Read Rongmei Naga 2 GUANGH NUNC 16 Bible Online

2 GUANGH NUNC 16 - Rongmei Naga bible

2 GUANGH NUNC 16

¹Remalia nac mpouh Peka rui Isaraelmei guangc swmei tuang 17 tanghmei kwm Jotham nac mpouh Ahaz Judamei guangc sw the.

²Ahaz rui katingkwm 20 khou guangh sw the. Kamei tei Jerusalem khou tingkwm 16 guangh swlou khwan e. Kapu kapouc David rui RINGHPOUC Ravguangc hu khou ntwnna tatmei kumcna kamei thu tatlou mak khwan e,

³tiki kamei thu Isaraelmei guangc nunc thiak khou lungc khwan e. RINGHPOUC kaRacguangc rui kahaw makmei taanv Isaraelmei nunc rui guang pwkhou RINGHPOUC rui alay ganc kanmei nunc tuang karaengmei taanv thak tei layluaihna kamei rui kanac mpouh ta nganvna katpatna mai khou rawna ravkhaeng khwan e.

⁴Rav baihmei ta kalummei bamv guay khou, chyngbut ruc khou, kaphaan gaymei thingbang bangc khou, Ahaz rui khaengna, agaw nteina kalum khwan e.

⁵Siriamei guangc Rezin khatni Isaraelmei guangc Peka rui Jerusalem ta adowna dingbin khwan e, tiki Ahaz ta thu ngam mak khwan e.

⁶(Mi ganv kahak khou tei, Edommei guangc rui Elat kaidai ta laana khou tei lungc bammei Judamei guay ta alay ganc the. Edommei nunc khou tei lungc lyn the, kumna ntaw nganvna lungc bam e.)

⁷Ahaz rui Asiriamei guanghdaihmei Tiglath Pileser khou meic thouclouna heikumna sa the: “Ai hei nang khou lungh gutmei nang bangc de. Ata adowna bammei Siriamei khatni Isaraelmei guangc nei khou rui guangna kanduaklou o.”

⁸Ahaz rui daandi khatni kachaekc Isaraelmei khou rui khatni guanghkai lanvkhuk khou rui laana kaipat swna guanghdaihmei khang tei tii the.

⁹Ahaz lat tei mundawlouna Tiglath Pileser rui katuang ricmei nunc Damaskas khou thouc guangna mi kaidai tei laa the, guangh Rezin ta swluai the kumna meic nunc ta kangmei nunc swna Kir thangc zay tat the.

¹⁰Guangh Ahaz tei Tiglath Pileser ta ariw khang Damaskas thangc ngangh pwkhou kamei khou tei ravchabamv akhat how lana mi maengc tei nsunh-ntuaih hei tei kahak kasiamh lana amuh Uria khou tii guang the.

¹¹Uria rui hei tei kahak ravchabamv akhat Ahaz hanc guang dat makmei dak khou kasiamh luai the.

¹²Damaskas thangc rui guang dat pwkhou ravchabamv tei luailou bammei ta tei how the,

¹³kumna kamei khou tei khouringh rawna khaeng the, nap-bi khaeng the, zouhpaanv key the, khatni lauziunac zei bun keyna khaeng the.

¹⁴RINGHPOUC khang katloumei tanzinc tuang ravchapaeng tei ravchabamv thanc lev Ravkai kak khou nai bam khwan e, kum tina Ahaz rui hei tei katuang ravchabamv thanc tuang dihpy biak thangc laa kalaiclou the.

¹⁵Khoutei kamei rui amuh Uria khou heikumna latdanv tii the: “Lauthwan rawna khaengmei khang, tingzyn nap-bi khaengmei khang, guangh tuang khatni meic nunc tuang rawna khaengmei khatni nap-bi khaengmei khang mi atuang ravchapaeng daihmei hei sinsw tho. Khaengmei khouringc zei guay tei khui hei bunlou tho. Kumna tanzinc tuang ravchapaeng hei thu ai rav ta kachucmei bamv khang lou tho.”

¹⁶Guangh tuang latdanv thei tei layna Uria rui taanc the.

¹⁷Ravkai khou sinsw bammei tanzinc tuang katummei gari guay tei guangh Ahaz rui laa patna khou tei lou bammei kaikhuang guay tei laa pat the; tanzinc tuang guaituamchic 12 tuang nam khou lou bammei tanzinc tuang duikuak tei ni kamei rui laa pat lana ntauh bamv ruc khou lou the.

¹⁸Kumna Asiriamei guanghdaihmei ta tipianlou khang rui Ravkai khou guangh bamvpaeng loumei bamv khang thwan kauhloumei tei Ahaz rui ra ganc the kumlana guangh Ravkai khou gut khang swloumei chaeng tei ni mbangh the.

¹⁹Guangh Ahaz rui taancloumei baih baihmei taanv guay ni Judamei Guangc nunc tuang Chakh buk khou hylou the.

²⁰Ahaz tei theicna David kaidai khou guangh nunc tuang tarou khou mbeihlou the, kumna kanac mpouh Hezekia rui kaphaan guanghtu lyn the.