Read Rongmei Naga 1 GUANGH NUNC 6 Bible Online

1 GUANGH NUNC 6 - Rongmei Naga bible

1 GUANGH NUNC 6

¹Isaraelmei rui Izip kandic mpatloumei tangv tingkwm 480 khou, Solomon rui Isaraelmei guangc swmei tuang padeihmei kwm, kaneimei bw, twmei thu Ziv bw khou Solomon rui Ravkai tei taanc kahouh the.

²Mi kai kainung tei chowbuk 60 saengc, 20 daic, khatni chowbuk 30 kauh e.

³Chaengmun tuang kai tei chowbuk ruh nthuk ge khatni chowbuk 20 daic e. Mi dai tei Ravkai dai lev nchamc e.

⁴Ravkai tuang ngaengsaengc khou tei kailat nai geic e. Mi kailat guay tei kalungc biak hana kapaengc biak nrum e.

⁵Ravkai tuang ngaengsaengc kapaengc biak thangc tei, kainaek kanei khatni kathei biak tei kathaek kathumhmei kainay zaylou e, kumna kaithaek akhat tei chowbuk panguh kauh e.

⁶Kabangc liangmei kaithaek tuang kailangv kathuic tei chowbuk panguh daic e. Kachungmei thaek tuang kailangv tei chowbuk charuk khatni karuc liangmei thaek tuang kailungc tei chowbuk chanei daic e. Ravkai tuang ngaengsaengc tei karucmei tei rui kabangcmei khang suangc mpu khith khitna kabangcmei ngaengsaengc tei rui karucmei ta tei kaluang lou makna phungc raph rap the.

⁷Ravkai swmei bamv khou tei tandiak, nrih khatni ntanh baansin khwan chu mak khang ntauh guay tei ntauh bamv khou rui kasiamh luai ngamna phungc guang raph rap the.

⁸Kainay zay patmei kaithaek kabangcmei tuang tat gutmei kaimun tei Ravkai tuang dihba biak thangc nai e. Kumna kaithaek kaneimei khatni kathumhmei khou tei phaykhuat lou ku e.

⁹Heikumna Guangh Solomon rui Ravkai tei kasiamh luai lou the. Kamei rui kai tuang silling tei sidar thing dangv khatni thingpaek rui sw e.

¹⁰Chowbuk panguhmei kaithaek kathumh kainay zayloumei tei sidar thing rui alamvloumei tuang e.

¹¹Khoutei Solomon khou RINGHPOUC rui sa the,

¹²“Nang rui atuang latdyn khatni latdanv guay tei piu e thei, nang pu David khou taanclou puni twna nrianhloumei guay tei taanclou puni.

¹³Kumna nang rui kasiamh bammei Ravkai khou hei bamna ai Isaraelmei pang khou bam puni, kumna ai kaniw ta ganclou dat lak khe.”

¹⁴Heikumna Solomon rui Ravkai tei kasiamh luailou the.

¹⁵Kainung biak ngaengsaengc tei kandih khou rui silling nganv sidar thing paek rui daengc e, kumna kabam rui aluthing paek rui kasiamh e.

¹⁶Kalungcmei kailangv Nthan Liangmei Bamv twna kawmei tei kaithei biak thangc swlou the. Mi langv tei chowbuk 20 saengc e kumna mi langv tei kandih khou rui silling nganv sidar thing rui daengc langc e.

¹⁷Nthan Liangmei Bamv pang khou naimei kainung tei chowbuk 40 saengc e.

¹⁸Sidar thingpaek guay khou tei mu khatni mwnpwang maengc hiakna karuhlou e; kainung biak ngaengsaengc guay tei sidar thing rui duaplouna ntauh tei how mak ge.

¹⁹Ravkai kainung thei biak thangc tei RINGHPOUC tuang Latdyng Khuk tei lou khang kailangv akhat swlou e.

²⁰Mi kalungcmei kailungc tei chowbuk 20 saengc, 20 daic, khatni 20 kauh e. Mi guay tei kachaekc rui lup e. Ravchapaeng tei sidar thingpaek rui duap e.

²¹Ravkai kainung tei kachaekc rui duap e, khatni kalunghmei kailangv khou gut nimei chaengmun khou tei kachaekc tuang pareiriang hing kaanlou e. Mi kalungcmei kai tei ni kachaekc rui duap e.

²²Ravkai kainung kapwm tei kachaekc rui duap e. Nthan Liangmei Bamv khou naimei ravchapaeng tei ni kachaekc rui duap muay e.

²³Kerubim kanei tei Olive thing rui kasiamhmei tuang e kumna hei tei Nthan Liangmei Bamv khou lou e. Akhat tei chowbuk ruh kauh e.

²⁴Kerubim akhat khat tuang saenghmei kasw tei chowbuk panguh panguh e. Kumna kasw twan akhat thangc rui kasw akhat tuang katwan nganv tei chowbuk ruh saengc e.

²⁵Baihmei Kerubim tei ni chowbuk ruh saengc e, kaneimei tei Saenghmei daihmei nchamcna taanclou e.

²⁶Kerubim akhat tuang kakau tei chowbuk ruh e, baihmei Kerubim tei ni hei tei kumc muay e.

²⁷Mi kanei tei nthanmei bamv khou tei katin katin khou tei lou the kumna kanei tuang laamv ntyng patmei swkaeng kanei twan tei kainung laa khou alamv the. Kumna kapaengcmei swkaeng tin kanei tei ngaengsaengc ta kahi the.

²⁸Mi kerubim kanei tei kachaekc rui duap be.

²⁹Kainung daihmei khatni kalungcmei kailangv tuang ngaengsaengc guay khou tei kerubim maengc, tadanv bang khatni mwnpwang maengc hiaklou e.

³⁰Kaibam tei nganvna kachaekc rui duap be.

³¹Nthan Liangmei Bamv khou gut nimei kaimun tei Olive thing rui kaikhamv paek kanei paanclou e. Kaimun py tei mbungh e.

³²Kaikhamv paek kanei khou tei kerubim maengc, tadanv bang khatni mwnpwang maengc hiaklou e. Kaikhamv, kerubim maengc khatni tadanv bang hei guay hei kachaekc rui duap liam e.

³³Kainung daihmei khou gut nimei kaikhamv tiangc tei kakau kadai nchamc e khatni Olive thing rui kasiamh e.

³⁴Mi kaikhamv kanei tei aluthing rui kasiamh e, khatni kanei tei kadip khang swlou e.

³⁵Mi kaikhamv khou tei ni kerubim maengc, tadanv bang khatni mwnpwang maengc hiaklou e, khatni kachaekc rui nchamc raph rapna luplou e.

³⁶Kalungcmei kaimav tei Ravkai kaimav khou swlou e, kumna hei tei kairaengv raeng ngguihlou e. Kairaengv tei ntauh kathaek kathumh taplou tangmei sik sidar thingluang lou raph rap be.

³⁷Mi Ravkai tei Solomon guanghtumei tuang padeihmei kwm kaneimei bw twmei thu Ziv bw khou rui taanc kahouhmei tuang e.

³⁸Kumna Solomon guanghtumei tuang tingkwm 11mei kwm tachatmei bw twmei thu Bul bw khou mi Ravkai tei luai nthan thiak the. Mi Ravkai tei Solomon rui tingkwm chanei gutna kasiamh khwan e.