Read Rongmei Naga 1 GUANGH NUNC 5 Bible Online

1 GUANGH NUNC 5 - Rongmei Naga bible

1 GUANGH NUNC 5

¹Turmei guangc Hiram tei David tuang champanv sw tanh tan guang khwan e, kumna Solomon rui kapu David bamv lyn the twmei kamei chu lana dihkhyn nunc thouc guang the.

²Solomon rui mi chamv hei Hiram khou tii guang the:

³“Apu David tei kadaeng lungc nkuay bammei zauczihmei guay ta nthaekc makna adow bam kanmei zaeng rui kaRavguangc RINGHPOUC ta kalummei kai khang kamei kasiamhlou nangc kan mak khe twmei nang thay e.

⁴Tiki ntaw thu RINGHPOUC aRacguangc rui atuang ramvrei guayna khou nchu-nzaenghmei tiilou the. Ata zauczihmei maek khe, kumna adow dat nimei ni maek khe.

⁵‘Ai rui nang tangv guangh tiswlou nimei nang nac mpouh rui akhang Ravkai kasiamh puni,’ twna RINGHPOUC rui apu David khou latdyng swlou e. Kumna RINGHPOUC aRavguangc ta kalummei kai khang kasiamh ni the twna alung ding the.

⁶Kumna sidar thing dow khang nang tuang mei nunc Lebanon chyng khou thouc guanglou o. Amei nunc ni kaniw lev taanvtaanc kariu puni, kumna nang tuang mei nunc taanvphy thu nang rui dinglou loumei tii puni. Nang rui thay chuy bammei tei the, amei nunc thu nang tuang mei nunc kumcna thing dow thay mak ge.”

⁷Hiram tei Solomon lat tei chu pwkhou neihla the, kumna kamei rui sa the, “Mi zaatc daihmei tuang guangh bamv tei lyn khang David khou mi kumhmei ningtyngmei nac mpouh tiiloumei khang RINGHPOUC ta thuanc o!”

⁸Kumna Hiram rui Solomon khou mi chamv hei tii guang the: “Nang tuang lat tei ai laatow the, kumna nang rui samei tei taanh khang ai chamdaanvna bam the. Ai rui sidar thing khatni aluthing tii ni the.

⁹Amei nunc rui thingdangv guay tei Lebanon khou rui duipui khou zay keyna mi guay tei rui palyam kasiamh lana nang rui khou tei phungc keylou o twna sa samei duipui tin khou phungc keylou puni the. Mi bamv khou tei amei nunc rui bangcloumei tei ric patlou puni the kum e thei nang tuang mei nunc rui kaniw thouc sw dat nina the. Nang biak thangc rui amei nunc khang tu zangv khang thu kaphianh nina the.”

¹⁰Kumna Hiram rui Solomon khang kage naimei sidar thing khatni aluthing guay tei tii the.

¹¹Kumna Solomon rui Hiram khang kamei nunc puk khang gehu metrik ton 2000 khatni nthanmei Olive thauc gallon 1,100 dou tingkwm pum tii bam khwan e.

¹²RINGHPOUC rui kalatryan theilayna Solomon khang ningting tiilou the. Kumna Solomon lev Hiram tei khiugiang swna nzaenghna lungc bam khwan e.

¹³Guangh Solomon rui taanvtaanhmei khang Isarael kapwm khou rui namna titaanhmei meic 30,000 nymlou the.

¹⁴Kumna mi guay ta tei zauhmei khang Adoniram ta lou the. Kamei rui mi nunc ta tei meic ching ruh ching ruh tuang kang kathumh khang damc patlou the, kumna kakang akhat tei Lebanon chyng khou bw akhat taanvtaancna kai khou bw kanei guang bam dat twna taanv zakryna taanc the.

¹⁵Solomon tuang ntauh phuakmei meic 80,000 khatni ntauh hwanmei meic 70,000 chyngramv khou lou the.

¹⁶Mi nunc guay ta tei taanv zayloumei khang meic 3,300 ni lou e.

¹⁷Isaraelmei tuang kaibamv tauc khang guangh Solomon tuang latdanv theilayna ntauh gaymei daihmei mpeyna phungc guang the.

¹⁸Solomon tuang khatni Hiram tuang taanvtaanhmei nunc khatni Biblos kaidaimei nunc rui Ravkai khang tei ntauh lev thing tei kasiamh the.