Read Rongmei Naga 1 GUANGH NUNC 9 Bible Online

1 GUANGH NUNC 9 - Rongmei Naga bible

1 GUANGH NUNC 9

¹Solomon rui Ravkai khatni guanghkai khatni kamei rui kasiamh niimei guayna kasiamhlou tang pwkhou

²Gibeon khou lyanloumei tei kumcna RINGHPOUC kamei Solomon khou lyanlou dat khwan e.

³Mi khou tei RINGHPOUC rui kakhou sa the, “Nang rui huayneymei tei ai chu the. Ata tingsaengzaeng kalum bammei bamv khang nang rui kasiamhloumei Ravkai hei ai rui laalou the. Ai rui mi kai ti hei kaganv kathuic zauclou puni khatni gaeklou puni.

⁴Nang pu David kumcna nang rui nang lungning nthanna asiamruai sw pw e thei, khatni atuang latdanv piuna ai rui nang khou tiimei latdanv guay tei piuna taanc e thei

⁵Isarael ti hei kakikta rui guangh swna sin tanh tan puni twna nang pu David khou ai rui nrianhloumei latryan tei ai rui taanc nthuihlou puni.

⁶Tiki nang hamh e thei nang tuang kikta nunc rui athei lay taanna, atuang latdanv guay tei liamna rav baih baihmei ta kalum tat re thei,

⁷ai rui atuang mei Isaraelmei ti hei kaniw khang tiiloumei kandic khou rui alay ganc puni. Ata kalummei bamv khang ai rui laaloumei mi Ravkai ti hei mpatlou puni. Khou kiu meic kathuicna rui Isaraelmei ta latchap swna nuic puni khatni mala puni.

⁸Mi Ravkai hei swkasicna ganclou puni kumna mi khou tei tatruanloumei guay rui lungh kabiuna hahlahla puni. ‘Tabui swna RINGHPOUC rui mi kandic khatni mi Ravkai khou heikumna swlou bam tu cho?’ twna kaniw rui thanv puni.

⁹Khoutei meic nunc rui daw puni, ‘Mi hei kaniw rui kaniw pupouc nunc Izip kandic khou rui phungc patloumei RINGHPOUC Ravguangc ta mpatlou timei zaeng rui e. Kaniw rui rav baih baihmei khou kaniw lung louna kalum tat kan timei zaeng rui e. Hei zaeng rui mi kamut kamaimei hei kaniw khou tiguangmei tuang e.’ ”

¹⁰Solomon rui Ravkai khatni guanghkai swmei tei tingkwm 20 gut khwan e.

¹¹Turmei guangc Hiram rui sidar thing, aluthing, khatni kachaekc guay tei Solomon rui kahawmei kamv tei tii khwan e. Mi taanv tei luai pwkhou, Guangh Solomon rui Hiram khang Galili ramv khou kaidai 20 tiilou khwan e.

¹²Hiram rui mi kaidai guay tei guang zauc pwkhou kamei kahaw mak khe.

¹³Kumna kamei rui Solomon khou sa the, “Chanale, akumhmei kaidai nang rui akhang tii bam tu cho!” Kum tina mi ramv zanc tei aseic nganvna Kabul twna kaw bam e.

¹⁴Hiram rui Solomon khang kachaekc kilogram 4000 mbu tii guang the.

¹⁵Ravkai khatni guanghkai tei Guangh Solomon rui namna taanv titaanhmei nunc ta titaanc khwan e. Kaniw tei rui kaidai tuang neihpat biak tei kandih thwan lana raengh tei raeng khwan e. Hazor, Megiddo, khatni Gezer kaidai guay tei ni mi nunc ta tei titaanc khwan e.

¹⁶Izipmei guangc rui Gezer kaidai ta adowna mi kaidai khou tei lungc bammei Kanaanmei nunc ta swluai the khatni kaidai tei mailou the. Solomon rui kanacpui ta kanow khang laa pwkhou mi kaidai tei tiphungc mic guang the.

¹⁷Kumna Solomon rui mi kaidai tei khatni kabangcmei Beth-Horon, tei ni kasiamh thaulou khwan e.

¹⁸Baalat, mi kandic ramv lungc khou tazikramv khou naimei Tamar,

¹⁹katuang taektw ryloumei kaidai guay, katuang takuanc khatni takuanh gari loumei kaidai guay khatni kamei rui Jerusalem khou, Lebanon khou khatni kaguanghdic kabamv guayna khou kasiamh nimei taanv guay tei mi nunc ta tei titaanc khwan e.

²⁰Isaraelmei hamhmei nsaekcloumei Amormei, Hittimei, Perizimei, Hivimei khatni Zebusimei guayna

²¹mi kiu thu Isaraelmei nunc rui rih keypui ganv khou swluai nsaekcloumei kikta nunc ta Solomon rui bangh swna taanv titaanhmei nunc e. Kaniw aseic nganvna nai bam e.

²²Solomon rui Isaraelmei ta bangh tisw mak ge; kaniw ta tei rihmei kaipouc, rihpy, takuanh gari rihpy, khatni takuanh ricmei tiswlou khwan e.

²³Solomon rui kai swmei taanv khou tei bangh guay ta tei phaengc zauhmei meicdaihmei 550 e.

²⁴Kanow Izipmei luc tei David kaidai khou rui Solomon rui kakhang kasiamhloumei guanghkai khou kalaic pat kanmei tangv mi kaidai tuang neihpat biak tei Solomon rui thwan the.

²⁵Solomon rui RINGHPOUC khang kasiamhloumei ravchapaeng khou tei tingkwm khou rawna khaengmei khatni alamvpuatkat khaengliang kathumh thumh e. Kamei rui RINGHPOUC khang agaw ni nteina kat re. Hei kumcna kamei rui Ravkai tei kasiamh luailou the.

²⁶Edom kandic khou Akaba tuang duipui tin khou Elat daeng khou naimei Eziongeber twna kawmei bamv khou guangh Solomon rui rungh pang kasiamh khwan e.

²⁷Hiram rui kabangc nunc rungh chaumei nunc khatni duipui lam khou thaymei nunc ta Solomon kabangc nunc lev taanvtaanh kariu khang ndiu guang khwan e.

²⁸Kaniw tei Ophir kandic thangc rungh pang tei chau tatna Solomon khang kachaekc kilogram 14,000 suangc geicna phungc guang khwan e.