Read Rongmei Naga 2 GUANGH NUNC 17 Bible Online

2 GUANGH NUNC 17 - Rongmei Naga bible

2 GUANGH NUNC 17

¹Judamei guangc Ahaz rui guangh swmei 12mei kwm Ela nac mpouh Hosea Isaraelmei guangc sw the, kumna kamei Samaria khou tingkwm chakiu guanghtulou khwan e.

²Kamei RINGHPOUC ruc khou paapc taanc khwan e, tiki kahu khou Isaraelmei guangc swloumei nunc kumcna changh thu paapc taanh mak khwan e.

³Asiariamei tuang guangc daihmei Shalmaneser rui karuc khou rih key khwan e; kumna Hosea rui Shalmaneser khou gutlou the kumna tingkwm pum kakhang dihkhav tii bam khwan e.

⁴Tiki tingkwm akhat thu Hosea rui Izipmei guangc So khou latdiumei thouclouna kata guangna nkhavlou khang khatni dihkhav tii taan khang nkhavlou o twna sa the. Hei tei Shalmaneser rui chu pwkhou, kamei rui Hosea ta nym the kumna kangkai khou lou the.

⁵Khoutei Shalmaneser rui Isaraelmei ruc khou rih keyna Samaria kaidai ta dingbin the. Dingbinmei kathumhmei kwm

⁶tei Hosea rui guanghtumei chakiumei kwm, Asiriamei guanghdaihmei rui Samaria kaidai ta laana Isaraelmei nunc ta Asiria thangc bangh swna nym tatna meic gaanvsaekc ta Hala kaidai khou meic gaanvsaekc ta Gozan ramv khou Habor duithuak daeng khou khatni gaanvsaekc ta Media tuang kaidai guay khou tilungclou khwan e.

⁷Mi hei Isaraelmei rui RINGHPOUC kaniw Racguangc Izipmei guangc baanc khou rui kanpatlouna Izip kandic khou rui zaypatloumei kaniw Racguangc ruc khou paapc taanhmei zaeng rui e. Kaniw rui rav baihmei ta kalum the,

⁸kaniw rui guang nimei hu khou RINGHPOUC rui nthau ganclou kanmei nunc riak tei layluaihna khatni Isaraelmei guangc nunc rui swloumei riak tei laana kaniw rav baihmei ta kalum khwan e.

⁹Isaraelmei nunc tei RINGHPOUC kaniw Racguangc rui nuh makmei taanv guay taanc khwan the. Kaniw rui namvlauna khou rui kaidai daihmei kathuic khou nganvna namv kathuicna khou rav baihmei ta kalummei bamv kasiamhlou khwan e.

¹⁰Chyngbut guay khou thingbang bangc kathuic khou kaniw rui swangtauc tiangc khatni Ashera ravpui maengc suamclou khwan e.

¹¹RINGHPOUC rui mi kandic khou tei rui alay ganclou kanmei nunc thak tei lay luaihna rav baihmei ta kalummei ravchabamv guay khou tei kaniw agaw ntei khwan e.

¹²RINGHPOUC rui ravmaengc kalum riu twna samei tei liamna kalum the hei tei rui RINGHPOUC lungpuam tithau khwan e.

¹³RINGHPOUC rui katuang latdiumei nunc khatni muhzwng nunc Isaraelmei khatni Judamei khou thouc guangna kumna sa khwan the: “Nangniw tuang simei taanv guay hei ganc tho kumna ai rui nangniw pupouc nunc khou tiiloumei khatni abangc muhzwng nunc rui nangniw khou dincloumei atuang Riakdanv khou naimei alatdanv guay tei piu tho.”

¹⁴Tiki kaniw piu mak ge; RINGHPOUC kaniw Racguangc khou lwmlou makmei kaniw pupouc nunc kumcna kaniw nu tanc khwan e.

¹⁵RINGHPOUC tuang latdanv guay kaniw piu mak khe, kaniw pupouc nunc rui RINGHPOUC lev swlou kanmei latdyng tei kaniw ngaek mak khe, khatni kamei rui luhmei lat guay tei kaniw thouh swlou mak khe. Kaniw kabah maekmei ravmaengc nunc ta kalumna kaniw kabah maekmei mei nunc sw the. Kaniw daeng khou lungc nkuay bammei zaat nunc thiak layluaih riu twna RINGHPOUC rui dincloumei lat tei liamna kaniw layluaih the.

¹⁶RINGHPOUC kaniw Racguangc tuang latdyn guay tei kaniw swbakna ntanh tuang guaituamchic kanei kasiamhna kaniw kalum the; kaniw rui Ashera ravpui maengc ni kasiamh the, gaanchuangcna guay ta khatni Baal rav ta kalum the.

¹⁷Kaniw nac mpouh aluh nunc ta rav baihmei khang rawna khaeng the; kaniw rui ravtow amuc kachucna khatni mang mbanna, khatni RINGHPOUC tuang mikzaw khou nkhuaimei tei kaniw lunghgutna taancna RINGHPOUC lungpuam tithau the.

¹⁸RINGHPOUC rui Isaraelmei nunc ta lunghpuamc the kumna kaniw ta kamikzaw khou rui ganc pat the, kumna Judamei guanghdic na ta ganclou the.

¹⁹Tiki Judamei nunc nganvna RINGHPOUC kaniw Racguangc tuang latdyn tei piu mak ge; Isaraelmei nunc rui nsuh guangmei riak tei kaniw layluaih the.

²⁰RINGHPOUC rui Isaraelmei guayna ta ganc pat the, kaniw ta riapna meic nzimei zauczihmei nunc baanc khou tiipatlou the kumna nkhamh khou kaniw ta kamikzaw khou rui ganc pat kan the.

²¹RINGHPOUC rui Isaraelmei ta Juda khou rui tibaic patmei tangv Isaraelmei rui Nebat nac mpouh Jeroboam ta kaniw guangc tiswlou the. Jeroboam rui kaniw ta RINGHPOUC ta ti-mpatlouna kaniw ta si sihmei paap khou zaylou the.

²²Kaniw Jeroboam thei layna kamei rui taanhmei paap guay khou tei kaniw lay taanc bam khwan e.

²³Kumna kabangc muhzwng nunc ta thouc guangna kaniw ta tei kamik zaw khou rui ganc pat puni the twna sa guangmei lat tei guang tangcna nkhamh khou RINGHPOUC rui kaniw ta kamikzaw khou rui ganc pat kan the. Heikumna Isaraelmei nunc ta Asiria thangc bangh zay tat the, ntaw nganvna kaniw khou tei bam e.

²⁴Asiriamei guanghdaihmei rui Babilon, Kut, Ivva, Hamat, khatni Sepharvaim kaidaimei guay ta khuamna bangh zay tat kanmei Isaraelmei nunc phaan tei Samaria tuang kaidai guay khou tilungclou the. Kaniw rui mi kaidai guay tei kaniw khang laana lungc the.

²⁵Kaniw khou tei guang lungc rey khou, RINGHPOUC ta kalum mak khwan e, kum tina RINGHPOUC rui kamangliangpui nunc thouc guangna kaniw gaanvsaekc ta nkay luai the.

²⁶Asiriamei guanghdaihmei rui Samaria tuang kaidai guay khou tilungcloumei nunc tei mi kandic tuang rav latdyn thay timakna mi rav tei rui kamangliangpui nunc thouc guangna kaniw ta nkay luai bam the twmei guangh khou poulou the.

²⁷Kumna guanghdaihmei tei rui kalatdanv pat the: “Aniu rui nym guangloumei amuh pang khou rui amuh gaanv khat thouc hanc dat tho; kamei rui mi kandic rav tuang latdyn tei kaniw khou nchamlouna lungc bam dat kan di tho.”

²⁸Kumna thouc guang datmei amuh tei Bethel khou lungcna, RINGHPOUC ta kalum nimei thak kaniw khou dinclou dat khwan the.

²⁹Heikum e tiki Samaria kaidai khou lungc bammei nunc thu kaniw tuang racmaengc kasiamh lana Isaraelmei rui kasiamhloumei rav bamv guay khou lou the. Kakang baih baihmei kathuic tei kaniw rui lungc bam lungc bammei kaidai khou kaniw tuang racmaengc kasiamh the.

³⁰Babilon khou rui guangmei rui Sukkot Benot tuang racmaengc, Kutmei nunc Nergal racmaengc, Hamatmei nunc rui Ashima racmaengc,

³¹Ivvamei nunc rui Nibhaz, khatni Tartak tuang racmaengc; khatni Sepharvaimmei nunc rui Adrammelek, khatni Anammelek rav khou kaniw nac nunc ta rawna khaeng the.

³²Kaniw rui RINGHPOUC ta ni kalum e khatni rav baihmei ta kalum khang kaniw pang khou rui amuh kadah patna mi nunc khang tei khaeng the.

³³Heikumna kaniw RINGHPOUC ta ni kalum the, kaniw guangmei kandic thangc tuang rav nunc ta ni kaniw riak theilayna kalum the.

³⁴Aseic nganvna kaniw tuang rey nungc tuang riak phungcna bam di he. Kaniw RINGHPOUC ta kalum mak ge khatni RINGHPOUC rui Jakob kikta Isaraelmei nunc khou tiiloumei latdyn khatni latdanv guay tei ni piu mak ge.

³⁵RINGHPOUC rui kaniw lev latdyng swna latdanv tiiloumei kiu mi hei e: “Rav baih baihmei ta kalum riu, rav baihmei khou nkhum keyna kalum riu, kasiamruai ni sw riu, mi khang tei khaeng ni khaeng riu.

³⁶Pumtan khatni ngamv kazauhna nangniw ta Izip khou rui phungc patloumei RINGHPOUC alat nangniw piu nina e, nangniw akhou nkhum key nina e khatni akhang khaeng nina e.

³⁷Ai rui nangniw khang hy keyloumei latdyn khatni latdanv guay tei nangniw ngaek nina e. Nangniw rav baih baihmei ta kalum lak nina e,

³⁸khatni ai nangniw lev sw kanmei latdyng tei amuc lak nina e.

³⁹RINGHPOUC, nangniw tuang Racguangc alat nangniw piu nina e, kum e thei ai rui nangniw ta zauczihmei nunc khou rui kanlou puni.”

⁴⁰Hei tei kaniw rui nkinglou mak ge, kaniw tuang rey nungc riak guay suicna tat bam khwan e.

⁴¹Kumna kaniw rui RINGHPOUC ta kalum the; kumlana kaniw tuang ravmaengc ta ni kalum the; aseic nganvna kaniw nac nunc tuang nac nunc hei tei kumcna lungc bam e.