Read Rongmei Naga 2 GUANGH NUNC 2 Bible Online

2 GUANGH NUNC 2 - Rongmei Naga bible

2 GUANGH NUNC 2

¹RINGHPOUC rui Elija ta pwansav khou rui tingkauh thangc laa thau nimei ganv guang pu the. Elija lev Elisha tei Gilgal khou rui kaamc thau the,

²kumna chaeng khou tat bam khou Elija rui Elisha khou sa the, “Nang mi bamv khou hei bam khwan o; ata Bethel thangc tat ro twna RINGHPOUC rui akhou latdanv tii the.” “RINGHPOUC khatni nang ringc bammei suai makmei kumc ai nang ta mpatlou lak ge twmei latdyng hei swpui tuang e,” twna Elisha rui daw the. Kumna kaney Bethel khou guang the.

³Hei khou tei bammei muhzwng kang akhat rui Elisha daeng khou guangna thanv e, “RINGHPOUC rui aseic hei nang kaipouc ta laa tat kan puni the twmei nang thay dai cho?” “Ngguay, ai thay de, kum e tiki aniu mi lam hei rac nangh e,” twna Elisha rui daw the.

⁴“Nang khou hei bam khwan o; RINGHPOUC rui ata Jeriko thangc tat ro twna sa e,” twna Elija rui Elisha khou sa the. Kum e tiki, “RINGHPOUC khatni nang ringc bammei suai makmei kumcna ai nang ta mpatlou lak ge twmei latdyng hei swpui tuang e,” twna Elisha rui daw the. Heikumna kaney gaanv nei Jeriko khou guang the.

⁵Hei khou tei bammei muhzwng kang akhat Elisha daeng khou guangna “RINGHPOUC rui nang kaipouc ta aseic hei laa tat kan puni the twmei nang thay dai cho?” twna thanv the. “Ngguay, ai thay de, tiki aniu mi lam khou hei sa nangh e,” twna Elisha rui daw the.

⁶Khoutei Elija rui Elisha khou sa the, “Nang khou hei bam khwan o; RINGHPOUC rui ata Jordan duithuak thangc tat ro twna sa e.” Kum e tiki Elisha rui “RINGHPOUC khatni nang ringcna bammei hei suai makmei kumc ai nang ta mpatlou lak ge twmei latdyng hei swpui tuang e,” twna daw the. Heikumna kaney tei tat key the.

⁷Hei kumna muhzwng 50 rui kaney thei lay key the. Elija lev Elisha tei Jordan duithuak paengc khou key ding the, kumna baihmei muhzwng nunc tei kaney khou rui duc maihna ding bam khwan e.

⁸Khoutei Elija rui katuang thiula saenghmei luak patna hei tei kasiatc lana hei tei rui dui ta bai the. Khoutei dui tei luangc ntamv the kumna kamei lev Elisha tei ramvkiang khou kaan pat the.

⁹Hei bamv khou tei, Elija rui Elisha khou sa the, “Ata laa tat makmei hu khou ai rui nang khang swlou pw tu laa niimei kiu tabui cho sa tho.” “Nangbamv lynmei khou lou duc nimei nang tuang ngamv tei kadam kanei akhou tiilou tho,” twna Elisha rui daw the.

¹⁰“Tii kunghmei tuang nang thu ney e cho, kum e tiki, ata laa tat kanmei ta nang how e thei nang hei tei laatow puni the; tiki nang hei tei how mak ge thei, nang hei tei laatow ni tuang hamh e,” twna Elija rui daw the.

¹¹Kaney kumna kachucna tat bam khou thay mak daekna mai takuanc rui zaymei mai gari tei kaney kak khou guangna Elija ta pwansav khou rui tingkauh thangc laa ku kan the.

¹²Elisha rui hei tei how lana “Apu, apu! Isarael ta gaekloumei Tancbauhmeipu! Nang tat kan ni thena cho!” twna kauc the. Kumna kamei Elija ta how dat zat kan mak khe. Elisha tei kazaengsina katuang thiula saenghmei tei kanei khang siatkaek the.

¹³Khoutei Elija tuang thiula saenghmei kathyng keylou duhmei tei khuaic lana hanc datna Jordan duithuak paengc khou ding the.

¹⁴Kamei rui Elija tuang thiula saenghmei rui dui ta tei kathamvna kumna sa the, “RINGHPOUC, Elija tuang Racguangc tabui thangc cho?” Hei tangv tei kamei rui dui ta tei dap dat dat pwkhou dui tei luangc ntamv the kumna kamei kapaengc thangc tei kaanpat the.

¹⁵Jerikomei muczwng 50 tei rui kata how lana, “Elija tuang ngamv tei Elisha khou nai the!” twna sa the. Kaniw rui Elisha ta ariw khang tatna kahu khou nkhum keyna

¹⁶sa the, “Khou hei ramh ngammei aniw gaanv 50 nai e. Aniw tatna nang kaipouc ta phu me. RINGHPOUC tuang bumaengc rui kata phungc tat lana chyngbut ruc khou hamh e thei nzaengc dic khou ganclou bam kho ni nuh e.” “Nangniw tat nangh e,” twna Elisha rui daw the.

¹⁷Kamei rui kwm keylouna titat mak saanv kaniw rui sa dat sa dat bam the. Kaniw tei tatna luanghkauh khou ni, nzaengc khou ni zaeng neih thumh Elija ta phu the tiki ariw mak khe.

¹⁸Khoutei Jeriko khou nkhwanna bammei Elisha khou kaniw guang dat the. Khoutei “Ai tat riu twna nangniw khou sa kan makna cho?” twna Elisha rui kaniw khou sa the.

¹⁹Jerikomei gaanvsaekc Elisha daeng khou guangna sa the, “Kaipoucle, nang rui thay bammei tei the mi hei gaymei kaidai akhat re, tiki dui thu si e kumna kathai kapwang laa tu mak khe.”

²⁰Kaikhuang thanh khou ntey louna adaeng khou laaguang o twna kamei rui latdanv pat the. Kaniw rui hei tei kadaeng khou laaguang the,

²¹Kumna kamei duipuakkai thangc tei tatna ntey tei dui khou tei phaiclou lana kumna sa the, “RINGHPOUC rui sa e: ‘Ai rui mi dui hei sw nthanlou the, kumna mi dui hei rui theihmei khatni kathai kapwang laa tu makmei tii pat dat lak khe.’ ”

²²Hei khou tei rui thauna, Elisha rui samei kumcna mi dui tei nthan kan the.

²³Elisha tei Bethel tat khang Jeriko khou rui tat patmei chaeng khou nggaanvmei nac pang kaidai khou tei rui pat lana “Pykypouc, nang mi khou rui tat kan o! Pykypouc, nang mi khou rui tat kan o!” twna matevna kauc the.

²⁴Elisha rui karih patna kaniw ta tei zaucna kaniw ta RINGHPOUC zanc khou rui sianglou the. Khoutei nwmbangc thangc rui chagamh kui kanei patna alauc gaanv 42 ta tei siat puat paruatlou the.

²⁵Elisha tei Karmel Chyng thangc tatna mi tangv tei Samaria khou hanc guang dat the.