Read Rongmei Naga 2 GUANGH NUNC 19 Bible Online

2 GUANGH NUNC 19 - Rongmei Naga bible

2 GUANGH NUNC 19

¹Guangh Hezekia rui kaniw lat tei chu pwkhou kalung kabiuna kaphey siatkaek the, kumna zaengsiphey piuna RINGHPOUC tuang Ravkai thangc tat the.

²Kamei rui Eliakim, Shebna, khatni amuh gaanvthaih nunc ta Amoz nac mpouh muhzwng Isaia daeng thangc thouclou the. Kaniw ni zaengsiphey piu the.

³Isaia khou sa o twna kamei rui kaniw khou saloumei lat kiu thu: “Aseic hei ryanramei tingmik ge; aniu ta riaplou the kumna zak the. Aniu hei nah bammei ganv tangcna puanc ngam makmeipui kumc ryanra the.

⁴Ringhmei Racguangc ta tizak khang Asiriamei guanghdaihmei rui katuang meicdaic liangmeipu ta thouc guang the. Mi tizak bammei lat hei RINGHPOUC aniu Racguangc rui chu kan diu kumna mi lat tei sa bammei nunc ta tei riaplou kan diu. Kumna ringc nsaekc bammei aniu mei nunc khang huayneylou o.”

⁵Guangh Hezekia tuang lat tei Isaia rui chu pwkhou,

⁶kamei rui heikumna daw guang khwan e: “RINGHPOUC rui kanlou ngam ni tuang hamh e twna Asiriamei nunc rui kadung bammei ta tei nangniw ping riu twna RINGHPOUC rui sa e.

⁷RINGHPOUC rui guanghdaihmei khou rih khwan tichulou pwkhou kaniw kandic nzwanna tipak tat puni, kumna khoutei RINGHPOUC rui kaniw ta swluai puni.”

⁸Asiriamei guanghdaihmei tei Lakis ganclouna Libna daeng khou naimei kaidai ta adow bam e twmei Asiriamei meicdaihmeipu tei chu the; kumna guangh ta khou tei ariw khang tat the.

⁹Izipmei ricmei nunc Sudanmei guangc Tirhaka rui kapy swna kaniw ta adow khang guang the twmei Asiriamei nunc chu the. Asiriamei guanghdaihmei tei mi chamv tei chu pwkhou Judamei Guangc Hezekia khou heikumna

¹⁰latdanv tii guang the, “Nangniw abaanc khou key lou ni tuang hamh e twna nang rui lwm bammei Ravguangc rui nangniw khou sa bammei lat tei rui nangniw ta tiguat la riu.

¹¹Asiriamei guanghdaihmei rui kamei rui swmaan ni twna dinglou kanmei kandic khou sw kanmei chamv tei nang chu the. Nang duak la diw e twna ningna cho?

¹²Apu apouc nunc rui Gozan, Haran, khatni Rezep kaidai guay ta swmaan kan the khatni Telassar khou bammei Bethedenmei nunc ta swluai kan the, kaniw tuang rav akhat na rui sini kaniw ta kanlou ngam kan mak ge.

¹³Hamat, Arpad, Sepharvaim, Hena, khatni Ivva kaidai guay tuang guangc nunc tei tabui thangc bam kan tha?”

¹⁴Guangh Hezekia rui chamvphunghmei nunc khou rui tatdyn tei laana pac the. Kumna kamei Isaraelmei thangc tatna mi tatdyn tei RINGHPOUC hu khou mbaenglouna

¹⁵kumna huayney the, “He RINGHPOUC, Isaraelmei Racguangc, kerubim nunc ruc khou dungc bammeipu, nang na hei Ravguangc e, kandih tuang guanghdic guay sinmeipu e. Nang rui tingpuk kandih damclou the.

¹⁶He RINGHPOUC, ntaw aniw ruc khou pat bammei hei zauclou o. Ringc bammei Racguangc nang zaw sw kasic nipui lat Sennakerib rui sa bammei guay hei nkinglou o.

¹⁷Kaling siakna he RINGHPOUC Asiriamei guangc nunc rui guangh kandic azuhta khatni kaniw ramvdui guay ta sw kamut kamailou the.

¹⁸Kaniw tuang rav guay mai ntei kan the. Kaniw tuang rav guay tei rav hamh e, maansei baanc rui kasiamhloumei thing tauh tuang maengc nunc de.

¹⁹He RINGHPOUC, aniw Racguangc ai huay e kabaanc khou rui aniw ta kanlou o nang na hei Ravguangc e twmei kandihmei zaat guayna rui thay kan diu.”

²⁰Isaia rui Hezekia khou lat sa guang e, Isarael Racguangc RINGHPOUC rui heikumna sa e; Asiriamei guangc Sennakerib lam khou huayneymei tei ai rui chulou the.

²¹Guangh tuang huayneymei tei RINGHPOUC rui chuna heikumna RINGHPOUC rui sa e twna Isaia rui guangh Hezekia khou sa the, “Sennakerib, Jerusalem kaidai rui nang ta malana nuic e.

²²Nang thow ta sinnuina tizak bam tu e twna ningna cho? Isarael tuang nthanmei Racguangc ta nang thouh sw mak ge.

²³Nang tuang takuanh gari guay rui Lebanon tuang kauh liangmei luangcbut guay ta laa the twna akhou nang gaengh sw khang nang rui nang tuang latdiumei nunc thouc guang the. Hei khou tei kauh liangmei sidar bang guay dow keyna mi ngouc laa syng thangc gut the twna nang gaengh sw the.

²⁴Nang ginramc kandic guay khou duikhunc khiucna dui zangv the khatni nang tuang ricmei nunc rui Nail duithuak kaan thip the twna nang gaengh sw the.

²⁵“Mi guay hei tipat khang ai rui rey nungc rui swlou tang the twmei nang chu zat mak hena cho? Hei tei ntaw ai rui taanc pat bammei tuang e. Raengh raengloumei kaidai guay tei swpuat paruatlou khang ai rui nang khang ngamv tiilou khwan the.

²⁶Mi kaidai guay khou lungc bammei nunc tei kaniw ngamv maek khwan the; kaniw tei ping kadouh duay the. Kaniw tei suhmei neihpat pwan hu khou laupuk pucbwan guay kumc khatni kainam khou thaumei pucbwan kumc khwan the.

²⁷“Tiki nang tabui taanc bam tu cho khatni tabui thangc tat bam tu cho twmei ai thaypary de. Akumhna nang aruc khou lunghpuamcna sw kan tu cho twmei ai thay de.

²⁸Nang reic patna khatni nang gaengh swna sw kanmei chamv tei ai chu the, kumhpui zaeng rui ntaw thu nang nwkwang khou ntanhkhuay goulouna nang guangmei chaeng khou tei zay hanc dat puni the.”

²⁹Khoutei Isaia rui guangh Hezekia khou sa the, “Mi hei guang tangc pw nimei tuang madanh khang kiu mi hei the. Aseih kwm lev nkun hei karana thaumei nap-bi tu puni the, mi tangv thu nangniw nap-bi lingc keyna tay tu puni the, khatni drakha bang lingc keyna kathai rei tu puni the.

³⁰Juda khou ringc bam duhmei nunc tei thu kamaan zangc nthuk keyna kathai nthaimei thingbang kumcna daicthau puni the.

³¹Jerusalem khatni Zaion Chyng khou theic nsaekcmei nai puni the, kalam thu mi hei guang tangh khang RINGHPOUC rui dinglou tang the.

³²“Asiriamei guanghdaihmei lam khou RINGHPOUC rui heikumna sa e: ‘kamei mi kaidai lungc khou gut ni tuang hamh e khatni mi kaidai ruc khou pailu akhat na sini kaaplou ni tuang hamh e. Nggih phunghmei ricmei gaanv khat na sini mi kaidai daeng khou guang ni tuang hamh e, khatni kaniw rui mi kaidai ti hei dingbin ni tuang hamh e.

³³Mi kaidai khou hei gutlou makna kaniw rui guangmei chaeng tei kaniw hanc dat puni. RINGHPOUC, ai rui samei tuang e.

³⁴Azanc khang rui khatni ai rui abangc David khou swlou kanmei latdyng khang rui ai rui heipui kaidai ti hei gaek puni.’ ”

³⁵Mi nungc zingbangc tei RINGHPOUC tuang baanchara Asiriamei tuang zypui khou guangna rihmei 1,85,000 ta swluai the. Nthuanh tinggaanc pat pwkhou kaniw tei theic ngamna bam khwan the.

³⁶Khoutei Asiriamei guanghdaihmei Sennakerib tei Nineve thangc hanc dat kan the.

³⁷Zaeng neih khat kamei katuang rav Nisrok tuang ravkai khou kalum bam khou kanac mpouh gaanvnei, Adrammelek lev Sarezer rui kata dow luaina Ararat kandic thangc pak tat kan the. Kanac mpouh baihmei gaanv khat Esarhaddon twmeipu rui kaphaan guangh sw the.