Read Rongmei Naga 1 GUANGH NUNC 4 Bible Online

1 GUANGH NUNC 4 - Rongmei Naga bible

1 GUANGH NUNC 4

¹Solomon tei Isaraelmei guayna tuang guangc khwan e,

²kumna mi guay hei katuang meicdaihmei nunc the: Amuh rui Zadok nac mpouh Azaria e.

³Peikai lat hymei rui Elihorep lev Ahija e. Kaney hei Shisha nac mpouh nei e. Chakh hyloumei buk sinmeipu rui Ahilud nac mpouh Jehoshaphat re.

⁴Rihmei nunc tuang kapy rui Jehoiada nac mpouh Benaia e. Amuh rui Zadok lev Abiathar e.

⁵Kandih ramv langv sinmei nunc tuang kapy rui Nathan nac mpouh Azaria e. Guangh tuang amuc rui Nathan nac mpouh Zabut re.

⁶Guanghkai khou siamruaimei nunc ta sinmeipu rui Ahishar e. Bangh nunc ta sinmeipu rui Abda nac mpouh Adoniram e.

⁷Solomon rui Isarael kandic khou ramv langv langv sinmei gaanv 12 lou khwan e. Kaniw guay tei rui katuang tuang ramv lungc khou rui patmei puat rui guangh khatni kakai kaikhuncmei ta bw akhat akhat makuat khang e.

⁸Kabangc khoumei hei ramv langv 12 khatni mi ramv langv tuang kaipouc 12 kiu the: Ephraim tuang chyngramv khou Benhur.

⁹Makaz, Shaalbim, Beth Shemes, Elon, khatni Beth Hanan kaidai guay khou Bendeker.

¹⁰Arubbot lev Soko kaidai khatni Hepher ramv khou Benhesed.

¹¹Dor ramv guay khou Solomon nac Taphat ta kawmeipu Benabinadab.

¹²Taanak khatni Megiddo kaidai, Beth Shan kaidai daeng khou naimei ramv guay, Zarethan kaidai daeng guay, Jezreel kaidai tuang dihba khou Abel Mehola lev Jokmeam kaidai nganv khou Ahilud nac mpouh Baana.

¹³Gilead khou Ramot kaidai, Gilead khou naimei Manase kiktamei Jair kai kaikhwangmei tuang namv guay, Bashan khou Argob ramv khou raengh raenglouna ntanh khamvtaan taanloumei kaidai daihmei 60 hei guay khou Bengeber.

¹⁴Mahanaim tuang ramv khou Iddo nac mpouh Ahinadab.

¹⁵Naphtali tuang ramv khou Solomon nac Basemat ta kawmeipu Ahimaz.

¹⁶Aser tuang ramv khatni Bealot kaidai khou Hushai nac mpouh Baana.

¹⁷Isakar tuang ramv khou Parua nac mpouh Jehoshaphat.

¹⁸Benjamin ramv khou Ela nac mpouh Shimei.

¹⁹Amormei guangh Sihon khatni Bashanmei guangh Og rui sinloumei Gilead ramv khou Uri nac mpouh Geber. Mi gaanv 12 hei hamhna baihmei kandic kapwm sinmeipu ni gaanv khat nai khwan e.

²⁰Judamei khatni Isaraelmei tei duipui syniang zu geic khwan e; kaniw tuna zangvna neihlana lungc bam khwan e.

²¹Solomon tuang guangcdic tei Euphratis duithuak khou rui Philistia nganv khatni Izip nganvmei lungc khou naimei zaatc kaguayna khwan e. Kaniw rui kakhang dihkhav tiina kapanty saanvsaengh katuang mei sw bam khwan e.

²²Solomon tuang guangckai khou tu zangv khang tingmik pum gehu buay gaymei handwang 5000, gehu nap handwang 10,000,

²³bangh louna makuatmei guaih ruh, kataek mpacmei guaih 20, lauziu 100, asanh, chakhaengv, asanh nthyammei zaat kachic, khatni nruay hei guay hei kage nai khwan e.

²⁴Solomon rui Euphratis duithuak neihkey ramv twmei thu Euphratis daeng khou naimei Tiphsa khou rui thauna Gaza kaidai nganv khou naimei guangcdic guay ta sin khwan e. Euphratis duithuak khou rui neihkey biak thangc naimei guangc guay tei katuangmei sw khwan e kumna kainingmei kandic guay lev nchu-nzaenghna lungc bam khwan e.

²⁵Solomon ringh saanv Juda khatni Isaraelmei nunc tei katuang katuang drakha lau khatni tadut lau ruaicna nchu-nrina lungc khwan e.

²⁶Solomon tei gari zaymei takuanh khang kakai 40,000 khatni rih takuanc 12,000 nai khwan e.

²⁷Ramv langv sinmei gaanv 12 tei rui kakhang kakhang tiiloumei bw khou guangh Solomon khatni kakai khou tu bammei guay bw khat tu biuc tii tanh tan khwan e.

²⁸Kaniw rui guangh khang kage naimei thei layna sipian lev napgou ni tii bam khwan e, hei tei takuanh taek khang e.

²⁹Ravguangc rui Solomon khou mbu taph tapmei tuang ningting, karyan kadath nai dat makmei ningting tiilou khwan e.

³⁰Solomon tei neihpat biak thangc ningtyngmei nunc suangc khatni Izipmei ningtyngmei nunc suangc ningtyng khwan e.

³¹Kamei tei meic guayna khang suangc ningtyng liangmeipu khwan e. Ezramei Ethan suangc ni, Mahol nac mpouh nunc Heman, Kalkol, Darda suangc ni, ningtyng khwan e, kumna kazanc tei kainingmei kandic guay khou dincna bam khwan e.

³²Kamei rui latkwdyn 3000 khatni lu 1000 suangc mbuna phuaklou khwan e.

³³Kamei rui thingbang puc bwan Lebanon tuang sidar bang khou rui thauna raengh khou thaumei hissop bwan lam nganv salou khwan e. Kamei rui khouringh, nruayna, guanghmei, tuihmei khouringc guay khatni khav lam khou salou khwan e.

³⁴Kandih kapwm khou bammei guangc guay rui Solomon tuang ningting lam tei chuna kalat nking khang meic thouc guang bam khwan e.