Read Rongmei Naga 2 GUANGH NUNC 14 Bible Online

2 GUANGH NUNC 14 - Rongmei Naga bible

2 GUANGH NUNC 14

¹Jehoas rui Isaraelmei guangc swmei kaneimei kwm Joas nac mpouh Amazia Judamei guangc sw the.

²Kamei katingkwm 25 khou guanghtuna Jerusalem khou tingkwm 29 guangh swlou khwan e. Kapui zanc rui Jerusalemmeiluc Jehoaddin twna kaw khwan e.

³RINGHPOUC rui pianmei taanv kamei taanc khwan e, tiki kamei kapu kapouc David kumh mak khwan e; kapu Joas rui taanhmei tei kamei ni taanc muay khwan e.

⁴Rav baihmei ta kalummei bamv guay tei kamei rui swmaan mak khwan e, kum tina meic nunc rui hei khou tei ravkhaengna agaw nteina bam khwan e.

⁵Guangh ngamv tei Amazia rui kabaanc khou kazumlou ngam pwkhou, kapu ta swluaimei meicdaihmei guay ta tei kamei rui swluai the.

⁶“Kanac nunc tuang khuay zaeng rui kapui kapu ta swluai nuh mak ge, khatni kapui kapu khuay zaeng rui alauc nunc ta swluai nuh mak ge; nkhuaipui mei ta tei swluai nina de,” twna Mousi tuang Riakdanv khou RINGHPOUC rui latdanv tiiloumei theilayna kaniw nac nunc ta thu kamei rui swluai mak ge.

⁷Amazia rui Edommei ricmei 10,000 ta Ntey nzaengc khou swluai the; kamei rui Sela kaidai ta kuakna laa the kumna mi zanc tei Joktheel twna phuaklouna hei tei ntaw nganvna kawna bam e.

⁸Khoutei Amazia rui latdiumei thouclouna Isaraelmei guangc Jehoas ta rih khaengc the.

⁹Khoutei Jehoas rui kumna sa guang dat the, “Kaganv akhat khou Lebanon chyngbut tuang sauhluai bang rui sidar bang khou ‘Nang nacpui tei anac now khang tiilou o,’ twna sa guang khwan e. Nwmbangc khouringc akhat guangna mi bang tei niipuat kan the.

¹⁰Amaziahle, ntaw nang Edommei ta ngamlouna nang gaengh swna bam e. Ntaw nai bammei zanc khou tei pianna kai khou bam lwm tho. Nang khatni nang mei nunc ta tiryanra khang, tabui khang sw katuakc khang sw bam tu cho?”

¹¹Tiki Amazia rui hei tei chulou mak khe, kum tina guangh Jehoas rui kamei nunc ta nduangh guangna kata Juda khou Beth Shemes twmei bamv khou adow the.

¹²Amazia tuang ricmei nunc ta zaw tisilou the kumna katuang ricmei nunc tei kakai kakai nzwan dat ngam kan the.

¹³Jehoas rui Amazia ta nym the kumna Jerusalem khou guangna Jerusalem kaidai raengc tei Ephraim raengckat khou rui Kakwn raenghkat nganv chowbuk 400 saenghmei sw kasic the.

¹⁴Kamei rui kachaekc, daandi guay, Isaraelmei tuang nanu guay khatni guanghkai tuang khiukhingh guay laana Samaria thangc phungc tat kan the. Bangh nymlou bammei guay ta ni kamei rui phungc tat the.

¹⁵Jehoas rui taancloumei baih baihmei taanv guay, kamei rui Judamei guangc Amazia ta baucna adow kanmei lam guay Isaraelmei Guangh nunc tuang Chakh buk khou hylou the.

¹⁶Jehoas tei theicna Samaria khou guangh nunc tarou khou mbeihlou the, kumna kanac mpouh Jeroboam kaneimei rui guanghtu dat the.

¹⁷Isaraelmei guangc Jehoas theic kanmei tangv Judamei guangc Amazia tingkwm 15 lungclou dat khwan e.

¹⁸Amazia rui taancloumei baih baihmei guay Judamei Guangc nunc tuang Chakh buk khou hylou the.

¹⁹Amazia ta swluai khang Jerusalem khou rik the, kum tina kamei Lakis thangc pak tat the, tiki zauczihmei nunc rui khou tei suic keyna swluai the.

²⁰Kapumc tei thu takuanh khou rui phungc guang datna David kaidai tuang guangh nunc tarou khou mbeihlou the.

²¹Khoutei Judamei nunc rui kanac mpouh tingkwm 16mei Uzzia ta guangh suamclou the.

²²Uzzia rui kapu theic kanmei tangv Elat kaidai laa datna kasiamh dat the.

²³Joas nac mpouh Amazia rui Judamei guangc swmei tingkwm 15mei kwm Jehoas nac mpouh Jeroboam kaneimei rui Isaraelmei guangc sw the, kumna kamei Samaria khou tingkwm 41 guanghtulou khwan e.

²⁴Isaraelmei ta paapc khou zayloumeipu guangh Jeroboam tuang simei thei tei layluaihna kamei RINGHPOUC ruc khou paapc taanc the.

²⁵Dihpy biak thangc Hamat chaeng khou rui dihba biak thangc theihmei Duipui nganv khou naimei Isaraelmei ramv guay kamei rui laagut dat the. Mi hei RINGHPOUC, Isarael Racguangc rui muhzwng Amittai nac mpouh Jona, Gat Hepher kaidaimeipu khou saloumei tei guang tanghmei tuang the.

²⁶Isaraelmei nunc bangh khatni nyng swmei kaguayna rui ryanra dai ryanramei tei RINGHPOUC rui how the; kaniw ta nkhavlou dat nimei meic gaanv khat na sini nai dat mak khwan the.

²⁷Isaraelmei ta tingsaengzaeng khang swmaan mutsut rap ni the twna kamei ning mak khwan e, kum lapui zaeng rui kamei rui kaniw ta guangh Jeroboam kaneimei paan rui kanlou dat khwan e.

²⁸Kaneimei Jeroboam rui taancloumei baih baihmei taanv guay, kamei tancbaucna suc-rih bamv khou sw kanmei guay, kamei rui akumhna Damaskas khatni Hamat kaidai ta Isarael khou laagut dat kan to twmei guay tei Isaraelmei Guangh nunc tuang Chakh buk khou hylouna nai the.

²⁹Jeroboam theicna guangh nunc tarou khou mbeihlou the, kumna kanac mpouh Zekaria rui kaphaan guanghtu dat the.