Read Rongmei Naga 1 GUANGH NUNC 3 Bible Online

1 GUANGH NUNC 3 - Rongmei Naga bible

1 GUANGH NUNC 3

¹Solomon rui Izipmei guangc nac ta kanow khang kawna kaney nggyang the. Kamei rui katuang guangckai lev Ravkai kasiamh luai mak saanv khatni Jerusalem raengc raeng luai mak saanv kamei rui mipui ta tei nduangh guangna David tuang kaidai khou tilungclou khwan e.

²Mi douc tei RINGHPOUC khang ravkai kasiamhlou mak he kum tina meic nunc tei ravchabamv baih baih khou khaeng tat bam khwan e.

³Solomon rui RINGHPOUC ta nzianna kapu David rui nchamloumei ta piuna lungc the, tiki kamei ni khouringh swluaina ravchabamv kabamv mpeyna khou khaengna bam khwan e.

⁴Zaeng neih khat kamei Gibeon thangc ravkhaeng khang tat khwan e, kalam thu mi khou tei kazanc tatmei ravchabamv nai khwan e. Solomon rui mi khou tei rawna khaengmei 1000 kat khwan e.

⁵Mi nungc zingbangc tei RINGHPOUC kakhou mang thangc rui guangna “Nang khang tabui tiiloumei ta laa niina cho?” twna thanv the.

⁶Solomon rui daw the, “Nang rui apu nang bangc David ta daicna nzian tanh tanna nzianlou the kumna kamei ni lungning nthanna nang ta nzianna lungc bam khwan e. Nang tuang taek makmei ramzian paan rui aseic kaphaan guanghtu lyn bammei kanac mpouh ti hei kakhang tiilou the.

⁷He RINGHPOUC Ravguangc, ai hei alaucna kandih sin thay makmei bam sini nang rui ata apu phaan guangh tiswlynlou the.

⁸Nang rui nang tuang mei khang kadahloumei, kasing chak dat thay lakmei meic pang khou hei ai bam the.

⁹Ai rui meic nunc ti hei nchamna sin thay khang khatni simei gaymei thay khang ningting tiilou o. Kum mak ge thei ai rui akumhna heizumei nang tuang mei nunc ti hei sin ngam nina cho?”

¹⁰Solomon rui ningting khang neymei tei RINGHPOUC rui pian the,

¹¹kumlana kamei rui Solomon khou sa the, “Nang rui nang panty lungsing khang hamh e thei lungcgay chingkhiuh khang hamh e thei nang ta zauczihmei nunc ta swluai khang ney makna nchumhna kandih sin khang ningting neymei zaeng rui

¹²nang rui neymei tei taanclou puni the. Maansei gaanv khat na khou sini tiilou kan makmei khatni tiilou dat lak nimei ningting ai rui nang khang tii puni the.

¹³Nang rui ney makmei ni ai rui nang khang tiilou puni, mi kiu thu guangh baih baihmei khou suangc nang khou nang panty saanvsaengh lanv khatni chakhwang champouhmei tiilou mbu puni.

¹⁴Nang pu David kumcna nang rui alat piuna atuang latdanv khatni latdyn guay ngaek bam e thei, ai rui nang ta panty tilungcsinglou puni.”

¹⁵Solomon tei zip thau pwkhou Ravguangc rui kata kachuclou the twmei thay the. Mitangv kamei Jerusalem thangc tatna RINGHPOUC tuang Latdyng Khuk hu khou dingna rawna khaengmei khatni alamvpuatkat kat the. Mi tangv tei kamei rui katuang meicdaihmei guay khang khwmkic the.

¹⁶Zaeng neih khat kapumc zuanhmeipui gaanv nei guangh Solomon hu khou guang the.

¹⁷Kaney pang khou gaanv khat rui sa the, “Guanghle, mipui aney hei kai akhat na khou lungc bam tuang e, kumna akai khou kamei bam khou ai nah mpouh gaanv khat puanclou the.

¹⁸Mi tangv zaeng neih thumh puinungc kamei ni nah mpouh gaanv khat puanc the. Mi kai khou tei aney rana bam tuang e — meic baihmei gaanv khat na sini bam mak ge.

¹⁹Neih khat zingbangc thu kamei rui kanac ta tei niangc luai the.

²⁰Kumna ai zip tat kanmei thei thangc anac tei kamei rui puanc tatna kanac theihmei tei alaeng khou guanglou the.

²¹Ai zip thauna mi nac ta tei kahi pwki theic bam khwan the. Ai rui mi nac ta tei zauc mincna zauc pwki mi nac tei anac hamh khwan the.”

²²Gaanv khat pui tei rui sa the, “Kiuc hamh e! Ringhmei nac tei anac de, theihmei tei kanac de!” Reymei pui tei rui daw the, “Kiuc hamh e! Theihmei nac tei nang nac de, ringhmei tei anac de!” Heikumna kaney guangh hu khou agi the.

²³Guangh Solomon rui sa the, “Nangney hei ringhmei nac ta tei anac de twna asut akhyam the.”

²⁴Kamei rui baengsaeng laaguang khang thouc the kumna hei tei laaguang pwkhou

²⁵kamei rui sa the, “Mi ringhmei ngana ta tei kanei khang dantapna nzanhlou ti tho.”

²⁶Kapui ling tei rui kalung syng thangc rui mi nac ta tei nzianna guangh khou sa the, “Guanghle, mi nac ta tei swluailou ri tho, mipui khang hei tii ti tho!” Tiki gaanv khat pui tei rui sa the, “Aney gaanv khat na khang sini tii nangh e, mi nac ti hei kaney khang dantap rap tho.”

²⁷Khoutei Solomon rui sa the, “Mi nac ta tei swluai ri tho. Reymei pui khang tei tii ti tho — kamei kapui ling the.”

²⁸Solomon tuang latzan lam tei Isaraelmei guay rui chu pwkhou kaniw rui guangh ta ningkaruh thau the, kalam thu latzan nchumhna sw khang Ravguangc rui kakhou ningting tiilou the twmei kaniw thay the.