Read Rongmei Naga 2 GUANGH NUNC 11 Bible Online

2 GUANGH NUNC 11 - Rongmei Naga bible

2 GUANGH NUNC 11

¹Guangh Ahazia ta swluaimei ta kapui Athalia rui thay rappui lev guangh kai kaikhuncmei guay ta swluai khang Athalia rui latdanv pat the.

²Ahazia rui puanhmei mpouh Joas na kha duak the. Kata meic baihmei gaanvsaekc ta lev twna swluai nina bam khou kaneic Jehosheba rui kanlou the. Mipui hei guangh Jehoram nacpui khatni Ahazia tanpui e. Mipui tei rui mi nac ta tei nachaicpeic lev twna laana Ravkai tuang zykai khou rylouna Athalia khou rui nkamh duak the.

³Athalia rui liammav swna kandih sin bam saanv tingkwm charuk Jehosheba rui mi nac ta tei Ravkai khou louna makuat the.

⁴Tiki chaneimei kwm amuh Jehoiada rui guangh ta rigaanvmei nunc tuang kapy nunc ta Ravkai khou kaw guang the. Kumna kamei rui sw niina bammei tei taanh khang kaniw ta latdyng tisw the. Kamei rui kaniw khou Joas ta lyanlouna

⁵kumna latdanv pat the: “Sabbath nungc nangniw thouc taanh khang guang pwkhou nangniw kalangv kathumh patna akhat rui guanghkai rigaanv nina e;

⁶kalangv akhat rui Sur raengckat rigaanv nina e khatni kathumhmei kang rui rigaanvmei baihmei nunc thei khou kai tei sw kasic key mak khang chaengmun tei rigaanv nina e.

⁷Sabbath nungc kathouc maekmei nunc tei Ravkai khou guangh ta rigaanv nina e.

⁸Nangniw tuang baengsaeng tei sinna guangh Joas ta kamei rui tat tatmei bamv khou kathei tatna rigaanv nina e. Nangniw daeng khou guang guangmei ta swluai rap nina e.”

⁹Meicdaihmei nunc tei Jehoiada tuang lat tei piuna Sabbath nungc kathouc naimei khatni maekmei kaniw meic guay tei kakhou nduangh guang the.

¹⁰Kamei rui meicdaihmei nunc khou tei Ravkai khou lou bammei David tuang buy guay khatni nggih guay tei nsinlou the,

¹¹kumna guangh ta gaek khang baengsaeng tisinlouna Ravkai kaimav khou tei tiding ngguilou the.

¹²Khoutei Jehoiada rui Joas ta nduangh pat the, kumna kapy khou guangh pyrun runlou the khatni guangh rui sin nimei riak buk nsinlou the. Khoutei Joas khou thauh teylouna guangh the twna kauc patlou the. Meic nunc tei kaniw baanc hiwna “Guangh tingpuimaruina lungc kan diu tho!” twna kauc the.

¹³Rigaanv nunc khatni meic nunc khwan tei Liammav Athalia rui chu the, kumna Ravkai khou meic pang kaduai bammei bamv khou tei kamei katumcna guang the.

¹⁴Khoutei kariak theilayna Ravkai kaimun tiangdaic daeng khou guangh thanh tei ding bammei ta how the. Meicdaihmei nunc khatni bianggun sinmei nunc kadaeng dinghuamcna meic nunc tei neihlana kaucna khatni bianggun amuanna bam the. Athalia kalung kabiuna, “Meicliammei taanv de, meicliammei taanv de,” twna kauc the.

¹⁵Athalia ta tei Ravkai raengv lungc khou tei swluai nii makmei zaeng rui Jehoiada rui rihpy nunc khou tei “Rigaanv dingrian bammei kanei kak khou tei kata zay pat tho, kata kanduak khang sw swmei ta swluai o,” twna latdanv pat the.

¹⁶Kaniw rui mipui ta tei nym lana guanghkai thangc phungc guang the, kumna khou tei Takuanh raengckat khou dowluai the.

¹⁷Guangh Joas khatni meic nunc ta kaniw hei RINGHPOUC tuang mei sw ni twmei latdyng amuh Jehoiada rui tisw the; guangh lev meic nunc kak khou ni kamei rui heikumna latdyng tisw the.

¹⁸Khoutei meic nunc tei Baal tuang ravkai thangc tatna hei tei swra the; kaniw rui ravchabamv guay khatni ravmaengc nunc tei swkamut kamai the, khatni Baal tuang amuh Mattan ta ravchabamv guay hu khou tei swluai the. Jehoiada rui Ravkai khou rigaanv lou the,

¹⁹kumna kamei, meicdaihmei nunc, guangh rigaanv nunc, khatni guanghkai rigaanv nunc rui kathei khou lwanna nduangh guang the. Joas tei Rigaanv raengcmun khou rui gutna guangh bamv khou dungc the.

²⁰Meic nunc tei neihlamei rui padik the, kaidai tei nchu-nzaengh the, ntaw thu Athalia ta guanghkai khou swluai kan the.

²¹Joas tei katingkwm chanei khou kamei guanghtu the.