!” twna neih key zaic ni khou Isaraelmei rihmei kapwm khou tei latdanv pat the.

³⁷Heikumna guangh Ahab tei theic the. Kapumc tei Samaria khou phungc guangna mbeihlou the.

³⁸RINGHPOUC rui sa kasuakcloumei kumcna katuang takuanc gari tei kapumc zuanhmeipui nunc rui duilowmei duikhunc khou khiu the kumna si nunc rui kazei aliakc the.

³⁹Guangh Ahab rui taancloumei baih baihmei guay, guanghkai tei guaipuang nei rui karuhmei khatni kamei rui kasiamhloumei kaidai guay lam khou kazauhna Isaraelmei guangc nunc tuang panty Chak buk khou hylou the.

⁴⁰Kamei theic kan pwkhou kanac mpouh Ahazia rui kaphaan guanghtu lyn the.

⁴¹Isaraelmei guangc Ahab rui guanghtumei tuang padeihmei kwm Asa nac mpouh Jehoshaphat tei Judamei guangc sw the.

⁴²Kamei katingkwm 35 khou guangh swna kamei Jerusalem khou tingkwm 25 guangh swlou khwan e. Kapui rui Shilhi nac aluhpui Azuba khwan e.

⁴³Kamei kapu Asa kumcna RINGHPOUC tuang mikzaw khou nchumhmei taancna lungc khwan e; tiki kamei rui rav baih baihmei ta kalummei bamv guay tei thu swmaan mak khwan e kumna meic nunc tei mi bamv guay khou tei khaengna khatni agaw nteina kalum bam khwan e.

⁴⁴Jehoshaphat tei Isaraelmei guangc lev nchu-nzaenghna lungc khwan e.

⁴⁵Jehoshaphat rui taancloumei baih baihmei guay, kamei rui baucna rihbamv khou adow kanmei hei guay hei Judamei guangc nunc tuang panty Chakh buk khou hylou the.

⁴⁶Kapu Asa zuk khou rui ganclou duhmei ntumei nggaanvmei kapumc zuanhmei nunc ta kamei rui swmaan ngam khwan e.

⁴⁷Edom kandic tei guangh maek khwan e; mi kandic ta tei Judamei guangc rui thoucloumei gaanv khat rui sin khwan e.

⁴⁸Guangh Jehoshaphat rui duipui khou tatmei rungh pang kasiamh khwan e kumna mi guay tei Ophir kandic thangc kachaekc laa khang tat khwan e, tiki mi guay tei Eziongeber khou bakna tat dat taan khwan e.

⁴⁹Mi tangv tei Isaraelmei guangc Ahazia rui katuang mei nunc lev Jehoshaphat mei nunc rungh chau tat kariu khang sa khwan e, tiki Jehoshaphat rui nuhlou mak khwan e.

⁵⁰Jehoshaphat tei theic the kumna David kaidai khou guangh nunc tuang tarou khou mbeihlou the, kumna kanac mpouh Jehoram rui kaphaan guanghtu lyn the.

⁵¹Judamei guangc Jehoshaphat rui guanghtumei tuang 17 kwm Ahab nac mpouh Ahazia rui Isaraelmei guangc sw the, kumna kamei Samaria khou tingkwm kanei guangh swlou khwan e.

⁵²Kamei kapu Ahab, kapui Jezebel, khatni Isarael ta paapc khou zayloumeipu guangh Jeroboam tuang simei taanv guay tei lay luaihna RINGHPOUC hu khou paapc taanc the.

⁵³Kamei kahu khou lungcloumei kapu kumcna Baal ta kalumna kamei rui RINGHPOUC Isarael Racguangc tuang lungpuam tithau khwan e.