Read Rongmei Naga 2 GUANGH NUNC 10 Bible Online

2 GUANGH NUNC 10 - Rongmei Naga bible

2 GUANGH NUNC 10

¹Ahab kikta Samaria kaidai khou lungc bammei hei meic gaanv 70 e. Jehu rui tatdyn akhat hy lana mi kaidai tuang kaipouc nunc, katu swmei nunc, khatni Ahab kikta nunc ta phaengc zauc bammei nunc khou nzanhlou the. Mi tatdyn khou tei kumna hylou the:

²“Nangniw hei guangh kikta phaengc zauc bammei nunc the kumna gari guay, takuanh guay, buy-baeng guay, khatni raengh raengloumei kaidai guay hei nangniw baanc khou nai the. Hei kumhpui zaeng rui, nangniw mi tatdyn hei laatow rappui lev,

³guangh kikta pang khou tei rui ramh ngam liang nimei ta kadahna guangh suamclou tho kumna kata gaek khang adow kan di tho.”

⁴Samaria khou dihsinpouc nunc tei ping the. “Akumhna aniu Jehu ta akhangv ngam nina cho, guangh Joram lev guangh Ahazia rui sini ngam makna bam khou?” twna kaniw rui sa the.

⁵Heikumna guanghkai phungc bammeipu khatni mi kaidai tei phungc bammeipu rui mi kaidai tuang katu swmei dilungmei nunc khatni phaengc zauc bammei nunc rui kazauhna mi lat hei Jehu khou tiguang the: “Aniw hei nang bangc nunc de, kumna nang rui sa samei aniw taanc ni de. Aniw rui meic gaanv khat na ta sini guangh suamclou ngam mak ge; nang rui gay nimei sw rap do.”

⁶Jehu rui kaniw khou tatdyn akhat ni hy dat re: “Nangniw abiak liangcna, ai rui sa samei piu ni tw e thei nthuanh kiu hei kumhmei ganv khou hei Ahab kikta nunc py guay tei adaeng khou Jezreel khou hei phungc guang o.” Ahab tounac nunc meic gaanv 70 tei kaniw ta makuat thaumei Samaria kaidai dilungmei kapy swmei nunc rui phaengc zauc bam khwan e.

⁷Jehu tuang tatdyn tei guang tangc pwkhou, Samaria kaidai tuang katu swmei nunc tei rui Ahab tounac meic gaanv 70mei ta tei dowluaina, kaniw py tei nkah khou thimclou lana Jezreel khou Jehu daeng khou phungc guang the.

⁸Ahab tou nunc py guay tei phungc guang the twmei poulou pwkhou mi guay tei kaidai raengcmun daeng khou kakhuan kanei khang khuanlouna nthuanh lauthwan pat mak saanv ganclou o twna Jehu rui latdanv pat the.

⁹Lauthwan pat pwkhou, kamei rui raengh khou tei patna sanghbamv khou tei bammei nunc khou tei kumna sa the, “Guangh Joram ta rouraengh swna swluaimei tei ai rui e, hei tei nangniw man hamh e. Tiki mi nunc ti hei thu thow rui swluai tu cho?

¹⁰Ahab tounac nunc ruc khou RINGHPOUC rui salou kanmei tei guang tangc puni twmei mi hei rui lyanmei tuang e. RINGHPOUC rui Elija khou rui sa kanmei lat guay tei taanc kan the.”

¹¹Kumlana Jehu rui Jezreel khou lungc bammei Ahab riangluaic guay katuang meicdaihmei guay, kaduangda guay, amuh nunc, kaguayna ta swluai the, kaniw gaanv khat na ta sini nringh mpatlou mak khe.

¹²Jehu tei Jezreel mpatlouna Samaria thangc tat kan the. Chaeng khou “Lauziu gaenghmei nunc zypui” twna kawmei bamv akhat khou

¹³Judamei guangc Ahazia riangluaicmei gaanvsaekc ta ariwna, “Nangniw thow cho?” twna thanv the. “Aniw Ahazia riangluaicmei nunc e. Liammav Jezebel nac nunc ta khatni guanghkai mei nunc ta sowriulou khang aniw Jezreel thangc tat nina e,” twna kaniw rui mundawlou the.

¹⁴“Kaniw ta nringh nym o” twna Jehu rui kamei nunc khou latdanv pat the. Kaniw rui mi nunc ta tei nym lana khou tei naimei duikhunc akhat daeng khou dowluai the. Kaniw gaanv 42 ta tei meic gaanv khat na ta sini nringh mpatlou mak khe.

¹⁵Jehu khou tei rui thau dat the, kumna chaengkui khou Rekab nac mpouh Jonadab ta ariw the. Jehu rui kata kachucna sa the, “Nang anei ningmei hei nchamc the. Nang ata matung ni cho?” “Ai matung puni,” twna Jonadab rui daw the. “Kum e thei nangbaanc tiipat ro,” twna Jehu rui sa the. Kaney baanc sin kariuna Jehu rui katuang takuanh gari khou zay kulouna

¹⁶sa the, “Athei lay guangna ai RINGHPOUC ta adih nzian cho twmei guangna zauc o.” Kaney tei Samaria thangc tuangc ngangh nchamc the.

¹⁷Kaney khou tei guangna Ahab riangluaicmei guay ta gaanv khat na ta sini nsaekc makna swluai the. Heikum puni twna RINGHPOUC rui Elija khou saloumei tei mi hei patmei tuang e.

¹⁸Jehu rui Samariamei nunc ta kaw kaduaina sa the, “Guangh Ahab rui Baal rav siamruai katit na sw e, tiki ai rui kasiamruai sw mbu puni.

¹⁹Kumna Baal tuang muhzwng nunc, Baal ta kalummei guay khatni mi tuang amuh guay ta kaw guang kaduai o. Meic gaanv khat na sini nsaekclou riu; kumna ai rui Baal khang khaeng dai khaeng puni the. Thow pwni guang mak makmei ta swluai puni.” (Mi hei Baal ta kalummei guayna ta swluai khang Jehu rui swmei tuang duaih e.)

²⁰Khoutei Jehu rui latdanv pat the, “Baal ta kalummei tingmik kauc pat tho!” Hei tei kumna kauc pat the,

²¹kumna Jehu rui Isaraelmei guayna khou mi lat tei tiipat the. Baal ta kalummei guay meic gaanv khat na sini nsaekc makna guang the. Kaniw meic guayna Baal tuang ravkai khou guang the, kumna Isaraelmei tei thimc padik the.

²²Jehu rui kalummei khou piumei tuang thiula saenghmei rymeipu amuh khou tei mi thiula saenghmei guay tei laa patna kalum nimei nunc khou tei tii tho twna sa the.

²³Mi tangv tei Jehu tei Rekab rui puanhmei Jonadab ta nduanghna ravkai khou guangna khou tei bammei meic nunc khou tei sa the, “Khou hei Baal ta kalummei na kha bam nina e, RINGHPOUC ta kalummei gaanv khat na sini bam lak nina e.”

²⁴Khoutei kamei Jonadab khatni Baal khou khaeng khang gut the. Kamei rui kapaengc khou meic gaanv 80 rigaanv louna kaniw khou sa the, “Mi guay na ta swluai nina e, meic gaanv khat na ta sini mpatloumei ta tei kapanty laa lyn puni!”

²⁵Jehu kamei rui khaengpuat tei kat luai rappui lev, rigaanv nunc khatni meicdaihmei nunc khou tei sa the, “Gut tho, kaniw meic guayna ta swluai ngam tho, meic gaanv khat na ta sini mpat ri tho!” kaniw baengsaeng sat patna kainung khou gutna kaniw meic guayna ta swluai the kumna kaniw rui theihmei pumc nunc tei kapaengc thangc sat pat the. Khoutei kaniw kalungcmei ravkai thangc tei gut the,

²⁶mi khou tei naimei nthanmei tiangc tei laa patna mai ntei the.

²⁷Heikumna kaniw rui nthanmei tiangc khatni ravkai tei sw kasic the, kumna ravkai tei zwn-bav kai tiswna aseic nganvna heikumna piu bam e.

²⁸Isaraelmei khou Baal ta kalummei tei heikumna Jehu rui swmaan kan the.

²⁹Tiki guangh Jeroboam rui Dan kandic khou Bethel khou kachaekc guaituamchic nunc kasiamh thauna Isaraelmei ta paapc khou zaylou kanmei tuang paap tei Jehu ni layluaih muay the.

³⁰RINGHPOUC rui Jehu khou sa the, “Ahab kikta khou taanc o twna ai rui nang khou samei guay tei nang taanc the. Hei kumhpui zaeng rui nang kikta, meickin padeih nganvna, Isaraelmei guangc sw puni the.”

³¹Tiki Jehu rui kalung kapwm rui RINGHPOUC Isaraelmei Racguangc tuang latdyn tei piu mak ge; mi phaan tei Isaraelmei ta paapc khou zayloumeipu Jeroboam thei kamei lay kaluaih the.

³²Isaraelmei ramv kabamv kathuic khou Hazael rui rih ngam the. RINGHPOUC rui Isaraelmei ramv tithyam gut khwan e;

³³mikiu thu Jordan neihpat biak khou rui Gilead tuang ramv guay, Gad tuang ramv guay, Reuben tuang ramv guay khatni Manase tuang ramv guay, Aroer khou rui thauna Wadi Arnon daeng khou naimei Gilead khatni Bashan hei guay hei the.

³⁴Jehu rui taancloumei taanv guay, kamei rui tancbaucna taancloumei taanv guay kazauhna, Isaraelmei Guangc nunc Chakh buk khou hylou the.

³⁵Kamei theicna Samaria khou mbeihlou the, kumna kanac mpouh Jehoahaz rui kaphaan guangh sw the.

³⁶Jehu Isaraelmei guangc swna Samaria khou tingkwm 28 lungclou e.