Read Rongmei Naga 2 GUANGH NUNC 18 Bible Online

2 GUANGH NUNC 18 - Rongmei Naga bible

2 GUANGH NUNC 18

¹Ela nac mpouh Hosea rui Isaraelmei guangc swmei kathumhmei kwm Ahaz nac mpouh Hezekia rui Judamei guangc sw the.

²Katingkwm 25 khou kamei guanghtuna kamei Jerusalem khou tingkwm 29 guangh swlou khwan e. Kapui hei Zekaria nac aluhpui Abija e.

³Kapu kapouc guangh David theilayna RINGHPOUC rui pianmei taanv kamei taanc khwan e.

⁴Kamei rui rav baih baihmei ta kalummei bamv guay swmaan khwan e, swangtauc tiangc guay swbau khwan e, khatni Ashera ravpui maengc guay swbau ganc khwan e. Mousi rui kasiamhloumei tanzinc tuang nrui maengc Nehushtan twna kawmei tei ni kamei rui swpuat paruat ruatlou khwan e. Mi ta tei Isaraelmei nunc rui agaw nteina kalum bammei tuang khwan e.

⁵Hezekia rui RINGHPOUC Isarael Racguangc khou lwmlou khwan e; kamei kumhmei guangc Judamei khang lungc guang zat mak khwan e, lungc ni lungc guang dat mak khwan e.

⁶Kamei RINGHPOUC khou lwmnuhmei swna lungc khwan e, kalat liam zat mak khwan e, Mousi khou RINGHPOUC rui tiiloumei latdanv guay tei piu chuyna piu bam khwan e.

⁷Kumna RINGHPOUC rui kata nduanghlouna kamei taanhmei kaguayna ngam khwan e. Kamei Asiriamei guanghdaihmei bangc khou bam lak ge twna athwng the.

⁸Kamei rui Philistinmei nunc ta rihngamna kaniw tuang namv launa khou rui kaidai daih daihmei, Gaza kaidai khatni mi daeng khou nai nkuay bammei kaidai guay nganvna kuakna laa the.

⁹Hezekia rui guanghtumei tuang padeihmei kwm— guangh Hosea rui Isaraelmei guangc swmei chaneimei kwm, Asiriamei guangc Shalmaneser Isaraelmei ruc khou rih keyna Samaria ta dingbin khwan e.

¹⁰Dingbinloumei kathumhmei kwm Samaria ta laa the. Hei tei Hezekia guanghtumei charukmei kwm khatni Hosea rui guanghtumei tuang chakiumei kwm khwan e.

¹¹Asiriamei guanghdaihmei rui Isaraelmei nunc ta Asiria kandic thangc bangh swna nym tatna kaniw gaanvsaekc ta Gozan ramv khou Habor duithuak paengc khou Hala kaidai khou khatni gaanvsaekc ta Media kaidai guay khou tilungclou khwan e.

¹²Samaria ta laa kan the kalam thu Isaraelmei nunc rui RINGHPOUC kaniw Racguangc lat piu makna RINGHPOUC lev swloumei latdyng sw bakna kabangc Mousi khou tiiloumei latdyn guay liammei zaeng rui e. Kaniw hei tei chu ni chulou mak khe piu ni piu mak khe.

¹³Hezekia rui guanghtumei 14mei kwm Asiriamei guanghdaihmei Sennakerib rui Juda tuang raengh raengloumei kaidai guay ta adow khwan e kumna laa ni laa khwan the.

¹⁴Sennakerib Lakis kaidai khou bammei ganv khou Hezekia rui heikumna sa guang the: “Ai sw bammei tei nkhuai the; adow nthaekclou tho, nang rui ney neymei ai tii ni the.” Daandi kilogram 10,000 khatni kachaekc kilogram 1000 kakhang tii nina e twna Sennakerib rui daw guang the.

¹⁵Isaraelmei khou khatni guanghkai lanvkhuk khou naimei daandi guay Hezekia rui tii the.

¹⁶Isaraelmei kaikhamv khou lou bammei kachaekc guay, khatni kamei rui kaikhamv tiangc guay duaploumei kachaekc guay khuak patna mi guay tei Sennakerib khang tii the.

¹⁷Jerusalem khou Hezekia ta adow khang Asiriamei guanghdaihmei rui rihmei kangdai akhat Lakis khou rui thouc guang khwan the. Mi kang ta tei katuang daic liangmei rihpy gaanv thumh rui nduangh guang khwan the. Kaniw Jerusalem guang tangc pwkhou, phey taanhmei nunc rui taanc bammei bamv karucmei zeic khou rui dui laa keymei duichaeng daeng khou naimei chaengdai khou tei kaniw guang bam khwan the.

¹⁸Kaniw rui guangh Hezekia ta kaw the, kumna katuang meicdaihmei gaanv thumh: Hilkia nac mpouh Eliakim, guanghkai phaengczauhmeipu, latzankai tuang hypouc Shebna, khatni chakh buk guay sinmeipu Asap nac mpouh Joa kaniw rui kaniw ta ariw khang pat the.

¹⁹Guangh Hezekia rui heidikamv lwm gayna bammei hei tabui zaeng rui cho twmei guanghdaihmei rui thay nii e twna meicdaihmei gaanv khat rui kaniw khou sa the.

²⁰Kamei rui sa the, “Rihmei pumtan khatni rihmei nunc ramhei phaan lat rui diu e twna nangniw ningna cho? Asiria bangc bam lakna athwng pwkhou nangniw ta thow rui nkhavlou puni twna ningna cho?

²¹Izip rui nangniw ta nkhavlou pwng e twna nangniw ning e, tiki hei tei ntou builwang kumh tuang de— hei tei bakna nangniw baanc zamh puni. Izipmei thu kakhou ngangvloumei kathuihna khou hei kumhmei tuang e.”

²²Asiriameipu tei rui sa dat re, “RINGHPOUC nangniw Racguangc khou nangniw ngangvlou e twna nangniw ningna cho? Hezekia rui RINGHPOUC tuang Ravkai guay khatni ravchapaeng guay tei sw kasicna Jerusalem khou naimei ravchapaeng khou na Judamei khatni Jerusalemmei guayna kalum nina de twna sa kan the.

²³Guanghdaihmei zanc khou rui ai rui mi hei sa puni e. Tuangc nimei maansei nangniw khou nai e thei ai rui nangniw khang takuanh 2000 tii puni.

²⁴Nangniw thu Asiriamei rihpy nthyam liangmei khang nganvna biuh mak ge, tiki nangniw Izipmei rui takuanh gari khatni takuanh ricmei nunc thouc guang pwng e twna lwm bam e!

²⁵RINGHPOUC rui nkhavlou makna ai rui nangniw kandic ta adowna sw kamut kamailou khang RINGHPOUC rui akhou samei tuang de.”

²⁶Khoutei Eliakim Shebna, khatni Joa kaniw gaanv thumh rui mipu khou tei sa the, “Aniw khou Aramaikmei lat rui sa do, aniw thay de. Ibrimei lat rui salou riu, raengh khou meic nunc rui nking bam e.”

²⁷Kamei rui daw the, “Nangniw lev guangh khou na mi lat hei salou khang guanghdaihmei rui aniw ta thouc guangmei tuang e twna nangniw ningna cho? Kiuc hamh e, nangniw kumcna kaniw zwn-bav tu zangv pw nimei raengh khou dungc bammei meic nunc khou tei ni ai sa bammei tuang e.”

²⁸Khoutei mipu tei rui ding thau lana Ibrimei lat khou rui kauc the, “Asiriamei guanghdaihmei rui nangniw khou sa bammei hei nking o!

²⁹Hezekia rui nangniw ta guat mak khang ramh thay lo twna kamei rui sa e. Hezekia rui nangniw ta kanlou ngam mak ge.

³⁰RINGHPOUC khou ngangvlou khang kamei rui sa bammei tei lwm la riu. RINGHPOUC rui nangniw ta kanlou puni, kumna Asiriamei ricmei nunc rui nangniw kaidai laa ni tuang hamh e twna ning la riu.

³¹Hezekia lat ta laa bam ri tho; Asiriamei guanghdaihmei rui kumna sa the: Ai lev guat sw kho kumna akhou guang tho; heikum e thei nangniw meic kathuicna drakhathai khatni nangniw tuang tasitthai tuna bam puni khatni nangniw tuang duikhwlai kahak khou rui dui zangv bam puni,

³²guanghdaihmei rui nangniw ta nangniw kandic kumcrapmei nap-bi khatni drakhadui padikmei taektw khatni drakhalau gaymei ramv, Olive thauc khatni nkhuaihdui rui padikna nangniw rui tu zangvna theih makna bam khang ai rui nduanghlou mak saanv, Hezekia rui chaengzay mbianghna RINGHPOUC rui aniu ta kanduaklou puni de twmei lat tei laa bam ri tho.

³³Baih baihmei kandic guay tuang rav nunc rui ni kaniw kandic ta Asiriamei guanghdaihmei khou rui kanlou kanmei tuang nai bu cho?

³⁴Hamat khatni Arpad tuang rav tei tabui thangc tat kan thav Sepharvaim, Hena, khatni Ivva rav nunc tei tabui thangc tat kan tha? Samaria ta kanlou bo?

³⁵Mi rav nunc hei rui kaniw kandic ta Asiriamei guanghdaihmei khou rui tabui nungc kanlou kan bo? Heikum e tw e thei RINGHPOUC rui Jerusalem ta kanlou puni de twmei lwm khang tabui khou naina cho?”

³⁶Guangh Hezekia rui kaniw khou saloumei theilayna meic nunc tei lat daw mak khe.

³⁷Khoutei Eliakim, Shebna, khatni Joa rui kaniw lung kabiuna kaniw tuang phey siatkaek the, kumna guangh daeng khou guangna Asiriameipu rui samei lat tei poulou the.