Read Rongmei Naga 1 GUANGH NUNC 7 Bible Online

1 GUANGH NUNC 7 - Rongmei Naga bible

1 GUANGH NUNC 7

¹Solomon rui katuang guangckai ni kasiamh khwan e, kumna mi kai tei tingkwm 13 gutna sw khwan e.

²Lebanon “Ngouc kai” twna kawmei kai kasaeng chowbuk 100, kadai rui chowbuk 50, kakau rui chowbuk 30, sidar thingtiangc padeih kin khatni sidar thingluang rui kasiamh khwan e.

³Kaiphuang 45 rui ruhna pangu panguh patna kaingwm ta tung e.

⁴Ngaengsaengc naek kanei khou tei kailat kakin kathumh nai e.

⁵Kaimun tei kakau kadai nchamc e, kumna kailat tei ni kakau kadai nchamc e, kumna kailat tei ni kakau kadai nchamc muay e. Ngaengsaengc khou naimei kailat kin kathumh tei baanzat baandau bam achow raph rap e.

⁶Tiangdaic rana linghmei Kai tei chowbuk 50 saengc 30 daic e. Mi khou tei kaisaeng akhat nai e hei tei ntiangh mpeyna nai e.

⁷Guanghbamv loumei kai tei Latzan Kai twna ni kaw e. Hei tei Solomon latzan swna bammei bamv the. Kandih khou rui kaiphuang nganv sidar thingpaek rui daengc e.

⁸Latzan Kai kaithei khou Solomon kamei lunghmei kai nai e. Mi kai tei baih baihmei kai guay tei kumcna swlou e. Kamei rui mi kai kumhmei tei kanow Izipmei guangh nacpui khang tei ni swlou e.

⁹Mi kai guay hei, latzan kai daihmei tei kazauhna kandih khou rui katwan nganvna ntauh gaymei rui kasiamhmei tuang e. Ntauh guay tei ntauh phuakmei bamv khou rui kalwn kapuih the.

¹⁰Kaibam tei kamanv kunghmei, ntauh daihmei, rui kasiamh e. Ntauh asaekc thu chowbuk tachat hamh e thei ruh ni saengc e.

¹¹Mi guay ruc khou tei ntauh asaekc hian chuyna hianloumei ntauh lou lana mi ruc khou tei sidar thing lou the.

¹²Guanghkai, Ravkai tuang kalungcmei kai, khatni Ravkai kaimun tuang kailangv hei guay hei ntauh thaek kathumh tangv pum sidar thingluang loumei raengv raenglou the.

¹³Tur kaidaimei baanhthaymei Huram twna kawmeipu ta guangh Solomon rui kaw the. Mipu tei tanzinc taanv khou baanhthaymeipu e.

¹⁴Theic kanmei kapu tei Tur khou bammei tanzinc taanv khou baanhthaymeipu e. Kapui tei Naphtali kaikhwangmei e. Huram tei ningtyngmei baanhthaymeipu e. Tanzinc taanv kaguayna khou tei kamei rui kapy swna zauclou o twna Guangh Solomon rui kawmei khou guangna taanv guay tei taanclou the.

¹⁵Huram rui tanzinc tuang tiangdaic kanei bun khwan e. Tiangdaic akhat tei chowbuk 18 kauh e khatni pamv thumh daic e. Mi kanei tei Ravkai kainung gut nimei kaimun daeng khou lou e.

¹⁶Mi tiangdaic nei tuang pykhim khang chowbuk panguh kauhmei tiangdaic pykhim kanei bun khwan e.

¹⁷Mi pykhim tuang kapy khou tei pareiriang khatni

¹⁸tanzinc tuang puc-heithai pang kakin kanei kagiatclouna karuhlou e.

¹⁹Kapy twan tei lili pwang lwn kumhmei chowbuk padeih langv nai e,

²⁰kumna hei tei pareiriang rui karuhloumei langv ruc khou tei ngguicmei langv khou tei lou the. Kumna kapy twan khou tei puc-heithai 200 kakin kanei kanei pykhim khat khat khou tei lou the.

²¹Huram rui mi tiangdaic nei tei Ravkai gut nimei kaimun naek kanei khou lou the. Dihba biak thangc loumei tiangdaic zanc tei Jakin khatni dihpy biak thangc loumei zanc tei Boaz twna kaw the.

²²Lili pwang luihmei tanzinc pykhim tei mi tiangdaic nei ruc khou tei lou the. Kumna mi tiangdaic tei taanc luai the.

²³Huram rui tanzinc tuang duiduangc ni kasiamh e. Hei tei chowbuk panguh kauh e kadai rui chowbuk ruh daic e.

²⁴Katin khou tei kapaengc biak tanzinc tuang mwnmaengc kakin kanei lou e. Mi mwnmaengc tei duiduangc tei lev kapumc akhat na swna bun lou e.

²⁵Mi duiduangc tei tanzinc tuang guaituamchic 12 ruc khou lou e. Mi guaituamchic guay tei kaniw hu kapaengc biak karih raph rapna dihpy, dihba, neihpat, neihkey kathumh kathumh karih raph rap the.

²⁶Mi duiduangc su tei baanhpav akhat re. Kachy tei tamkuak chy kumcna lili pwang puangc patmei kumcna kapaengc biak ndaamv pat re. Mi duiduangc khou tei dui liter 40,000 dou chan e.

²⁷Huram rui guaih gari ruh ni kasiamh khwan e. Guaih gari akhat tei chowbuk padeih saengc padeih daic khatni kathumh kauh e.

²⁸Kagaeng tei thingpaek rui kasiamh e.

²⁹Mi thingpaek khou tei kamangliangpui, guaituamchic khatni kerubim maengc hiaklou e; kagaeng khou tei kamangliangpui lev guaituamchic maengc hyloumei kabangc karuc khou tei mwnluai maengc ni nluailou e.

³⁰Gari akhat khou tanzinc tuang hyang padeih padeih lou e. Kahyang phunghmei luang tei ni tanzinc luang e. Kakwn padeih khou tei kaikhuang loumei tiangc khang katiangc khat khat lou e. Katiangc khou tei mwnluai nluailou e.

³¹Kaikhuang loumei bamv khang katiangc py khou tei kahaengv lou e. Mi tiangc guay tei kagaeng tin khou rui chowbuk akhat dou kauh e khatni ku khat dou kabangc karih key e. Mi khou tei ni hiakna karuhlou e.

³²Kahaengv guay tei chowbuk akhatna kapaek daic e; kahaengv tei kagaeng bangc khou lou e. Kahaengv duancloumei luang tei gari pum tei lev kazanc akhat na swlou e.

³³Kahaengv guay tei takuanh gari haengv kumcna swlou e; kahaengv guay tei tanzinc rui kasiamh e.

³⁴Gari kathuic khou tei, kandih biak, kakwn padeih khou tei katiangc akhat akhat lou key e, mi tiangc guay tei kapumc lev kazanc akhat na de.

³⁵Gari kathuic khou tei kagaeng twan khou ku akhat kauhmei kakhau nai e. Mi tuang tiangc khatni kagaeng guay tei katiangc twan khou tei manc kariulou the.

³⁶Katiangc khatni kagaeng guay tei kerubim, kamangliangpui, khatni tadanvbang maengc rui karuhlou e. Kabamv nsa samei kak khou mwnluai ni nluailou e.

³⁷Mi hei kumna gari tei kasiamh the. Kaguayna tei kalwn ni kasaeng kadai ni nchamc raph rap be.

³⁸Huram rui kaikhuang ruh ni, gari pum tei akhat akhat lou khang kasiamh e. Kaikhuang akhat tei chowbuk padeih daic e kumna dui liter 800 dou chan e.

³⁹Kamei rui gari panguh tei Ravkai tuang dihba biak thangc lou the, baihmei panguh tei rui dihpy biak thangc lou the. Duibuangc tei rui dihba neihpat biak thangc lou the.

⁴⁰Huram rui lai, suakkuak, khatni kaikhuang guay tei kasiamh the. RINGHPOUC tuang Ravkai khou lou nimei tuang taanv na guay tei kamei rui kasiamhlou the. Kamei rui kasiamhloumei guay kiu mi hei the:

⁴¹Tiangdaic kanei Tiangdaic kanei py khou loumei kaikhuang kumhmei ntiangh pykhim kanei

⁴²Tiangdaic pykhim khou karuhloumei pareiriang guay Tiangdaic pykhim khou kakin akhat khou phay khat phay khat louna kakin kanei kanei kasiamhloumei tanzinc tuang puc-heithai 400

⁴³Guaih gari ruh kaikhuang ruh

⁴⁴Duiduangc tei phunghmei guaituamchic 12

⁴⁵Lai, suakkuak, khatni kaikhuang guay Mi Huram rui Solomon khang Ravkai tuang taanv na khang kasiamhloumei hei thaamc karanloumei tanzinc rana the.

⁴⁶Mi guay hei Jordan nzaengc khou Sukkot lev Zarethan kak khou naimei bamv akhat khou guangh rui tikasiamhmei tuang the.

⁴⁷Solomon rui mi tanzinc guay tei geic langv tina karith nthau dat ngam mak khena mi guay tei azuh nritmei cho twmei thay dat mak khe kumna ganclou kan the.

⁴⁸Solomon rui Ravkai khou sinsw khang kachaekc tuang taanv na ni kasiamh khwan e. Mi guay kiu thu ravchapaeng, Ravguangc khang ntyan katmei tuang paeng,

⁴⁹Nthan Liangmei Bamv hu khou dihpy dihba katiangc panguh panguh ding bammei thauhmai tiangc ruh, mwnpwang maengc guay, thauhmai guay, tiangkap guay,

⁵⁰bwangh guay, thauhmai tiangkap guay, kaikhuang guay, agaw nteimei kuak guay, maithyn kuak guay, Nthan Liangmei Bamv tuang kaikhamv khatni Ravkai kaikhamv tuang kabaza. Mi taanv na guay hei kachaekc rui kasiamh the.

⁵¹Guangh Solomon rui Ravkai khou taanc nimei taanv guay tei taanc luai pwkhou, kapu David rui RINGHPOUC khang katgutloumei daandi, kachaekc, khatni baih baihmei puat guay tei Ravkai puat ryloumei bamv khou laaguangna rylou the.