Read Rongmei Naga 2 GUANGH NUNC 13 Bible Online

2 GUANGH NUNC 13 - Rongmei Naga bible

2 GUANGH NUNC 13

¹Ahazia rui puanhmei Joas rui Judamei guangc swmei tingkwm 23mei kwm Jehu rui puanhmei Jehoahaz rui Isaraelmei guangc sw the. Kamei Samaria khou tingkwm 17 guanghtulou the.

²Kahu khou guangh swloumei Jeroboam kumcna kamei rui Isaraelmei nunc ta paapc khou zaylouna kamei RINGHPOUC ruc khou paapc taanc the; kamei katuang simei taanv tei ganc key zat mak ge.

³Kumhpui zaeng rui RINGHPOUC rui Isaraelmei nunc ruc khou kalungpuamcna Siriamei guangc Hazael khatni kanac Benhadad ta Isaraelmei ruc khou rih tikeyna zaw tisilou dat dat the.

⁴Hei ganv khou tei Jehoahaz rui RINGHPOUC khou huayney the, kumna Siriamei guangc rui Isaraelmei ta rai kasicna rai bammei tei how lana kamei rui huayneymei tei dawlou the.

⁵RINGHPOUC rui Isaraelmei khang kapy swmei tiguangna kaniw ta Siriamei baanc khou rui tiduaklou the, heikumna Isaraelmei nunc kahu nungc kumcna nchu-nzaenghna lungc dat kan the.

⁶Heikum e tiki guangh Jeroboam rui kaniw ta titaancloumei paap guay tei kaniw ganc pat mak ge; kaniw hei tei taanc taan makna bam khwan e. Ashera ravpui maengc tei Samaria khou nai bam khwan e.

⁷Siriamei guangc rui Jehoahaz tuang ricmei guay ta swkamut kamaina taniang ta kumc nii binlouna katuang ricmei takuanh ricmei 50, takuanh gari ruh, khatni phay ricmei 10,000 hei na ganclou khwan e.

⁸Jehoahaz rui taanclou kanmei baihmei guay khatni kamei rui tancbaucna taancloumei taanv guay Isaraelmei Guangh nunc Chakh buk khou hylou e.

⁹Kamei tei theicna Samaria khou mbeihlou the, kumna kanac mpouh Jehoas rui kaphaan guanghtu the.

¹⁰Judamei guangc Joas rui guanghtumei 37mei kwm Jehoahaz nac mpouh Jehoas rui Isaraelmei guangc sw the, kumna kamei Samaria khou tingkwm 16 guangh swlou the.

¹¹Kamei ni guangh Jeroboam tuang simei tei lay kaluaihna RINGHPOUC ruc khou paapc taanc the.

¹²Jehoas rui taanclou kanmei baihmei taanv guay khatni Judamei guangc Amazia ruc khou adow kanmei tuang tancbauhmei taanv guay tei Isaraelmei Guangh nunc Chakh buk khou hylou the.

¹³Jehoas tei theicna kata Samaria khou guangh nunc tuang tarou khou mbeihlou the, kumna kanac mpouh kaneimei Jeroboam rui guanghtu the.

¹⁴Muhzwng Elisha tei theic kan nimei ram nnau nnauna bam khou Isaraelmei guangc Jehoas rui kata guang zauc khwan e. “Apule! Apule! Nang hei Isarael ta gaekloumeipu e!” twna sana kap the.

¹⁵“Sauhpai akhat lev pailu laaguang o,” twna Elisha rui sa tina Jehoas rui laaguang the.

¹⁶Hei tei kaap khang chamdaanv tho twna Elisha rui kakhou sa the. Guangh rui pai tei mbwng pat the, khoutei Elisha baanc rui guangh baanc tei sin bin the.

¹⁷Elisha lat theilayna guangh rui Siria biak thangc karihmei kailat akhat laanc pat the. “Kaap pat tho!” twna Elisha rui sa the. Guangh tei rui sauhpai tei kaap pat rappui lev “Nang hei Siriamei ta ngam nimei RINGHPOUC tuang pailu the. Nang rui Siriamei ta Aphek khou adow puni kumna nang rui kata ngam puni,” twna Elisha rui kakhou sa the.

¹⁸Khoutei pailu baihmei asaekc ni laana mi guay tei kandih khou khwnlou o twna Elisha rui guangh khou sa the. Guangh rui kandih khou khwnliang kathumhlouna nthaekc the.

¹⁹Hei tei rui Elisha lung tipuamc the, kumna guangh khou tei sa the, “Nang rui hei tei khwn liang panguh charuk khwan e thei nang rui Siriamei ruc khou rihngam nthan thiakhlou ni tuang e; tiki ntaw thu nang rui kaniw ruc khou rihngamliang kathumh na puni the.”

²⁰Elisha tei theicna mbeihlou the. Tingkwm pum Moabmei nunc rui Isaraelmei nunc ruc khou rih key tanh tan bam khwan e.

²¹Kaganv akhat khou theih mbeih nina bam khou Moabmei nunc guangmei ta howna mi theihmei pumc tei Elisha tuang tarou khou phaiclouna pak kan the. Mi phouh tei Elisha rou ta kahitow rappui lev ringc dat the kumna ding thau the.

²²Jehoahaz guangh kin saanvsaengh tei Siriamei guangc Hazael rui Isaraelmei ta rai bam khwan e,

²³heikum e tiki RINGHPOUC rui thu kaniw ta zauc nzianlou bam khwan e. Kamei rui Isaraelmei ta tiswmaanlou mak ge, tiki Abraham, Isak, khatni Jakob khou kamei rui swlou kanmei latdyng theilayna Isaraelmei ta nkhavlou khwan e. RINGHPOUC rui kamei nunc ta amuclou zat mak khwan e.

²⁴Siriamei guangc Hazael theic kanmei tangv kanac mpouh Benhadad rui kaphaan guanghtu dat khwan e.

²⁵Khoutei Isaraelmei guangc Jehoas rui Benhadad ta rihngamliang kathumhlouna Jehoas pu Jehoahaz kin khou Benhadad rui laa kanmei kaidai guay tei laa dat khwan the.