Read Rongmei Naga 2 GUANGH NUNC 1 Bible Online

2 GUANGH NUNC 1 - Rongmei Naga bible

2 GUANGH NUNC 1

¹Isaraelmei guangc Ahab theihmei tangv, Moab kandicmei rui Isaraelmei khou rui nyngsw khang rih thau khwan e.

²Isaraelmei guangc Ahazia tei katuang Samaria khou naimei guangckai kauhmei khou rui taek keyna nzamh kasic sihna nzamh the. Kumna kamei gay dat puni di ny gay dat lak ny twmei Philistinmei rav Baalzebub khou thanv khang Ekron kaidai thangc meic thouclou the.

³Kumna Tisbe kaidaimei muhzwng Elija ta guangh Ahazia tuang latdiu tatmei nunc ta tei ariw tatna kumna sa o twna RINGHPOUC tuang baanchara rui kakhou latdanv tii the, “Nangniw tabui swna Ekronmei rav Baalzebub khou thanv khang tat bam tu cho? Isarael khou rav maek khe twna nangniw ning lana cho?

⁴Nang laeng khou rui thau dat ni tuang hamh the, ‘nang theic puni the, twna RINGHPOUC rui sa e twna guangh khou sa tio!’ ” RINGHPOUC rui samei theilayna Elija rui tatna salou the,

⁵kum tina latdiu tatmei nunc tei guangh daeng thangc hanc dat kan the. “Nangniw tabui swna hanc guang dat tu cho?” twna guangh rui kaniw khou thanv the.

⁶Kaniw rui daw the, “Aniw ta gaanv khat pu rui ariwna hanc dat tho tw pwna hanc guang datmei tuang the. ‘Tabui swna Ekronmei rav Baalzebub khou thanv khang nang meic thouc bam tu cho? Isarael khou Rav maek khe twna nang ning lana cho? Nang gay dat ni tuang hamh the, nang theic puni the!’ twna RINGHPOUC rui nang khou sa e twna sa tio twna mipu kiu rui sa pu e.”

⁷“Mipu lwn kiu akumh bu cho?” twna guangh rui thanv the.

⁸“Kamei ramhhiw thiula saenghmei nu e, Siangiat ni ramhgic rui sw e,” twna kaniw rui daw the. “Hei tei Elija the!” twna guangh rui sa the.

⁹Khoutei Elija ta nym guang khang gaanv 50 tuang rihpy akhat ta karihphyan gaanv 50 lev twna thouclou the. Elija tei luanghbut akhat khou dungc bammei ta ariwna kakhou kumna sa the, “Ravguangcmeile, guangh rui nang ta key o twna latdanv tii e.”

¹⁰“Ai hei Ravguangcmei e thei, tingkauh thangc rui mai key lana nang ta khatni nang mei nunc ta swluai kan diu!” twna Elija rui sa pat rappui lev tingkauh thangc rui mai keyna rihpy khatni kamei nunc ta swluai kan the.

¹¹Guangh rui rihpy baihmei gaanv khat ta karihphyan 50 lev twna thouclou dat the, kumna mipu tei rui ni nganghna Elija khou sa the, “Ravguangcmeile, guangh rui nang ta katumcna key o twna latdanv tii e!”

¹²“Ai hei Ravguangc mei khwan e thei, tingkauh thangc rui mai keyna nang ta khatni nang mei nunc ta swluai kan di tho!” twna Elija rui mundaw pat rappui lev Ravguangc tuang mai keyna rihpy khatni kamei nunc ta tei swluai kan the.

¹³Guangh tei rui kathumhmei rihpy lev katuang ricphyan gaanv 50 ta thouc dat re. Kamei rui chyngbut ruc khou tei kuna Elija hu khou khuksun keyna sa the, “Ravguangcmeile, nang rui ai khatni amei nunc ta zauc nzianlou o! Aniw tuang panty ta kanlou o.

¹⁴Reymei rihpy gaanv nei tei khatni kamei nunc tei lev twna tingkauh tuang mai rui swluai kan the; tiki aniw ta na thu kanlou o!”

¹⁵RINGHPOUC tuang baanchara tei rui Elija khou sa the, “Kathei lay key tho, ping riu.” Kumna Elija rui rihpy thei tei lay keyna

¹⁶guangh khou tei sa the, “RINGHPOUC rui kumna sa e: ‘Isaraelmei khou Rav maek tw kumcna, Ekronmei rav Baalzebub khou thanv khang nang rui meic thoucloumei zaeng rui nang gay dat ni tuang hamh the, nang theic puni the!’ ”

¹⁷RINGHPOUC rui Elija khou rui sa guangmei theilayna Ahazia theic the. Ahazia tei kanac mpouh maek khwan e, kum tina Judamei guangc Jehoshaphat rui puanhmei Jehoram rui guanghtumei kaneimei kwm Ahazia kainac Joram rui kaphaan guangh sw the.

¹⁸Guangh Ahazia rui taancloumei baih baihmei taanv guay ni Isaraelmei guangh nunc tuang lam hyloumei Latrik buk khou hylou the.