Read Rongmei Naga 2 GUANGH NUNC 12 Bible Online

2 GUANGH NUNC 12 - Rongmei Naga bible

2 GUANGH NUNC 12

¹Isaraelmei Guangc Jehu rui guangh swmei tuang chaneimei kwm Joas Judamei guangc sw the, kumna kamei tingkwm 40 Jerusalem khou guanghtulou e. Kapui rui Beersheba kaidaimei Zibia twna kawmeipui e.

²Ka- mei kapanty saanvsaengh RINGHPOUC rui kahawmei taancna lungc khwan e, kalam thu amuh Jehoiada rui kata ncham lou khwan e.

³Heikum e tiki rav baihmei ta kalummei bamv guay thu swmaan mak khwan e, kumna mi bamv guay khou tei meic nunc rui khaengna khatni agaw nteina bam khwan e.

⁴Joas rui amuh nunc ta kawna khaengmei khou tiimei syan khatni tii niina tiimei kaipat syan guay tei ry kaduailou o twna sa khwan e.

⁵Kamei kamei khaeng bammei ganv khou tii guangmei tei amuh kathuic rui kathouc swna laalouna mi syan tei Ravkai tei kage naimei kasiamh katamvmei khang tei piu nina e twna sa the.

⁶Tiki Joas rui guangh swmei tingkwm 23mei nganvna amuh nunc tei rui Ravkai tei katamv dat zat kan mak ge.

⁷Kum timei zaeng rui kamei rui Jehoiada khatni baihmei amuh nunc ta kawna kumna thanv the, “Nangniw tabui swna Ravkai katamv makna bam tu cho? Nangniw rui laalou laaloumei syan guay tei ntaw khou rui thauna nangniw khou lou dat nuh mak khe; kage naimei tei katamv khang hei tei tii guang nina the.”

⁸Amuh nunc rui mi syan tei laa dat mak khang khatni Ravkai tei katamv mak khang nuhlou the.

⁹Khoutei Jehoiada rui thingkhuk akhat laana kagwm khou kaphoukai swlou lana, mi khuk tei ravchapaeng daeng khou Ravkai gut rapmei mun tuang baanzat thangc lou the. Kalum khang guangmei nunc rui tiiloumei syan tei kaimun khou bammei amuh nunc tei rui laana mi khuk lungc khou tei phaiclou the.

¹⁰Mi khuk lungc khou tei syan nai geic e tw e thei guangh tuang hymeipu khatni tingkuh rui guangna daandi guay tei chak lana khau khou tinclou raph rap the.

¹¹Kasing tei sui siak twna hy keylou tang e thei mi daandi tei Ravkai taanv khou kathouc swmei nunc khou nsinlou puni the. Mi khou tei rui thing taanhmei nunc, kai taanhmei nunc,

¹²ntauh taanhmei nunc, khatni ntauh kaphangvmei nunc khang, thing ntauh liu khang, khatni baih baihmei gut nimei guay khang tei piu the.

¹³Mi syan tei daandi buangh guay, kaikhuang guay, bianggun guay, thauhmai kasiamhmei baansin khang khatni baih baihmei daandi khatni kachaekc tuang puat liumei khou piu mak ge.

¹⁴Mi syan guay tei taanvtaanhmei nunc phy khatni kana liumei khang na piu khwan e.

¹⁵Mi taanv sinmei nunc tei lungning nthan thiakh thiak tina kaniw tuang chakh guay tei chak bam khang kage maek khwan e.

¹⁶Khaengmei puatkat khatni paapc khang khaengmei tuang syan guay tei thu mi khuk lungc khou tei phaiclou mak khwan e; hei tei thu amuh nunc tuang de.

¹⁷Mi ganv khou tei Siriamei guangc Hazael rui Gat kaidai ruc khou rih keyna hei tei laa kan the, mi tangv tei kamei Jerusalem ta adow dat khang ning the.

¹⁸Judamei guangc Joas rui kahu khou lungcloumei Jehoshaphat, Jehoram, khatni Ahazia rui RINGHPOUC khou kat gutloumei puat guay khou tei katuang puatkat Ravkai khatni guanghkai khou naimei kachaekc guay lou hapna guangh Hazael khang kaipat swna tii the. Kum tina mi guangc tei karicmei nunc ta Jerusalem khou rui nduangh tat dat kan the.

¹⁹Guangh Joas rui taancloumei baih baihmei guay tei Judamei Guangc nunc Chakh buk khou chanclou the.

²⁰Kamei nunc rui kata swluai khang rikna Silla thangc keymei chaeng khou Millio kai khou Joas ta swluailou the.

²¹Kata swluaimei nunc kiu Shimeat nac mpouh Jozakar lev Shomer nac mpouh Jehozabad minei the. Kata David kaidai khou guangh nunc tuang tarou khou mbeihlou the. Kumna kanac mpouh Amazia rui kaphaan guanghtu the.