Read Rongmei Naga 1 GUANGH NUNC 8 Bible Online

1 GUANGH NUNC 8 - Rongmei Naga bible

1 GUANGH NUNC 8

¹Latdyng Khuk tei David tuang kaidai Zaion khou rui Ravkai khou phungc guang khang Jerusalem khou guang o twna Guangh Solomon rui Isaraelmei kaikhwang khatni puinac guay tuang kapy swmei guay ta kabai the.

²Ethanim bw tuang Chaengkai Ngai khou kaniw guang kaduai the.

³Kapy swmei guay tei guang kaduaina, amuh nunc rui Latdyng Khuk tei puanc thauna

⁴Ravkai khou puanclou the. Levimei khatni amuh nunc rui RINGHPOUC ta kalummei pheykai khatni mi tuang taanv na guay tei Ravkai khou phungc guanglou the.

⁵Guangh Solomon khatni Isaraelmei guay tei Latdyng Khuk hu khou tei guang kaduaina lauziu khatni guaituam kasing kaling thay makna khaeng the.

⁶Kumlana amuh nunc rui Latdyng Khuk tei Nthan Liangmei Bamv khou kerubim kanei tuang swkaeng bangc khou tei lou kan the.

⁷Kerubim kanei tuang swkaeng laamv ntyng patmei kanei tei rui latdyng khuk tei gum bin the, hei khou tei puanhmei phuang kanei tei ni kazauh the.

⁸Nthan Liangmei Bamv tuang hu ndwnmei khou tei dingna zauc gut ti thei kaphuang twan tei thu how e; mi bamv khou tei rui hamhna baihmei khou rui thu how mak ge. (Kaphuang kanei tei aseic nganvna mi khou tei naina bam e.)

⁹Mi tuang Latdyng Khuk lungc khou tei, Mousi rui Sinai Chyng khou rui loumei ntauhpaek kanei tei hamhna ramh baihmei lou mak ge. Hei tei Isaraelmei Izip khou rui tat patmei ganv khou RINGHPOUC rui latryan swna tiiloumei taucpaek tei e.

¹⁰Amuh nunc tei Ravkai khou tei rui tatpat dat pwkhou, thay mak daekna Ravkai tei muangh rui padik the khatni

¹¹RINGHPOUC tuang karangmei riw rui gaanc padik the. Kum tina kaniw thouc taanh khang gut dat ngam mak khe.

¹²Khoutei Solomon rui kumna huayney the: “He RINGHPOUC, nang rui tingpuk khou neihmik damclou the, tiki nang thu muangh khatni zinghmei khou lungc ni the twna ning kan the.

¹³Ntaw thu ai rui nang khang mi kai gaykanmei hei kasiamhlou the, nang tingsaengzaeng lungclou bam diu khang.”

¹⁴Meic nunc mi bamv khou tei ding bammei khou tei guangh Solomon tei meic nunc biak thangc kazaw karih patna kaniw ruc khou Ravguangc tuang suaihiam neylou the.

¹⁵Kamei rui sa the, “Isaraelmei Racguangc RINGHPOUC ta thuanc o! kamei rui apu David khou swloumei latryan taanclou dyng the. Kamei rui kumna sa khwan e,

¹⁶‘Ai rui amei nunc ta Izip khou rui nduangh patlou khou tei rui thauna, ata kalummei bamv khang Ravkai kasiamhlou nimei kaidai Isaraelmei kandic khou kadahlou mak khwan e. Tiki David, ai rui nang ta Isaraelmei guangc khang kadahlou the.’

¹⁷“RINGHPOUC Isarael Racguangc ta kalummei bamv khang Ravkai kasiamh ni the twna apu David rui raengc thau khwan the,

¹⁸tiki RINGHPOUC rui kakhou sa the, ‘Nang rui akhang Ravkai kasiamhlou niimei hei gay the,

¹⁹tiki nang rui hei tei kasiamh ni tuang hamh e. Tiki nang rui puanhmei nang nac mpouh gaanv khat rui hei tei kasiamh puni.’

²⁰“Ntaw thu RINGHPOUC rui katuang latryan tei taanclou the. Ai rui apu phaan Isaraelmei guangc sw the, kumna RINGHPOUC Isaraelmei Racguangc ta kalummei kai khang ai rui Ravkai swlou the.

²¹RINGHPOUC kamei rui apu apouc nunc ta Izip khou rui phungc patna kaniw khou latryan swloumei tuang taucpaek tei loumei Latdyng Khuk tei loumei bamv khang ni Ravkai lungc khou tei ai rui kasiamhlou the.”

²²Khoutei Solomon rui meic nunc hu khou tei ding thau lana ravchapaeng hu khou guang dingna kabaanc zaykauh thauna

²³kumna huayney the. “He RINGHPOUC Isarael Racguangc, nang kumhmei tingpuk ruc khou khatni kandih bangc khou rav baihmei maek ge. Nang mei nunc rui kaniw lung kapwm rui lungh gutna piu pwkhou nang latryan ngaekna kalaih makmei ramzian lyanlou o.”

²⁴Nang rui apu David khou swloumei latryan nang ngaek the; nang tuang latryan guay tei aseic hei tiguang tangclou the.

²⁵Apu David rui nang lat piu chuyna lunghmei kumcna kakikta guay rui ni lat piuna lungc e thei kakikta rui Isarael khou guanghtu tanh tanna lungc puni twna nrianhloumei latryan tei ni tiguang nthuihlou o twna he RINGHPOUC Isarael Racguangc, nang khou huay e.

²⁶Kumhpui zaeng rui, Isarael Racguangc, nang bangc apu David khou nrianhloumei latryan guay tei ni tiguang tangclou o.

²⁷Tiki he Ravguangc, nang kandih khou lungc bam changh dina cho? Nang khang thu tingpuk kapwm hei sini bam chan mak ge, kumna ai rui kasiamhloumei Ravkai hei thu akumhna nang khang chan nina cho?

²⁸He RINGHPOUC aRacguangc, ai hei nang bangc e. Ai rui huayneymei chulou o, kumna ai rui aseic hei neyna bammei hei dawlou o.

²⁹Mi Ravkai khou hei azanc nai bam puni twna nang rui saloumei bamv ti hei zingbangc kalaanv gaeklou o, heikum pwkhou nangmei guay rui mi bamv khou karih patna huayneymei chulou o.

³⁰Ai khatni amei nunc rui mi Ravkai biak zaw puanc karihna huayney pwkhou dawlou o. Tingkauh nang kai khou rui chulouna aniw ta kuaklou o.

³¹“Meic gaanv khat ta kakhuay nkhamlou tina kamei nkhuai mak ge twna latryan sw khang mi Ravkai khou nang tuang ravchapaeng daeng khou guang pw e thei,

³²he RINGHPOUC, nang rui tingkauh thangc rui chulouna nang bangc ta latzan swlou o. Nkhuaipui mei ta dandi tiilou o kumna khuay maekpui mei ta tei mpatlou o.

³³“Nang tuang mei Ravkai ta tei kaniw paap zaeng rui zauczihmei rui ngampui ganv khou, kaniw rui lunghlaicna mi Ravkai khou hei nang khou guangna niamh keyna kuaklou khang nang khou huayney pwkhou,

³⁴kaniw rui neymei tei tingkauh thangc rui chulou o. Nang tuang mei nunc paap guay tei kuaklou o, kumna kaniw ta kaniw pupouc nunc khang tiiloumei kandic khou hei phungc guanglou dat ro.

³⁵“Nang tuang mei nunc rui nang ruc khou paapc taanhmei zaeng rui nang rui tingdui thingclou kan pwkhou, kaniw lunglaic datna mi Ravkai biak kaniw zaw karihna niamh keyna nang khou huayney pwkhou,

³⁶kaniw rui huayneymei tingkauh thangc rui chulou o. Guangh tuang paap guay khatni Isaraelmei tuang paap guay kuaklou o. Nchumhmei taanh khang kaniw ta nchamlou o. Kumna, he RINGHPOUC, nang tuang kandic khou hei, nang rui nang tuang mei nunc khang tiiloumei kandic khou hei ting tii keyloudat ro.

³⁷“Mi kandic khou hei nap nkowna, hamh e thei ravpyan guangna, hamh e thei mpwan suhmei rui hamh e thei nkav rui nap-bi sw kasicna, hamh e thei nang mei nunc ta zauczihmei rui adowna, hamh e thei meic pang khou sucnu-naunianmei guangna ryanrapui ganv khou

³⁸kaniw rui huayneymei dawlou o. Nang mei Isaraelmei thowkumhmei rui kalung kabiuna mi Ravkai biak hei kabaanc haamv patna huayney pw e thei,

³⁹kaniw tuang ravsuai chulou o. Kaniw rui huayneymei tingkauh nang kai thangc rui chulouna kaniw paap guay kuaklouna kaniw ta nkhavlou o. Nang na rui maansei tuang lung thay e. Maansei kathuicna khou kataanv cham cham taanclou o,

⁴⁰kum pwkhou, nang rui aniw pupouc nunc khang tiiloumei kandic khou hei kaniw lungc bam saanv nang lat piuna lungh khang e.

⁴¹“Duhmei kandic thangc lungc bammei zaatc baihmei Isarael hamhmei gaanv khat rui nang zanc zaeng khang rui guang pw e thei,

⁴²kalam thu meic nunc tei rui nang tuang charynmei baantan khatni taanvdaih taanclou kanmei tei chu lana mi Ravkai khou hei nang ta kalum khang guang pw e thei,

⁴³katuang ravsuai tei chulou o. Nang bammei bamv tingkauh thangc tei rui katuang ravsuai chulouna kamei rui neymei tei taanclou tio, kum pwkhou Isaraelmei kumcna kandihmei zaatc guayna ni nang ta thay kan diu khatni nang lat piuna lungc kan diu. Kum pwkhou ai rui kasiamhloumei mi Ravkai hei nang ta kalummei bamv the twmei kaniw thay puni.

⁴⁴“Nang rui nang tuang mei nunc ta suc-rih bamv khou tat khang katiumei ganv khou tabui bui bamv khou rui pwni nang rui kadahloumei mi kaidai khatni ai rui nang khang kasiamhloumei kaidai biak hei kaniw zaw puanc karihna huayney pw e thei,

⁴⁵kaniw rui huayneymei chulou o. Kaniw tuang ravsuai tingkauh thangc rui chulouna kaniw ta rih tingamlou o.

⁴⁶“Nang mei nunc rui nang ruc khou paapc taancna— (kalam thu meic gaanv khat na sini paapc taanh makmei maekpui zaeng rui) nang rui kaniw ruc khou lunghpuamcna zauczihmei baanc khou tiipatlou tina kandih duh thangc hamh e thei ana khou bangh swna nym tatpui ganv khou,

⁴⁷kaniw rui huayneymei tei chulou o. Mi kumhmei kandic khou tei rui kaniw lunglaicna kaniw hei adih sina paapc taanc khwan cho twmei kalauhna huayney pw e thei, he RINGHPOUC, kaniw rui huayneymei dawlou o.

⁴⁸Kaniw lunghlaic changhna, nang rui aniw pupouc nunc khou tiiloumei kandic, nang rui kadahloumei mi kaidai khatni ai rui nang khang kasiamhloumei Ravkai biak hei kaniw zaw puanc karihna mi kandic thangc tei rui huayney pwkhou,

⁴⁹kaniw rui huayneymei chulou o. Kaniw rui huayneymei tei tingkauh nang bampui bamv thangc rui chulouna kaniw ta tei zauc nzianlou o.

⁵⁰Kaniw tuang paap khatni kaniw tuang meicliammei guay tei kuaklou o, kumna kaniw ta zauczihmei nunc ta kaniw ta nzianlou khang tiswlou o.

⁵¹Kaniw tei nang tuang mei nunc e khatni nang tuang kadam laa nchamc nimei nunc e, nang rui kaniw ta chuangc bammei maimangc Izip khou rui laa patloumei nunc e.

⁵²“He kauh Liangmei RINGHPOUC, nang rui Isaraelmei khatni kaniw tuang guangc ruc khou zauc nzianlou o, kumna kaniw rui nkhavlou khang kawmei kathuic chulou o.

⁵³Nang rui aniw pupouc nunc ta Izip khou rui nduangh patmei ganv khou nang bangc Mousi khou saloumei kumcna nang rui kaniw ta zaatc guay pang khou rui nang mei sw khang kalangv baicna kadahpatlou tuang di the.”

⁵⁴Solomon rui kumna RINGHPOUC khou huayney tangna, tangkhunghna kabaanc zay thauna huayney bammei khou tei rui ravchapaeng hu khou tei dingthau the.

⁵⁵Kumna mi khou tei guang bammei guayna khou tei Ravguangc tuang suaihiam tii keylou diu khang khwan ranvna ney the. Kamei rui sa the,

⁵⁶“Katuang latryan theilayna kamei nunc khou nchu-nzaenghmei tiiloumei RINGHPOUC ta thuanc o. Kamei rui kabangc Mousi khou swloumei latryan guay tiguang tangclou the.

⁵⁷RINGHPOUC aniu Racguangc kamei rui aniu pupouc ta lamluailoumei kumc aniu ta ni lamluailou pw diu o;

⁵⁸kamei rui kahawmei theilayna aniu lungc tanh tan ngam diu khang kamei rui aniu ta kalat tipiulou diu o. Aniu pupouc nunc khou tiiloumei latdanv khatni latdyn guay tei piu ngam khang tiswlou diu o.

⁵⁹Ai rui RINGHPOUC aniu Racguangc kakhou ney kanmei kaguayna tei kaganv kathuicna ningtow tanh tanlou pw diu o. Kamei rui Isaraelmei khatni kaniw tuang guangc khang kaniw khang tingmik pum kage naimei guay tei zauc nzianna tiilou bam diu o.

⁶⁰Kumna RINGHPOUC kamei na hei Ravguangc dyng e — rav baihmei maek ge twmei kandihmei zaatc guay rui thay kan diu o.

⁶¹Nangniw rui aseic sw bammei kumcna RINGHPOUC tuang mei nangniw hei katuang latdanv khatni latdyn guay tei piu tanh tanna lungc bam diu o.”

⁶²Khoutei guangh Solomon khatni meic guayna tei rui RINGHPOUC khang khaeng the.

⁶³Kamei rui guaituamchic 22,000 khatni lauziu 1,20,000 alamvpuatkat swna kat the. Heikumna guangh khatni meic guayna tei rui Ravkai tei katgutlou the.

⁶⁴Mi nungc tei kamei rui kaimav chung, Ravkai kaimav tei ni katgutlouna, mi khou tei kapumc rawna, nap-bi puatkat katna khatni alamvpuatkat swna khouringh thav katna khaeng the. Kamei rui mi khou tei khaengmei thu mi guay tei khaeng khang tanzinc ravchapaeng tei nthyam langv tipui zaeng rui the.

⁶⁵Solomon khatni Isaraelmei guay tei mi Ravkai khou tei Chaengkai Ngai zaeng chanei ngay the. Dihpy thangc Hamat chaeng khou rui dihba thangc Izip duithuak nganv khou bammei Isaraelmei guay guangna meic kangdai guang kaduai the.

⁶⁶Zaeng tachatmei nungc Solomon rui kaniw ta kakai kai titat dat kan the. RINGHPOUC rui kabangc David khatni Isaraelmei guay khou tiiloumei suaihiam khang tei rui guangh ta thuancna khatni kaniw neihla zaenggayna kaniw kai kai hanc dat kan the.